كەزدەسۋ بارىسىندا وبلىس اكىمىنىڭ ورىنباسارى جەڭىس تۇياقوۆ جوبانىڭ جۇزەگە اسىرىلۋ بارىسى تۋرالى باياندادى. ج. تۇياقوۆتىڭ ايتۋىنشا، كومپانيامەن كەلىسىمدەر جۇرگىزۋ 2016 جىلى تامىزدا باستالعان. قازىرگى كەزدە جۇزەگە اسىرۋ بارىسىنداعى تۋىنداعان ماسەلەلەردى شەشۋدە ىلگەرىلەۋ بار. بۇگىنگى كۇنى ىلە اۋدانىنداعى «بەرەكە» يندۋستريالدى اۋماعىندا زاۋىت قۇرىلىسى ءۇشىن اۋماعى 25 گا. اۋماق جەر بولىنگەن. مەملەكەتتىك ورگاندارمەن جانە قارجى ينستيتۋتتارىمەن بىرلەسكەن جۇمىس جالعاسىپ جاتىر.
ءوز كەزەگىندە كومپانيا وكىلى - جوبا جەتەكشىسى يوس دەن بوەر قازاقستاندىق «ەۋرازيا» كومپانيالار توبىمەن سەرىكتەس بولىپ، بىرلەسكەن قىزمەت تۋرالى كەلىسىمشارتقا قول قويىلعانىن جەتكىزدى.
ي. دەن بوەردىڭ ايتۋىنشا، 2019 جىلعى ءساۋىردىڭ باسىندا زاۋىت قۇرىلىسىن سالۋ باستالادى، 2020 جىلدىڭ قازانىندا العاشقى ءونىمى الىنادى دەپ جوسپارلانعان. كومپانيا تەك كارتوپتى وڭدەۋمەن عانا ەمەس، وندىرۋمەن دە اينالىسادى.
جوبا جەتەكشىسىنىڭ ايتۋىنشا، «Farm Frits Kazakhstan» ج ش س زاۋىتتىڭ وڭدەيتىن كارتوبىن جەرگىلىكتى فەرمەرلەردەن قابىلداۋعا مۇددەلىلىك تانىتىپ وتىر. ينۆەستورلار قاپشاعاي قالاسىندا دا كارتوپ ءوسىرۋدى دامىتسا جاقسى بولار ەدى دەگەن ۇسىنىستارىن دا جەتكىزدى.
ءوز كەزەگىندە وبلىس اكىمى اماندىق باتالوۆ بيىلعى جىلى كارتوپتى وندىرىستىك دەڭگەيدە ءوسىرۋ اۋىل شارۋاشىلىعىنىڭ باسىم باعىتتارىنىڭ ءبىرى ەكەنىن اتاپ ءوتتى. بيىلعى جىلى كارتوپ ءوندىرىسىن دامىتۋعا بارلىق مۇمكىندىكتەرى بار رايىمبەك اۋدانىندا «جەتىسۋ» اكك ارقىلى سەرۆيستىك-دايىنداۋ ورتالىقتارى قۇرىلىپ، قاجەتتى تەحنيكا ساتىپ الىندى. ال ساۋىردە گەكتارىنا 350 سەنتنەردەن ءونىم بەرەتىن، گوللانديالىق سورتتىڭ 240 توننا ساپالى تۇقىم اكەلىنەدى.
سونىمەن قاتار اماندىق باتالوۆ زاۋىت ءقۇرىلىسى وبلىسقا تارتىلاتىن اۋقىمدى ينۆەستيسيا عانا ەمەس، ەڭ باستىسى جەرگىلىكتى حالىق ءۇشىن تۇراقتى جۇمىس ورنى ءارى شارۋالار ءۇشىن ءونىمىن وتكىزۋگە جاقسى مۇمكىندىك ەكەنىن ايتتى.
– بۇگىنگى كۇنى بىزدە وبلىستا قانت قىزىلشاسى مەن جۇگەرى شارۋاشىلىعى جاقسى دامىپ كەلەدى. مەملەكەت قولداۋىنىڭ ارقاسىندا اۋىل شارۋاشىلىعىن دامىتۋعا بارلىق جاعدايلار جاسالعان. بىزدە شارۋالاردىڭ شيكىزاتتارىن قابىلداپ، دايىن ءونىم شىعاراتىن زاۋىتتار بار. سوندىقتان وسىنداي ءىرى زاۋىت اشىلاتىن بولسا، وڭىردەگى كارتوپ ءوندىرىسىن دامىتۋعا ىقپال ەتەر ەدى، – دەدى ا. باتالوۆ.
https://dalanews.kz/34487
