Primeminister.kz saıty atap ótkendeı, BINOM School – qazaqstandyq jalpy bilim berý úderisine ozyq ádistemelerdi engizetin jańa brend. 2021-2022 jyldary elordada osy formattaǵy 6 mektep ashylady. Árbir oqý orny eki aýysymda 4 myń oqýshyǵa shaqtalǵan. Oqytý otandyq model men Fınlándıa, Ulybrıtanıa jáne Ońtústik Koreıanyń aldyńǵy qatarly halyqaralyq júıeleri negizinde uıymdastyrylǵan.
Jobany BI Group holdıńi Nur-Sultan qalasynyń ákimdigimen birlesip memlekettik-jekeshelik áriptestik qaǵıdaty boıynsha júzege asyryp jatyr.
Aýdany 22 myń sharshy metrden astam árbir BINOM mektebinde 127 kabınet, fızıka, hımıa, bıologıa, nano- jáne bıotehnologıa boıynsha 9 keńeıtilgen zerthana, 100 oryndyq kınozal, muǵalimder men balalarǵa arnalǵan kovorkıng-aımaqtar, telestýdıa, oıyn bólmeleri, smart-synyptar, shyǵarmashylyq eksperımentterge arnalǵan 3D-prınter, robotty tehnıka kabınetteri, metal jáne aǵash oıý sheberhanalary, Speaking Club, TedxBinom, sondaı-aq qazaqstandyq jáne sheteldik jazýshylardyń 5 myńnan astam tanymal basylymdary jınaqtalǵan kitaphana bar. Sonymen qatar erekshe bilim alý qajettiligi bar balalar úshin yńǵaıly bilim berý ortasy jasalǵan: júrip-turýy shekteýli oqýshylarǵa arnalǵan lıftiler, pandýstar, kótergishter, bıiktigi retteletin ústelder men partalar, taktıldi jolaqtar jáne t. b.
Úkimet basshysy mektep oqytýshylarymen kezdesti. BINOM mektebine muǵalimderdi irikteý Jumys Smart Nation iri ınternet-platformasynda ótti. Eki kezeńdik konkýrstyq irikteýdiń nátıjeleri boıynsha mektepke respýblıka óńirlerinen 300 pedagog qabyldandy.
Elordada ashylǵan Quantum STEM School jekemenshik jelisiniń alǵashqy ınovasıalyq mektebi 1020 orynǵa arnalǵan.
Quantum STEM School - Lancaster Group jáne BI Group kompanıalarynyń birlesken jobasy.
Mektep matematıka, ǵylym jáne ınjenerıa pánderin tereńdetip oqytatyn Sıngapýr men AQSH-tyń úzdik oqý ádistemeleriniń ozyq tájirıbesine negizdelgen. Munda oqýshylar jalpy bilim berý pánderimen qatar, ıntegrasıalanǵan ınjenerlik baǵdarlama (Integrated Engineering Program), sporttyq baǵdarlamalaý, avıamodeldeý jáne t. b. kýrstaryn meńgeredi. Aldaǵy jyldary búkil el boıynsha 20 Quantum STEM School salý josparda bar.
Memlekettik-jekeshelik áriptestik modeli boıynsha ınovasıalyq oqý oryndaryn salýdy arttyp, jekemenshik mektepter jelisin damytý qajet. Bıznespen birlesip iske asyrylǵan ozyq oqý oryndaryn qurý jobalary orta bilim berýdiń jańa standarttaryn qalyptastyrýǵa úlgi bolady, — dedi Mamın.
Nur Otan partıasynyń saılaýaldy baǵdarlamasyn iske asyrý aıasynda 2021 jyldan bastap 2025 jylǵa deıingi kezeńde elimizde 800 jańa mektep paıdalanýǵa beriledi. Bıyl 200 mektepti paıdalanýǵa berý josparlanǵan, onyń ishinde maqsatty qurylys esebinen – 163 mektep, MJÁ tetigi esebinen – 6 mektep, jekemenshik mektepter jelisin damytý esebinen – 31 mektep. Osy jyly 200 mekteptiń ashylýy basym tártippen apatty mektepterdiń, úsh aýysymdy mektepterdiń problemalaryn sheshýge jáne oqýshy oryndarynyń tapshylyǵyn qysqartýǵa múmkindik beredi.
Mektepterdiń ashylý saltanatyna Premer-mınıstrdiń orynbasarlary Roman Sklár men Eraly Toǵjanov, bilim jáne ǵylym mınıstri Ashat Aımaǵambetov, densaýlyq saqtaý mınıstri Alekseı Soı, Nur-Sultan qalasynyń ákimi Altaı Kólginov jáne t. b. qatysty.
