شقو كاسىپكەرلىك جانە يندۋستريالىق-يننوۆاسيالىق دامۋ باسقارماسىنىڭ باسشىسى ارداق مادييەۆ قىتايدان كەلەتىن تۋريستەر سانىن ارتتىرۋعا باعىتتالعان اۋقىمدى جوبا تۋرالى مالىمدەدى، دەپ حابارلايدى Dalanews.kz Bizdin oskemen-گە سىلتەمە جاساپ.
ارداق مادييەۆتىڭ ايتۋىنشا، بۇگىندە جۇڭگو حالىق رەسپۋبليكاسىنىڭ شىڭجاڭ-ۇيعىر اۆتونوميالىق اۋدانىنداعى قاناس كولىنە جىل سايىن شامامەن 10 ميلليونعا جۋىق تۋريست كەلەدى. بۇل جەرلەردىڭ بەدەرى مەن تابيعاتى مارقاكول كولىمەن بىردەي. مارقاكول كولىنىڭ تۋريستىك الەۋەتى زور بولعانىمەن وكىنىشكە وراي، كولدە ءالى قاجەتتى ينفراقۇرىلىم جوق. شىڭجاڭ ۇيعىر اۆتونوميالىق اۋدانىنداعى قاناس جانە مارقاكولدى ءبىر تۋريستىك باعىتپەن بايلانىستىرۋ مارقاكولگە ساياحاتشىلاردى تارتۋعا جاڭا سەرپىن بەرەدى.
– ارينە، زايسانداعى اۋەجاي سالىنعاننان كەيىن قىتايلىق تۋريستەر اعىنى ايتارلىقتاي ارتادى. مارقاكول اۋدانى جاڭادان قۇرىلعان ايماق جانە ءتۋريزمدى دامىتۋ مۋلتيپليكاتيۆتىك ناتيجە بەرەدى. ءبىز ەكولوگيا مينيسترلىگى مەن ورمان شارۋاشىلىعى كوميتەتىنىڭ وكىلدەرىمەن بىرلەسىپ جۇمىس توبىن قۇردىق، سىرتتاي وتىرىس ۇيىمداستىرىپ، تۋريستەردى قابىلداۋعا ارنالعان ينفراقۇرىلىمدار: قوناق ۇيلەر، كەمپينگتەر (جازعى لاگەر) جانە ت.ب. ورنالاساتىن جەرلەردى انىقتادىق، - دەدى ارداق مادييەۆ.
