Magnum-نىڭ باسى تاعى دا داۋعا قالدى. كەشە تانىمال قارجى ساراپشىسى ايبار ولجاي Magnum-عا قاتىستى حالىق كوكەيىندەگى وزەكتى ماسەلەنى قوزعاپ، پىكىر ءبىلدىردى. ونىڭ سوزىنشە،گيپەرماركەت سورەسىندە وتاندىق ءونىمنىڭ ورنىنا رەسەيلىك تاۋار قاپتاعان. بۇعان جاۋاپتى مينيسترلىك نە دەيدى؟ Dalanews.kz تارقاتتى.
داۋدىڭ باسى: مايونەزدىڭ ارتىندا قانداي ماسەلە تۇر؟
داۋدىڭ باسى الماتىدا وندىرىلەتىن "3 جەلانيە" مايونەزىنەن باستالعان. ايبار ولجايدىڭ ايتۋىنشا، گيپەرماركەت قىزمەتكەرى ءقازىر قازاقستاندىق مايونەز ساتىلمايتىنىن راستاپتى.
"Magnum قازاقستاندىق مايونەزدى الىپ تاستاپ، ورنىنا رەسەيدىڭ "ماكەيەۆ" مايونەزىن تولتىرىپ تاستاعان"، - دەپ اشىندى ول.
ماسەلە مايونەزبەن شەكتەلىپ قالمايدى. بۇل بىرنەشە ماڭىزدى، تۇيتكىلدى ماسەلەنى اشىپ كورسەتىپ وتىر.
"Magnum - جەكەمەنشىك بيزنەس. ول قازاقستاندىق ءونىمدى مۇلدە ساتپاي، سورەلەردى برازيليانىڭ بۋبۋزەلاسىمەن تولتىرىپ قويسا دا ءوز ەركى. ءبىراق وندايى بار بولاتىن بولسا، مەملەكەتتەن نە ءۇشىن 0،01 پايىزبەن تەگىن اقشا الىپ وتىر دەگەن سۇراق تۋىندايدى. سوڭعى 5 جىلدا Magnum ءبىر الماتىنىڭ وزىنەن كەمىندە 13 ميلليارد تەڭگە كومەك العان. ال باسقا وڭىرلەردى قوسا الساق، جوق دەگەندە 17-18 ميلليارد تەڭگە شىعۋى مۇمكىن"، - دەيدى ساراپشى.
بۇل تۇستا ساۋدا مينيسترلىگىنىڭ ارەكەتى دە تىلگە تيەك ەتىلىپ، جاۋاپتى ۆەدومستۆو تاراپىنان ۇلكەن لوگيكالىق قاتەلىك بارى ايتىلدى.
"ولار Magnum سياقتى ءىرى ساۋدا جەلىلەرىنە پايىزسىز نەسيە تاراتىپ وتىرعاندا تەك بەلگىلى ءبىر الەۋمەتتىك ازىق-تۇلىككە باعانى وسىرمەۋ بويىنشا تالاپ قويادى. ءبىراق "ول تاۋار وتاندىق بولۋى ءتيىس" دەگەن شارت جوق. سوندىقتان مىسالى، "ارزان ءسۇت سات" دەپ تالاپ قويىپ، مەملەكەتتىك كومەك بەرىلگەندە، Magnum ول اقشانى الىپ، بەلارۋستىڭ ارزان ءسۇتىن ساتىپ وتىرا الادى. ول ءبىزدىڭ وتاندىق تاۋار ءوندىرۋشىنى قولداۋ بويىنشا ەكونوميكالىق لوگيكامىزعا، وسى سالاعا بەرىلەتىن 8 تريلليون تەڭگە ينۆەستيسيامىزعا مۇلدە قايشى، قاراما-قارسى شەشىم"، - دەيدى ول.
ساۋدا جانە ينتەگراسيا مينيسترلىگىنىڭ ساۋدا كوميتەتى Magnum-عا قاتىستى سىن-پىكىردەن كەيىن ءۇنسىز قالمادى.
ۆەدومستۆو مالىمەتىنشە، قولدانىستاعى تالاپتارعا سايكەس ساۋدا نىساندارى مەن بازارلارداعى سورەنىڭ كەمىندە 30 پايىزى قازاقستاندا وندىرىلگەن ازىق-تۇلىك تاۋارلارىنا بولىنۋگە ءتيىس.
"ۇكىمەتتىڭ تاپسىرماسى نەگىزىندە مەملەكەتتىك قولداۋ الاتىن ساۋدا جەلىلەرى ءۇشىن قارسى مىندەتتەمەلەر تەتىگى ەنگىزىلدى. بۇل تالاپ بويىنشا وتاندىق ازىق-تۇلىك تاۋارلارىنا سورە كەڭىستىگىنىڭ 50 پايىزىنا دەيىن، ال ازىق-تۇلىك ەمەس تاۋارلارعا كەمىندە 20 پايىزى بولىنۋگە ءتيىس. مۇنداي تاۋارلار "قازاقستاندا جاسالعان" دەگەن ارنايى بەلگىمەن تاڭبالانىپ، تۇتىنۋشى ءۇشىن كوزگە بىردەن تۇسەتىن، ساتىپ الۋ بەلسەندىلىگى جوعارى ايماقتاردا، كوز دەڭگەيىندە ورنالاستىرىلادى"، - دەپ جازىلعان حابارلامادا.
ۇلتتىق وندىرۋشىلەردى قولداۋ جونىندەگى مەملەكەتتىك ساياسات اياسىندا مينيسترلىك ساۋدا ورىندارىندا وتاندىق ونىمدەردىڭ قولجەتىمدىلىگىنە مونيتورينگ جۇرگىزگەن. رەسمي مالىمەتكە سۇيەنسەك، الەۋمەتتىك ماڭىزى بار ازىق-تۇلىكتىڭ 15 ساناتى (ءسۇت، ەت، نان، جۇمىرتقا، ۇن جانە ت.ب.) بويىنشا جۇرگىزىلگەن تالداۋ ناتيجەسىندە قازاقستاندىق ونىمدەر ورتا ەسەپپەن سورە كەڭىستىگىنىڭ 92 پايىزىن الىپ وتىرعانى انىقتالعان. بۇل كورسەتكىش بازارلاردا 94 پايىز، دۇكەندەر 93 پايىز بولىپ وتىر.
"كەڭ اسسورتيمەنتكە قاراماستان، سۋپەرماركەتتەردە دە وتاندىق ونىمدەر ۇلەسى جوعارى، ياعني 89 پايىز بولادى. شەتەلدىك مەملەكەتتەردەن اكەلىنگەن الەۋمەتتىك ماڭىزى بار ازىق-تۇلىك تاۋارلارى سۋپەرماركەتتەردە 8،5 پايىز كولەمىندە ۇسىنىلعان، ال بازارلار مەن شاعىن دۇكەندەردە بۇل كورسەتكىش 5 پايىزدان اسپايدى. سونىمەن قاتار، قازاقستاندىق سيىر ەتى، نان، ايران جانە جۇمىرتقا ساۋدانىڭ جەكەلەگەن فورماتتارىندا 100 پايىزعا دەيىن ۇسىنىلىپ، تۇتىنۋشى سۇرانىسىن تولىق قامتاماسىز ەتىپ وتىر"، - دەپ جازىلعان حابارلامادا.
2023 جىلدان باستاپ ساۋدا جانە ينتەگراسيا مينيسترلىگىنە ساۋدا نىساندارىنىڭ قىزمەتى تۋرالى زاڭناما تالاپتارىن ساقتالۋىن تەكسەرۋ وكىلەتتىگى بەرىلگەن.
"مينيسترلىك وتاندىق وندىرۋشىلەرمەن شارت جاساسۋدان نەگىزسىز باس تارتۋ جاعدايلارىن دا تەكسەرە الادى. مۇنداي ارەكەتتەر نارىققا قولجەتىمدىلىكتى شەكتەۋ رەتىندە قاراستىرىلىپ، كاسىپكەرلىك سۋبەكتىلەرىنە 100 ايلىق ەسەپتىك كورسەتكىش مولشەرىندە ايىپپۇل سالۋعا اكەپ سوعادى"، - دەپ جازىلعان حابارلامادا.
ساۋدا كوميتەتى ءقازىر وتاندىق وندىرۋشىلەر تاراپىنان ءونىمدى سورەلەرگە ورنالاستىرۋدان نەگىزسىز باس تارتۋعا بايلانىستى ۋاكىلەتتى ورگانعا ەشقانداي شاعىم تۇسپەگەنىن مالىمدەدى.
بۇعان دەيىنگى جاعداي
ايتا كەتەيىك، بۇعان دەيىن دە Magnum-نىڭ باسى داۋعا قالدى. الەۋمەتتىك جەلىلەردە Magnum سۋپەرماركەتتەر جەلىسىنىڭ كۋرەرى جۇمىستان شىعارىلۋى ۇلكەن تالقىعا ءتۇستى. بۇل جاعداي كۋرەر كليەنتتەن قازاق تىلىندە سويلەۋىن سۇراۋىنان كەيىن بولدى.
كليەنت اسىلحان ەسىمدى ازاماتتىڭ ايتۋىنشا، ول Magnum-نان ازىق-تۇلىككە تاپسىرىس بەرگەن كەزدە كۋرەر ودان قازاقشا سويلەۋدى تالاپ ەتكەن. كەيىن بۇل وقيعا الەۋمەتتىك جەلىدە جاريالانىپ، ناتيجەسىندە كۋرەر جۇمىستان قۋىلعان ەدى. دەسە دە ارتىنشا ەكەۋى تاتۋلاسىپ، ۆيدەو جاريالادى.
