Búgin jáne erteń Ulan aýdanynyń Bozanbai aýylyndaǵy «Búrkittóbe» etnoaýmaǵynda qazaqtyń dástúrli qusbegilik ónerin dáripteitin «Shyǵys salbýryny – 2026» I Aziia kýbogi ótedi. Halyqaralyq dodaǵa toǵyz eldiń qusbegileri qatysyp, ulttyq ónerdiń ozyq úlgilerin pash etpek, dep habarlaidy dalanews.kz.
8-10 qazanǵa josparlanǵan shara aiasynda búrkit, qarshyǵa, suńqar jáne itelgi baptaǵan qusbegiler ózara baq synaidy. Baǵdarlamada qyran qustardyń jarystary, irikteý kezeńderi, jartylai final men aqtyq básekeler qarastyrylǵan.
Búgin, 9 qazanda jarystyń saltanatty ashylýy ótip, qusbegilerdiń sporttyq kiimi men jabdyqtary, qustardyń kúii men erekshelikteri baǵalanady. Sondai-aq qyran qustardy qolǵa shaqyrý jáne búrkitti shyńǵaǵa salý boiynsha irikteý saiystary uiymdastyrylady. Kúnniń ekinshi jartysynda jartylai finaldyq básekeler ótedi.
Erteń, 10 qazanda jarystyń sheshýshi kezeńderimen qatar qazaqtyń ulttyq oiyndary da kópshilik nazaryna usynylady. Atap aitqanda, tazy júgirtý, asaý úiretý, jamby atý, teńge ilý, arqan tartys jáne taiaq tartys boiynsha saiystar ótedi. Kún qorytyndysynda jeńimpazdar marapattalyp, festivaldiń saltanatty jabylý rásimi uiymdastyrylady.
Merekelik baǵdarlamanyń mańyzdy bóligi – óner juldyzdarynyń qatysýymen ótetin kontsert. 10 qazan kúni saǵat 13:00-de bastalatyn kontsertte Joshy Qazaq National Group, Turar Ydyrys jáne Qazybek Ádikei Nyǵymetbek óner kórsetedi.
Festivalge qalai jetýge bolady?
10 qazan kúni Óskemennen Bozanbai aýylyna arnaiy avtobýstar qatynaidy.
Birinshi baǵyt Óskemen temirjol vokzalynan bastalyp, Turmys úii, Avtobasqarma, Fresh-market jáne Sátbaev dańǵyly arqyly ótedi.
Ekinshi baǵyt Sport saraiynan bastalyp, Áýezov kóshesi, Ózen vokzaly, Fresh-market jáne Sátbaev dańǵyly arqyly Bozanbaiǵa jetedi.
Avtobýstardyń júrý ýaqyty – 08:00 jáne 09:30. Keri reister saǵat 16:00-17:00 aralyǵynda uiymdastyrylady. Jol aqysy – 1 000 teńge.
«Shyǵys salbýryny – 2026» – ulttyq dástúr men sportty, mádeniet pen ónerdi toǵystyrǵan halyqaralyq mereke. Barsha shyǵysqazaqstandyqtar men óńir qonaqtaryn Bozanbaiǵa kelip, qyran qustardyń saiysyn tamashalaýǵa jáne merekelik kontsertke qatysýǵa shaqyramyz.
