Primeminister.kz سايتى اتاپ وتكەندەي، BINOM School – قازاقستاندىق جالپى ءبىلىم بەرۋ ۇدەرىسىنە وزىق ادىستەمەلەردى ەنگىزەتىن جاڭا برەند. 2021-2022 جىلدارى ەلوردادا وسى فورماتتاعى 6 مەكتەپ اشىلادى. ءاربىر وقۋ ورنى ەكى اۋىسىمدا 4 مىڭ وقۋشىعا شاقتالعان. وقىتۋ وتاندىق مودەل مەن فينليانديا، ۇلىبريتانيا جانە وڭتۇستىك كورەيانىڭ الدىڭعى قاتارلى حالىقارالىق جۇيەلەرى نەگىزىندە ۇيىمداستىرىلعان.
جوبانى BI Group حولدينگى نۇر-سۇلتان قالاسىنىڭ اكىمدىگىمەن بىرلەسىپ مەملەكەتتىك-جەكەشەلىك ارىپتەستىك قاعيداتى بويىنشا جۇزەگە اسىرىپ جاتىر.
اۋدانى 22 مىڭ شارشى مەتردەن استام ءاربىر BINOM مەكتەبىندە 127 كابينەت، فيزيكا، حيميا، بيولوگيا، نانو- جانە بيوتەحنولوگيا بويىنشا 9 كەڭەيتىلگەن زەرتحانا، 100 ورىندىق كينوزال، مۇعالىمدەر مەن بالالارعا ارنالعان كوۆوركينگ-ايماقتار، تەلەستۋديا، ويىن بولمەلەرى، سمارت-سىنىپتار، شىعارماشىلىق ەكسپەريمەنتتەرگە ارنالعان 3D-پرينتەر، روبوتتى تەحنيكا كابينەتتەرى، مەتالل جانە اعاش ويۋ شەبەرحانالارى، Speaking Club، TedxBinom، سونداي-اق قازاقستاندىق جانە شەتەلدىك جازۋشىلاردىڭ 5 مىڭنان استام تانىمال باسىلىمدارى جيناقتالعان كىتاپحانا بار. سونىمەن قاتار ەرەكشە ءبىلىم الۋ قاجەتتىلىگى بار بالالار ءۇشىن ىڭعايلى ءبىلىم بەرۋ ورتاسى جاسالعان: ءجۇرىپ-تۇرۋى شەكتەۋلى وقۋشىلارعا ارنالعان ليفتىلەر، پاندۋستار، كوتەرگىشتەر، بيىكتىگى رەتتەلەتىن ۇستەلدەر مەن پارتالار، تاكتيلدى جولاقتار جانە ت. ب.
ۇكىمەت باسشىسى مەكتەپ وقىتۋشىلارىمەن كەزدەستى. BINOM مەكتەبىنە مۇعالىمدەردى ىرىكتەۋ Jumys Smart Nation ءىرى ينتەرنەت-پلاتفورماسىندا ءوتتى. ەكى كەزەڭدىك كونكۋرستىق ىرىكتەۋدىڭ ناتيجەلەرى بويىنشا مەكتەپكە رەسپۋبليكا وڭىرلەرىنەن 300 پەداگوگ قابىلداندى.
ەلوردادا اشىلعان Quantum STEM School جەكەمەنشىك جەلىسىنىڭ العاشقى يننوۆاسيالىق مەكتەبى 1020 ورىنعا ارنالعان.
Quantum STEM School - Lancaster Group جانە BI Group كومپانيالارىنىڭ بىرلەسكەن جوباسى.
مەكتەپ ماتەماتيكا، عىلىم جانە ينجەنەريا پاندەرىن تەرەڭدەتىپ وقىتاتىن سينگاپۋر مەن اقش-تىڭ ۇزدىك وقۋ ادىستەمەلەرىنىڭ وزىق تاجىريبەسىنە نەگىزدەلگەن. مۇندا وقۋشىلار جالپى ءبىلىم بەرۋ پاندەرىمەن قاتار، ينتەگراسيالانعان ينجەنەرلىك باعدارلاما (Integrated Engineering Program)، سپورتتىق باعدارلامالاۋ، اۆيامودەلدەۋ جانە ت. ب. كۋرستارىن مەڭگەرەدى. الداعى جىلدارى بۇكىل ەل بويىنشا 20 Quantum STEM School سالۋ جوسپاردا بار.
مەملەكەتتىك-جەكەشەلىك ارىپتەستىك مودەلى بويىنشا يننوۆاسيالىق وقۋ ورىندارىن سالۋدى ارتتىپ، جەكەمەنشىك مەكتەپتەر جەلىسىن دامىتۋ قاجەت. بيزنەسپەن بىرلەسىپ ىسكە اسىرىلعان وزىق وقۋ ورىندارىن قۇرۋ جوبالارى ورتا ءبىلىم بەرۋدىڭ جاڭا ستاندارتتارىن قالىپتاستىرۋعا ۇلگى بولادى، — دەدى مامين.
Nur Otan پارتياسىنىڭ سايلاۋالدى باعدارلاماسىن ىسكە اسىرۋ اياسىندا 2021 جىلدان باستاپ 2025 جىلعا دەيىنگى كەزەڭدە ەلىمىزدە 800 جاڭا مەكتەپ پايدالانۋعا بەرىلەدى. بيىل 200 مەكتەپتى پايدالانۋعا بەرۋ جوسپارلانعان، ونىڭ ىشىندە ماقساتتى قۇرىلىس ەسەبىنەن – 163 مەكتەپ، ءمجا تەتىگى ەسەبىنەن – 6 مەكتەپ، جەكەمەنشىك مەكتەپتەر جەلىسىن دامىتۋ ەسەبىنەن – 31 مەكتەپ. وسى جىلى 200 مەكتەپتىڭ اشىلۋى باسىم تارتىپپەن اپاتتى مەكتەپتەردىڭ، ءۇش اۋىسىمدى مەكتەپتەردىڭ پروبلەمالارىن شەشۋگە جانە وقۋشى ورىندارىنىڭ تاپشىلىعىن قىسقارتۋعا مۇمكىندىك بەرەدى.
مەكتەپتەردىڭ اشىلۋ سالتاناتىنا پرەمەر-مينيستردىڭ ورىنباسارلارى رومان سكليار مەن ەرالى توعجانوۆ، ءبىلىم جانە عىلىم ءمينيسترى اسحات ايماعامبەتوۆ، دەنساۋلىق ساقتاۋ ءمينيسترى الەكسەي سوي، نۇر-سۇلتان قالاسىنىڭ اكىمى التاي كولگىنوۆ جانە ت. ب. قاتىستى.
