قۇرىلىس 2023 جىلدىڭ ماۋسىمىندا باستالدى جانە بۇگىندە ءبىرقاتار جۇمىستار اياقتالدى. مەكتەپتى 2024 جىلدىڭ سوڭىندا پايدالانۋعا بەرۋ جوسپارلانۋدا. جوبا بويىنشا 326 ورىندى زال، 4 سپورت زالى، باستاۋىش سىنىپ وقۋشىلارىنا ارنالعان 2 شاعىن سپورت زال قاراستىرىلدعان. باستاۋىش سىنىپ وقۋشىلارى ءۇشىن كىرۋ بولەك بولادى. قالا باسشىسى تۇراق ايماعى مەن اينالما جولداردى سالۋ ءۇشىن قوسىمشا جەرلەردى ساتىپ الۋ ماسەلەلەرىمەن شۇعىل تۇردە اينالىسۋدى تاپسىردى.
المالى اۋدانىنداعى وقۋشى ورىندارىنىڭ تاپشىلىعى جاعدايى سالىستىرمالى تۇردە جاقسى: وقۋشىلاردىڭ جالپى كونتينگەنتى 37 مىڭ وقۋشىعا شاققاندا ورىن تاپشىلىعى 1 مىڭنان ءسال اسادى. بۇگىندە اۋداندا 42 ءبىلىم بەرۋ ۇيىمى بار، ونىڭ ىشىندە 29 مەكتەپ مەملەكەتتىك جانە 13 – جەكەمەنشىك.
ەسكە سالساق، "جايلى مەكتەپ" ۇلتتىق جوباسىن قازاقستان ۇكىمەتى 2022 جىلى پرەزيدەنتتىڭ "ادىلەتتى مەملەكەت. ءبىرتۇتاس ۇلت. گۇلدەنگەن قوعام" اتتى جولداۋىن جۇزەگە اسىرۋ ءۇشىن قابىلداعان بولاتىن. جوبانىڭ باستى ماقساتى-اپاتتى نىسانداردى، ءۇش اۋىسىمدى وقىتۋدى جانە ورتا ءبىلىم بەرۋ ۇيىمدارىنداعى وقۋشى ورىندارىنىڭ تاپشىلىعىن جويۋ.
بۇعان دەيىن حابارلانعانداي، 2025 جىلعا قاراي الماتىدا 37 100 ورىندىق 22 جاڭا مەكتەپ پايدا بولادى.
اكىمدىكتىڭ جوبالىق كەڭسەسىنىڭ اقپاراتى بويىنشا، جاڭا فورماتتاعى مەكتەپتەردىڭ باسىم بولىگى الاتاۋ جانە ناۋرىزباي اۋداندارىندا سالىنادى – 5 وقۋ ورنى. بوستاندىق اۋدانىندا – 4 مەكتەپ، تۇركسىب اۋدانىندا – 3، اۋەزوۆ اۋدانىندا – 2 مەكتەپ، ال قالعان ءاۋدانداردا-بىر مەكتەپ سالۋ جوسپارلانۋدا. مەكتەپتەر ولاردىڭ تاپشىلىعى بايقالاتىن جەرلەردە سالىنۋدا.
جايلى مەكتەپتەردە بارلىق ءبىلىم الۋشىلار ءۇشىن قولايلى جاعداي جاسالادى، ونىڭ ىشىندە ەسىكتەردى اۆتوماتتى تۇردە بۇعاتتاۋمەن كىرۋ جانە شىعۋدى باقىلاۋ جۇيەسىن، Face ID جانە QR-كودتاردى ەنگىزۋ جوسپارلانۋدا.
وقۋ ورنىنىڭ اكىمشىلىگى ناقتى ۋاقىت رەجيمىندە بۇكىل عيمارات پەن مەكتەپ اۋماعىنداعى جاعدايدى قاداعالاپ وتىرۋ ءۇشىن مىندەتتى تۇردە بەينەباقىلاۋ جۇرگىزىلەدى.
اۋىر ريۋكزاكتار ماسەلەسىن شەشۋ ءۇشىن مەكتەپتەردە وقۋلىقتاردى ساقتاۋعا ارنالعان بولەك شكافتار ورناتىلادى. سونداي-اق، جوبالاردا ليفتتەر، ەلەكتروندى كىتاپحانالار جانە حوككەي كورتى قاراستىرىلادى. ءار قاباتتا دۇرىس دەمالۋ ءۇشىن كوۆوركينگ-ايماقتار جانە اۋىز سۋ بۇرقاقتارى ورناتىلادى.
