ماجارستاننىڭ OTP Bankء-ى قازاقستان نارىعىنا ەنۋى مۇمكىن. بۇعان دەيىن بۇل رەتتە تەك بولجامدار كەلتىرىلسە، ەندى مۇنى ەلشىلىك رەسمي تۇردە راستاپ، بۇگىنگى تاڭدا كەلىسسوزدەر جۇرگىزىلىپ جاتقانىن جەتكىزدى، دەپ حابارلايدى Dalanews.kz.
بۇل تۋرالى اقوردادا ۆەنگرياداعى قازاقستاننىڭ توتەنشە جانە ۋاكىلەتتى ەلشىسى ابزال ساپاربەك ۇلى ايتتى.
"بۇگىندە ءبىرقاتار ءىرى ماجار كومپانيالارىمەن كەلىسسوزدەر جالعاسۋدا. ونىڭ ىشىندە وسى ەلدىڭ ءىرى بانكى — OTP Bankء-تىڭ قازاقستان نارىعىنا شىعۋى بويىنشا كەلىسسوزدەر ءجۇرىپ جاتىر. سونىمەن قاتار، قازاقستانعا ماجارلىق تەلەكوممۋنيكاسيالىق جانە عارىشتىق IT-كومپانيا دا كەلدى. ولاردىڭ استاناعا ساپارى بارىسىندا "قازاقستان عارىش ساپارى"، "قازاقتەلەكوممەن" بىرلەسكەن جوبالارى، سونداي-اق قورعانىس ونەركاسىبى سالاسىنداعى ىنتىماقتاستىق تۋرالى كەلىسسوزدەر قولعا الىندى. سونىمەن قاتار، مۇناي-گاز سالاسىندا جۇمىس ىستەيتىن MOL كومپانياسى ەلىمىزدىڭ گاز سەكتورىنا ءىرى ينۆەستيسيالار قۇيۋ نيەتى بويىنشا كەلىسسوزدەر جۇرگىزۋدە"، دەپ Kazinform ابزال ساپاربەك ۇلىنىڭ ءسوزىن كەلتىرەدى.
ايتا كەتسەك، الدىمەن قارجى نارىعىن رەتتەۋ جانە دامىتۋ اگەنتتىگىنىڭ (قنردا) باسشىسى ءمادينا ءابىلقاسىموۆا شىعىس ەۋروپاداعى بانكتەردىڭ ءبىرى قازاقستاندا ءىرى بانكتەردىڭ ءبىرىن ساتىپ الۋدى جوسپارلاپ وتىرعانىن ايتقان ەدى.
ال تانىمال قارجىگەر عالىم قۇسايىنوۆ بۇل ارادا ساتىپ الۋشى – ماجارلىق OTP Bank (ۆەنگريا)، ال ساتىلىمعا قويىلعانى ForteBank بولۋى مۇمكىن ەكەنىن ايتىپ، ءوز بولجامىمەن بولىسكەن.
"ەگەر ەلىمىزدەگى ءىرى دەگەن 10 بانكتى الىپ قاراستىرساق، حالىق تىم ۇلكەن، ال كاسپيي بولسا، تىم قىمباتقا تۇسەدى، كەرىسىنشە ولار وزدەرى بانك ساتىپ الىپ جاتىر، بسك دا ەمەس، ويتكەنى ولاردىڭ اكسيونەرلەرىن مەن جاقسى تانيمىن، جۋسان بولسا، ونى جۋىردا عانا ساتتىق، ەۋرازيالىق بانك دەيىك دەسەك، ءاي قايدام، ولاردىڭ ءوز باسىندا پروبلەماسى جەتەرلىك. "بەرەكەنى" قاتارلىقتارعا بەردىك. سوندا ربك مەن فورتە قالادى. ەگەر ساتىپ الۋشى وتر دەپ قاراستىرساق، ويتكەنى ءبىزدىڭ نارىققا كەلۋگە نيەتتى سول عانا، ال ول بولشەك قىزمەتپەن اينالىساتىن بانك، دەمەك، بۇل HSB-نى ساتىپ العان فورتە بولادى"، دەپ جازدى مامان Threads-تەگى پاراقشاسىندا.
سونداي-اق ساتىلىمعا Forte ەمەس، ەۋرازيالىق بانك قويىلۋى مۇمكىن دەگەن بولجام دا بار.
ايتا كەتسەك، كۇنى كەشە ەلىمىزگە رەسمي ساپارمەن ماجارستان پرەزيدەنتى تاماش شۋيوك كەلگەن بولاتىن. ەكى ەل اراسىنداعى 2024 جىلى تاۋار اينالىمى شامامەن 200 ميلليون دوللارعا جەتىپ، ال بيىلعى سەگىز ايدا 22 پايىز وسكەن (164،5 ميلليون دوللار. بۇگىندە قازاقستان ەكونوميكاسىنا 400 ميلليون دوللارعا جۋىق ينۆەستيسيا سالعان 35-تەن اسا ماجار كومپانياسى جۇمىس ىستەپ جاتىر.
