الماتى تۇرعىندارى قالا اكىمدىگىنە جەكە كومپانيالار تاراپىنان ايتىلعان ۇسىنىسقا قارسى شىقتى، دەپ حابارلايدى Dalanews.kz.
ءمان-جايى
"قۇرىلىس سالاسىنداعى ءبىرقاتار كومپانيا باسشىسىمەن كەڭەس وتكىزىپ، ولاردىڭ جۇزەگە اسىرىپ جاتقان جوبالارىن تالقىلادىم. اسىرەسە، الماتىنىڭ تۋريستىك جانە جول ينفراقۇرىلىمىن دامىتۋعا ارنالعان مەملەكەتتىك-جەكەمەنشىك سەرىكتەستىك نەگىزىندەگى جوبالارعا ەرەكشە نازار اۋداردىق. سەرىكتەستىكتىڭ باسىم باعىتتارىن انىقتادىق. ءار جوبانىڭ مەرزىمى، قارجىلاندىرۋ كولەمى مەن قالاعا تيگىزەر تيىمدىلىگىن جان-جاقتى قاراستىرۋ ءۇشىن ءتيىستى باسقارمالارعا تاپسىرما بەردىم"، - دەپ جازدى قالا اكىمى.
سونداي-اق، دارحان ساتىبالدى الەۋمەتتىك جەلىدەگى پاراقشاسىنا بىرنەشە جوبانىڭ سۋرەتتەرىن جاريالاعان.
حالىقتىڭ رەاكسياسى
جوبالاردىڭ ىشىندە ۆەنەسياعا ۇقساس جوسپار، ەستاكادا سىزباسى بار. الايدا بۇل شەشىم قالا تۇرعىندارىنا جاقپادى.
جۇرت مۇنداي جوبا قالانىڭ ماسەلەسىن ودان ءارى كۇردەلەندىرىپ جىبەرەتىنىن ايتتى. وعان قوسا، حالىق قالاداعى لاس اۋانى دا سىناعان.
"تولە بي كوشەسىندەگى ەستاكادا قايدان شىقتى؟ ول جەردە ترامۆاي جوباسى بولادى دەپ ەدى عوي. اكىمدىك LRT-دان باس تارتتى ما؟"، "قۇرمەتتى قالا اكىمى. مۇنداي ماگيسترال سالماساڭىزدار ەكەن. قالاداعى اۋا تىم لاستانىپ كەتتى، دەمالۋ مۇمكىن ەمەس. الدىمەن وسى ماسەلەنى شەشەيىك. بۇل - ۇلكەن ەكولوگيالىق پروبلەما. جاياۋ قوزعالىستى دامىتۋ، قوعامدىق كولىكتى جەتىلدىرۋ قاجەت. ترامۆايدى قايتا قايتارىڭىزدار!"، "ەكولوگيا نە بولدى؟"، "نە دەگەن سۇرىقسىز جولايرىق؟ اكىمدىك دۇرىس ۋربانيست تابا الماي ما؟ مامان جالداۋعا بيۋدجەت جوق پا؟ قالا ونسىز دا ءبۇلىنىپ ءبىتتى، نەگە ودان ءارى قۇرتاسىزدار؟! بيۋدجەتتى "يگەرۋ" كەرەك ەكەنىن تۇسىنەمىن، ءبىراق ار-ۇيات دەگەن دە بولۋى كەرەك قوي"، - دەپ اشىندى قالا تۇرعىندارى.
