KNUS oqý ornynyń quryltaishysy Nurasyl Medeý ýniversitet ǵimaratynyń mártebesi, menshik qurylymy jáne memleketpen áriptestik formattary týraly aityp berdi, dep habarlaidy Dalanews.kz
Spikerdiń aitýynsha, ýniversitet ornalasqan ǵimarat tolyqtai memleket menshiginde jáne biýdjet qarajaty esebinen salynǵan. Al KNÝS zańdy tulǵasy bul nysanda senimgerlik basqarý sharty negizinde operator retinde jumys isteidi.
«Biz ǵimaratty basqarý boiynsha belgili bir mindettemelerdi qabyldadyq. Ony sapaly kontentpen toltyrý, barlyq qajetti jabdyqtardy jeke qarajat esebinen alý, myqty komanda jinaý jáne nysannyń sapasyn saqtap qalý jumystary tolyqtai bizdiń jaýapkershiligimizde», – dedi quryltaishy.
Menshik úlesi qalai bólingen?
Suhbat barysynda ýniversitettiń ielik qurylymyna da túsinikteme berildi. Qurylym boiynsha:
95% – jeke menshik úles;
5% – syiǵa tartý sharty negizinde «Qazsportinvestke» tegin berilgen memlekettik úles.
Nurasyl Medeý bul 5% úlesti satýǵa múmkindik bolǵanymen, maqsat onda emes ekenin atap ótti. Memlekettiń menshik qurylymyna qatysýy oqý ornynda ashyq ári aiqyn ortany qalyptastyrýǵa múmkindik beredi.
Memlekettik baqylaý jáne ashyqtyq
Memlekettik qurylymnyń qatysýy ýniversitetke belgili bir eseptilik mindettemelerin júkteidi. Bul retteýshi tarapqa atqarylyp jatqan jumystardy qadaǵalaýǵa jol ashady.
«Bul – memleket úshin de strategiialyq turǵydan óte tiimdi baǵyt. Biz barlyq jaýapkershilikti ózimizge alamyz, al memleket atqarylyp jatqan jumystar men sapaǵa baqylaý jasap otyrady», – dep túiindedi Nurasyl Medeý.
