جەتىسۋ وبلىسىندا الداعى ۋاقىتتا جوم وڭدەيتىن زاۋىت سالىنۋى مۇمكىن. ءبىرقاتار قىتايلىق كومپانيا وكىلدەرى وبلىس باسشىلىعىنا وسىنداي ۇسىنىس ءبىلدىردى. الەۋەتتى ينۆەستورلارمەن وبلىس اكىمىنىڭ ورىنباسارى اسەت قاناعاتوۆ كەزدەستى،– دەپ حابارلايدى Dalanews.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
باسقوسۋدا جوبالارىن تانىستىرعان ينۆەستورلار ايماقتا قانت قىزىلشاسىنىڭ جومىنان مال ازىعىن شىعاراتىن زاۋىت اشقىسى كەلەتىنىن جەتكىزدى. ەگەر كاسىپورىن سالىنسا، وندا ول وندىرگەن جوعارى ساپالى ونىمدەر جەرگىلىكتى نارىقتا ساتىلىپ، ەكسپورتقا دا شاعىراتىلاتىن بولادى. ايماقتاعى ەكى قانت زاۋىتىمەن ىنتىماقتاستىق ارتۋدى كوزدەيتىن جوباعا 10 ميلليون اقش دوللارى كولەمىندە ينۆەستيسيا تارتۋ جوسپارلانىپ وتىر. ينۆەستور-كومپانيالاردىڭ ايتۋىنشا، كاسىپورىندا جۇمىستىڭ باسىم بولىگى اۆتوماتتاندىرىلادى. ەڭ باستىسى ەكولوگيالىق تازا ءونىم شىعارىلىپ، 30-40 ادام جۇمىسپەن قامتىماق. جوبا ءساتتى جۇزەگە اسۋ ءۇشىن اقسۋ قانت زاۋىتىنان الاتىن شيكىزاتتى كەپتىرەتىن الاڭ سالىپ، كوكسۋ قانت زاۋىتىمەن ىسكەرلىك بايلانىس ورناتۋ قاجەت. كاسىپكەرلەر بۇدان بولەك، الداعى ۋاقىتتا جۇگەرى مەن جوڭىشقا وڭدەپ، مال ازىعىن ءوندىرۋ دە جوسپاردا بارىن جەتكىزدى.
– الەۋەتتى ينۆەستورلارمەن ءبىز «قادام-قاداممەن» ءپرينسيپى بويىنشا جۇمىس ىستەيمىز. وزدەرىڭىزبەن بۇگىنگى كەزدەسۋىمىز – العاشقى ماڭىزدى قادامنىڭ ءبىرى. جەتىسۋ اگرارلى ايماق بولعاندىقتان، ءبىز اۋىل شارۋاشىلىعى ونىمدەرىن تەرەڭ وڭدەۋگە قاتىستى جوبالارعا ەرەكشە قىزىعۋشىلىق تانىتامىز. ءوڭىرىمىز ءۇشىن قانت قىزىلشاسى باسىم داقىل ەكەنى بەلگىلى. بيىل 550 مىڭ توننا ءتاتتى ءتۇبىر الامىز دەپ جوسپارلاپ وتىرمىز. ەگەر قانت قىزىلشاسى ءونىمىن جيناعانشا بارلىق ماسەلەنى بىرلەسىپ شەشسەك، قالدىقسىز ءوندىرىس ورنىن اشامىز. ءبىز ماڭىزدى ينۆەستيسيالىق جوبانى جۇزەگە اسىرۋدا زاڭعا سايكەس ءوز تاراپىمىزدان ءتيىستى قولداۋ كورسەتەمىز. سىزدەردەن ناقتى مەرزىمدەرى، ءوندىرىس كولەمى كورسەتىلگەن جانە بارلىق قاجەتتى قۇجاتتامالارى بار ەگجەي-تەگجەيلى جوبا كۇتەمىز، – دەدى ءا.قاناعاتوۆ.
كەزدەسۋدى قورىتىندىلاي كەلە، قوس تاراپ جاڭا كاسىپورىندى لوگيستيكا جاعىنان قولايلى، بارلىق ينفراقۇرىلىممەن قامتاماسىز ەتىلگەن «تالدىقورعان» يندۋستريالدى ايماعىنىڭ اۋماعىندا سالۋ مۇمكىندىگىن قاراستىرۋعا كەلىستى.
