قوس مەيرامعا وبلىس اكىمى جانسەيىت تۇيمەبايەۆ قاتىسىپ، جەمىستەر پەراميداسىن تاماشالاپ، ءسۇت، نان ونىمدەرى جانە اۋىلدىق وكرۋگتەردىڭ اۋىل شارۋاشىلىق ونىمدەرىنىڭ كورمەسىن ارالاپ كوردى. "التىن كۇز - 2018" مەرەكەسى بارىسىندا «بۇقا»، «لاڭگى»، «ايىر اعاشپەن دالدەۋ»، «كوڭىلدى ستارت» سىندى سپورتتىق سايىستار ۇيىمداستىرىلىپ، قوناقتار باۋىرساقتان جاسالعان پيراميدادان ءدام تاتتى.
"جەتىسايلىقتاردىڭ بيىلعى تويى جىلداعىدان ەرەكشە. تۇركىستان وبلىسى، ونىڭ ىشىندە جەتىساي اۋدانى نەگىزىنەن اۋىلشارۋاشىلىق باعىتىنداعى سالالاردىڭ بارلىعىن قاتار الىپ كەلە جاتقان، سونىڭ ارقاسىندا دامىپ، تىرشىلىگىنىڭ بەرەكەسىن كەلتىرىپ وتىرعان ايماق. سوندىقتان اگرارلىق سەكتورداعى جەتىستىكتەرىمىزدى بارشا وبلىس ەڭبەككەرلەرىنىڭ ورتاق جەڭىسى دەپ باعالايمىز. اۋداننىڭ تابيعاتى باقشا ونىمدەرىن دامىتۋعا وتە قولايلى. جالپى بيىل جەتىساي اۋدانىندا 839 گەكتارعا قىرىققابات ەگىلسە، ودان 30701،2 توننا ءونىم الىنعان. ونىڭ 80 پايىزى شەتەلگە ەكسپورتتالعان"، - دەدى جانسەيىت قانسەيىت ۇلى.
جەتىساي اۋدانىندا اۋىل شارۋاشىلىعى داقىلدارىنىڭ جالپى ەگىس كولەمى 78 مىڭ گەكتاردى قۇرايدى. سونىڭ بيىل 48 262 گەكتارىنا اق التىن ءدانى سەبىلسە، اۋدان تاۋاروندىرۋشىلەرى وسى جىلى ماقتانىڭ ءار گەكتارىنان 25،2 سەنتنەردەن ءونىم جيناپ، وبلىستا ەڭ جوعارى كورسەتكىشتەردىڭ بىرىنە قول جەتكىزدى.
اۋداندا وسى جىلى 15019،2 گەكتارعا باقشا ونىمدەرى وتىرعىزىلعان. ال، ودان الىنعان ءونىمنىڭ جالپى كولەمى 426159 تونناعا جەتتى. ماسەلەن، 8621،7 گەكتارعا قاۋىن، 6397 گەكتارعا قاربىز ەگىلسە، ونىڭ 30 پايىزى شەتەلگە ەكسپورتتالدى. بۇل دا بولسا، ۇلكەن كورسەتكىش.بۇدان بولەك، جەتىساي ولكەسىندە مايلى داقىلدار، كوكونىستەر تولىعىمەن جينالىپ الىندى.
