– ساتتار كيەلى تۇركىستاندا تۋىپ، وسكەن. ءوزى جازعانداي، ونىڭ جوپىرەيگەن ءۇيى قالانىڭ شەت جاعىندا، تەمىرجولعا جاقىن ەكەن. كورشىسى جۇمىستان كەشكە قايتقاندا ءبىر بولكە نان الىپ كەلسە، ونىڭ ايەلى بالاسىنا: «ە، بالام، باعىڭ بار ەكەن، اكەڭ نان اكەلدى» دەيدى ەكەن. ساتتار: «باقىت دەگەن نان ەكەن دەپ ويلاۋشى ەدىم» دەيدى.
«لەنينشىل جاستىڭ» وتىزىنشى جىلدارداعى تىگىندىسى ساقتالسا، ءار نومىرىنەن دەرلىك ساتتار ەرۋبايەۆتىڭ قاينار پۋبليسيستيكاسى تابىلادى.
ءالى ەسىمدە، قازاقستان كومسومولى ورتالىق كوميتەتىنىڭ ءبىرىنشى حاتشىسى وزبەكالى جانىبەكوۆ بىزگە قىرشىن كەتكەن ساتتار ەرۋبايەۆتىڭ مولاسىن ىزدەپ تابۋعا تاپسىرما بەردى. ءبىر قارت كومسومولداردىڭ ايتۋىنشا، ساتتار الماتى قالاسىنداعى قازىرگى رايىمبەك كوشەسىنىڭ بويىنداعى زيراتتا جەرلەنگەن ەكەن. ءبىرىنشى حاتشىنىڭ تاپسىرما بەرۋ سەبەبى – وسى زيرات تاياۋدا تەگىستەلىپ، ورنىنا اۆتوستانسا سالىنباقشى بولعاندىقتان، ۇلتجاندى ازامات تەز ارادا ساتتاردىڭ مولاسى تاۋىپ، سۇيەگىن باسقا زيراتقا جەرلەپ، باسىنا بەلگى قويۋدى ويلاعان عوي.
وكىنىشكە وراي، قازاق ادەبيەتىنىڭ جايساڭ تۇلعاسى ساتتاردىڭ مولاسى تابىلمادى. بەلگى جوق. بىزگە كارت كومسومولدار كومەكتەسە المادى. ءسويتىپ، ساتتار اۆتوستانسا استىندا قالدى»
ءيا، وزەكتى ورتەيتىن وكىنىش. قىسقا عۇمىرىندا قاۋاتتى تۋىندىلار جازىپ، قىرشىن كەتكەن قالامگەردىڭ ايدىڭ كۇننىڭ امانىندا باسىن اعارتۋ وزەكتى ورتەيتىن وكىنىش ەكەنى انىق.
سول كەزدە كومسومالدىڭ حاتشىسى، كەيىننەن مادەنيەت ءمينيسترى بولعان وزبەكالى جانىبەكوۆتىڭ ساتتار ەرۋبايەۆتىڭ سۇيەگىن تاۋىپ، باسىنا بەلگى قويۋ ءۇشىن جانتالاسۋىن نەتكەن ازاماتتىق دەسەڭىزشى.
قازىرگى مينيسترلەر جانىبەكوۆتىڭ وسىنداي ىستەرىنەن ۇلگى السا قانەكي. بۇگىنگى مينيسترلەرىڭىز، ولگەن قالامگەرلەر تۇرماق كوزى ءتىرى كلاسسيك جازۋشىلاردى تانىمايتىنى ەسىڭىزگە تۇسكەندە، بيلىك باسىنداعى شەندىلەردىڭ تۋعنا ۇلتىنان قانشالىقتى الىستاپ كەتكەنىن بايقاۋعا بولادى.
ءدال ءقازىر بىزگە ۇلت مۇددەسى جولىندا جانىن سالىپ جۇمىس ىستەيتىن جانىبەكوۆتەي ازاماتتىڭ جەتىسپەيدى.
نۇرلان جۇماحان
