Qos meiramǵa oblys ákimi Janseiit Túimebaev qatysyp, jemister peramidasyn tamashalap, sút, nan ónimderi jáne aýyldyq okrýgterdiń aýyl sharýashylyq ónimderiniń kórmesin aralap kórdi. "Altyn kúz - 2018" merekesi barysynda «Buqa», «Láńgi», «Aiyr aǵashpen dáldeý», «Kóńildi start» syndy sporttyq saiystar uiymdastyrylyp, qonaqtar baýyrsaqtan jasalǵan piramidadan dám tatty.
"Jetisailyqtardyń biylǵy toiy jyldaǵydan erekshe. Túrkistan oblysy, onyń ishinde Jetisai aýdany negizinen aýylsharýashylyq baǵytyndaǵy salalardyń barlyǵyn qatar alyp kele jatqan, sonyń arqasynda damyp, tirshiliginiń berekesin keltirip otyrǵan aimaq. Sondyqtan agrarlyq sektordaǵy jetistikterimizdi barsha oblys eńbekkerleriniń ortaq jeńisi dep baǵalaimyz. Aýdannyń tabiǵaty baqsha ónimderin damytýǵa óte qolaily. Jalpy biyl Jetisai aýdanynda 839 gektarǵa qyryqqabat egilse, odan 30701,2 tonna ónim alynǵan. Onyń 80 paiyzy shetelge eksporttalǵan", - dedi Janseiit Qanseiituly.
Jetisai aýdanynda aýyl sharýashylyǵy daqyldarynyń jalpy egis kólemi 78 myń gektardy quraidy. Sonyń biyl 48 262 gektaryna aq altyn dáni sebilse, aýdan taýaróndirýshileri osy jyly maqtanyń ár gektarynan 25,2 tsentnerden ónim jinap, oblysta eń joǵary kórsetkishterdiń birine qol jetkizdi.
Aýdanda osy jyly 15019,2 gektarǵa baqsha ónimderi otyrǵyzylǵan. Al, odan alynǵan ónimniń jalpy kólemi 426159 tonnaǵa jetti. Máselen, 8621,7 gektarǵa qaýyn, 6397 gektarǵa qarbyz egilse, onyń 30 paiyzy shetelge eksporttaldy. Bul da bolsa, úlken kórsetkish.Budan bólek, Jetisai ólkesinde maily daqyldar, kókónister tolyǵymen jinalyp alyndy.
