25 جۇلدىزدى كۇن – 25 بالاباقشا
ءدال وسى كۇنى تاۋەلسىزدىگىمىزدىڭ 25 جىلدىق مەرەيتويىنا بايلانىستى «25 جۇلدىزدى كۇن» اياسىندا الماتى وبلىسىنىڭ حالقى تىعىز قونىستانعان اۋداندارىندا 2385 ورىندى 25 بالاباقشا پايدالانۋعا بەرىلدى. جاڭا بالاباقشالار ىلە، قاراتال، جامبىل، پانفيلوۆ، ەڭبەكشىقازاق، تالعار اۋداندارى مەن تالدىقورعان قالاسىندا ىسكە قوسىلدى. اتالعان بالاباقشالار اشىلعاننان كەيىن وبلىستا 3-6 جاس ارالىعىنداعى بالالاردى مەكتەپكە دەيىنگى مەكەمەلەرمەن قامتۋ دەڭگەيى جامبىل اۋدانىندا – 94،2%، تالعار اۋدانىندا – 89%، پانفيلوۆ اۋدانىندا – 85،1%، ىلە – 84،1%، ەڭبەكشىقازاق – 82%، تالدىقورعان قالاسى – 87% كورسەتكىشكە جەتتى.
وبلىس اكىمى ا. باتالوۆ قاراتال اۋدانى ۇشتوبە قالاسىندا 320 ورىندى «بالبوبەك» بالاباقشاسىنىڭ اشىلۋ سالتاناتىنا قاتىستى. اتالعان بالاباقشا ۇلتتىق قوردان بولىنگەن 738 ملن تەڭگەگە «نۇرلى جول» باعدارلاماسىنىڭ نەگىزىندە سالىنعان. بۇل بالاباقشاعا 1 جاستان 6 جاسقا دەيىنگى بالالار قابىلدانادى. 16 توپقا ساباق قازاق جانە ورىس تىلدەرىندە جۇرگىزىلەدى. سونىمەن قوسا اعىلشىن ءتىلى دە وقىتىلادى. مۇندا تىلىندە مۇكىسى بار بالالارمەن قاتار، ءجيى اۋىراتىن، دەنساۋلىعى ءالسىز بالالارعا دا توپتار قاراستىرىلعان. مۋزىكا جانە گيمناستيكا زالدارى جۇمىس ىستەيدى. سونىمەن قاتار ويىن زالى، جاتىن بولمە، مەديسينالىق كابينەت، پسيحولوگ، لوگوپەد بولمەلەرى مەن فيزيوتەراپيا كابينەتى دە قاراستىرىلعان. بارلىعى دا سوڭعى ۇلگىدەگى زاماناۋي قۇرىلعىلارمەن جابدىقتالعان. جاڭادان اشىلعان وسى بالاباقشانى ەسەپكە العاندا، بۇگىندە قاراتال اۋدانى بالالاردى مەكتەپكە دەيىنگى مەكەمەلەرمەن قامتۋ دەڭگەيى 92%-عا جەتىپ وتىر.
ا. باتالوۆ مىرزا ءوز قۇتتىقتاۋ سوزىندە بيىلعى جىلى وبلىستا 97 بالاباقشا ىسكە قوسىلعانىن اتاپ ءوتتى. ونىڭ 88ء-ى – جەكەمەنشىك بالاباقشالار. تاۋەلسىزدىك جىلدارى وبلىستاعى مەكتەپكە دەيىنگى مەكەمەلەر 47 بولسا، بۇگىندە ولاردىڭ سانى 903-كە جەتكەن. ياعني، 3،1%-دان 87%-عا دەيىن ارتىپ وتىر.
سالتاناتتى شارا بارىسىندا «TOLAGAI–2050» جاۋاپكەرشىلىگى شەكتەۋلى سەرىكتەستىگىنىڭ باس ينجەنەرى عالىمجان تەلەميسوۆ بالاباقشانىڭ مەڭگەرۋشىسى ماحاببات نارەنبايەۆاعا جاڭا عيماراتتىڭ كىلتىن تابىستادى. شارا سوڭىندا وبلىس اكىمى بالاباقشا عيماراتىن ارالاپ، توپتاردىڭ جۇمىسىمەن تانىستى. بۇلدىرشىندەردىڭ ازىرلەگەن مەرەكەلىك كونسەرتتەرىن تاماشالاپ، ولارعا سىيلىق تارتۋ ەتتى.
جەرگىلىكتى تۇرعىندار دا يگى شارادان قالىس قالماي، قۋانىشتارىن ءبولىسىپ جاتتى. ءۇشارال قالاسىنىڭ تۇرعىنى، زەينەتكەر باعيلا تولەگەنوۆا دا ءوزىنىڭ نەمەرەسىن وسىندا اكەلگەنىنە ريزا ەكەنىن جەتكىزدى.
جاڭا گەس
وبلىس اكىمى ا. باتالوۆ تاۋەلسىزدىكتىڭ 25 جىلدىعىنا وراي ىسكە قوسىلعان سارقان اۋدانىنىڭ لەپسى وزەنىندە سالىنعان قۋاتتىلىعى 17 مۆت بولاتىن شاعىن گەس-تىڭ اشىلۋىنا دا قاتىستى.
وسى گەس-تى ىسكە قوسۋدىڭ ناتيجەسىندە وڭىردەگى ەلەكتر ەنەرگياسىنىڭ دەفيسيتى ساعاتىنا 68 ملن كۆت-قا ازايدى. بۇل وتە ماڭىزدى جەتىستىك، دەگەنمەن مەجە ەمەس. قازىرگى كەزدە قورا وزەنىندە قۋاتتىلىعى 26-دان 29 مۆت-قا دەيىنگى تاعى 3 گەس-تىڭ قۇرىلىسى ءجۇرىپ جاتىر. وعان قوسا تاعى بىرنەشە نىساننىڭ قۇرىلىسى جوسپارلانعان. مۇنىڭ بارلىعى ءوزىمىز وندىرەتىن ەلەكتر ەنەرگياسىنىڭ تاپشىلىعىن ازايتىپ، وبلىستىڭ ەلەكتر قۋاتى ءۇشىن سىرتقا تاۋەلدى بولماۋىنا جانە جاڭارتىلعان ەنەرگيا كوزدەرىن دامىتۋعا ىقپال ەتپەك. سونىمەن قاتار كومپانيالار جوسپارلاپ، سالعان گەس-تەر «ەكسپو-2017» كورمەسىندەگى «قازاقستان» پاۆيلونىنان كورنەكتى ورىن الاتىن بولادى، – دەدى ا. باتالوۆ قۇتتىقتاۋ ءسوزىنىڭ سوڭىندا.
سارقان اۋدانى لەپسى وزەنىنە سالىنعان شاعىن گەس-2 جىلىنا 67،78 ملن كۆت/ساع ەلەكتر ەنەرگياسىن وندىرە الادى. قۇرىلىس جۇمىستارى 2014 جىلدىڭ تامىز ايىندا باستالىپ، جالپى 4،2 ملرد تەڭگە جۇمسالعان. جوبانىڭ اۆتورى جانە باس مەردىگەرى – «اسپمك-519» ج ش س حولدينگى. گەس-2 17 ادامدى جۇمىسپەن قامتىپ وتىر. بۇگىندە الماتى وبلىسى قازاقستانداعى تاۋ سۋلارى گيدروەنەرگەتيكالىق قورىنىڭ 65%-ىن يەلەنىپ وتىر.
تۇڭعىش پرەزيدەنتتىڭ جاڭا ءمۇسىنى
قازاقستان رەسپۋبليكاسى تاۋەلسىزدىگىنىڭ 25 جىلدىعىنا وراي ىسكە اسىرىلعان شارالاردىڭ ىشىندە تۇڭعىش پرەزيدەنت نۇرسۇلتان ءابىش ۇلى نازاربايەۆقا ارنالعان ءمۇسىننىڭ اشىلۋى دا بار. پرەزيدەنت ءمۇسىنىن ورناتۋ تۋرالى باستامانى جەتىسۋلىق ارداگەرلەر كوتەرىپ، وبلىستىق ءماسليحات دەپۋتاتتارىنىڭ قولداۋىنا يە بولعان ەدى. ەلباسى ءمۇسىنى تالدىقورعاننىڭ ورتالىق الاڭىنداعى قازاقستان رەسپۋبليكاسى تۇڭعىش پرەزيدەنتىنىڭ سكۆەرىنە ورناتىلدى.
ءمۇسىن اۆتورلارى: ق ر قۇرمەتتى ساۋلەتشىسى، «قۇرمەت» وردەنىنىڭ كاۆالەرى، 40-تان استام ەسكەرتكىشتىڭ اۆتورى قازبەك جارىلعاپوۆ پەن تانىمال ءمۇسىنشى، سۋرەتشىلەر وداعىنىڭ مۇشەسى، 20-دان استام ەسكەرتكىشتىڭ اۆتورى ميرلان ازماعانبەتوۆ.
ەلباسى ءمۇسىنىنىڭ بيىكتىگى 4،2 مەتردى، ال تۇعىرىنىڭ بيىكتىگى 4،5 مەتردى قۇرايدى.
ءمۇسىننىڭ اشىلۋ سالتاناتىنا وبىلىس اكىمى ا.باتالوۆ، عارىشكەر ا.ايىمبەتوۆ، الماتى وبلىسىنىڭ قۇرمەتتى ازاماتى، ارداگەر ن.قىلىشبايەۆ ت.ب. قوناقتار مەن قالا تۇرعىندارى قاتىستى. شارا سوڭى مەرەكەلىك كونسەرتكە ۇلاستى.
كاسىپكەرلەردىڭ تارتۋى
تالدىقورعان قالاسى بۇگىندە ەكونوميكالىق الەۋەتى كۇن سايىن ارتىپ، كوركىنە كورىك قوسىپ كەلە جاتقانى داۋسىز. سونىمەن قاتار مەملەكەتتىك ماڭىزى بار ءوندىرىس ورىندارىنىڭ وشاعىنا اينالىپ كەلەدى. تۋريزم سالاسى دا دامۋ ۇستىندە. وسىنداي ەرەكشەلىكتەرىمەن قاتار، استانادا وتەتىن «ەكسپو-2017» حالىقارالىق كورمەسىنىڭ وتۋىنە بايلانىستى قولايلى جاعداي قاراستىرىلعان جوعارى دەڭگەيدەگى قوناق ۇيلەرگە دەگەن سۇرانىس ارتىپ وتىر. وسى قاجەتتىلىككە وراي تالدىقورعان قالاسىندا جەكە ينۆەستيسيا نەگىزىندە «كوكتەم گراند» قوناق ءۇي كەشەنى بوي كوتەردى. قوناق ءۇي قالاداعى زاماناۋي، سوڭعى ۇلگىدەگى، جوعارى كلاستى كەشەن بولىپ سانالادى. قوناق ءۇي كەشەنىندە ءماجىلىس زالى، مەيرامحانا كەشەنى مەن سالتانات زالى، باسسەينى بار فيتنەس ورتالىق، ترەناجەرلىق جانە قوناق زالدار بار. قوناق ءۇي تالدىقورعان قالاسىنىڭ وڭتۇستىك-باتىس اۋدانىندا 2،16 گا جەردى الىپ جاتىر. جالپى اۋدانى 12200 شارشى مەتر.
قوناق ءۇيدىڭ اشىلۋىنا وبلىس اكىمى اماندىق باتالوۆ، عيماراتتىڭ ىسكە قوسىلۋىنا ۇلەس قوسقان كاسىپكەر مۇرات ءادىلحانوۆ، ت.ب. قوناقتار قاتىستى.
وبلىس اكىمى ا. باتالوۆ: «تۋريستىك سالا وڭىردەگى ەڭ ماڭىزدى سالاعا اينالىپ كەلەدى. سوندىقتان وبلىس ورتالىعى تالدىقورعان قالاسىن كوركەيتە ءتۇسۋ – ءبىزدىڭ باستى ماقساتىمىز. «كوكتەم گراند» قوناق ءۇي كەشەنى جەكە ينۆەستيسياعا سالىنعان، ورتاق ىسكە ءوز ۇلەسىن قوسىپ، تالدىقورعاننىڭ تارتىمدى قالا بولۋىنا اتسالىسادى دەپ سەنەمىن»، – دەدى ءوز سوزىندە.
بۇگىنگى كۇندە تالدىقورعان قالاسىندا 14796 شاعىن-ورتا بيزنەس ورتالىقتارى تىركەلىپ، 25 مىڭعا جۋىق ادام جۇمىسپەن قامتاماسىز ەتىلگەن. اتالعان كاسىپورىنداردان 35536 ملن تەڭگە ءونىم ءوندىرىلىپ، قىزمەت كورسەتىلگەن. بيۋدجەتكە تولەنەتىن سالىقتار كولەمى 5،5 دلرد تەڭگەنى قۇرايدى.
نۇرسەرىك تىلەۋقابىل،
"قمد"
