تۇركىستان وبلىسى اكىمىنىڭ ورىنباسارى بەيسەنباي تاجىبايەۆتىڭ توراعالىعىمەن جيىن ءوتتى. وندا ءبىرقاتار سالانىڭ وزەكتى ماسەلەلەرى تالقىلاندى. جاستار، ۇلتارالىق قاتىناس، ءبىلىم بەرۋ جانە وزگە دە سالالارداعى تۇيتكىلدەر تارقاتىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ماجىلىسكە قۇقىق قورعاۋ ورگاندارىنىڭ وكىلدەرى، جاۋاپتى باسقارما باسشىلارى، اۋدان، قالا اكىمدەرىنىڭ ورىنباسارلارى قاتىستى.
– قوعامدا ادىلدىكتى، ەڭبەكتى دارىپتەۋ، جاستارعا قولداۋ كورسەتۋ ماڭىزدى. وكىنىشكە قاراي، قازىرگى كەزدە بالالاردى وتىرىك تىركەپ، جالعان مالىمەت بەرىپ جاتقان بالاباقشالار انىقتالدى.
جۇرگىزىلگەن مونيتورينگ ناتيجەسى سولاي كورسەتىپ وتىر. بۇدان بولەك، تەكسەرىلمەگەن، جالعان اقپارات تاراتاتىندار بار. اقپاراتتاندىرۋ سالاسىنداعى بەلسەندىلىكتى ارتتىرعان ءجون. جۇمىس كۇشى دە جەتىسپەيدى.
قازىرگى ۋاقىتتا وبلىستا 200-دەن استام نىساندا قۇرىلىس جۇمىستارى جۇرگىزىلىپ جاتىر. سولارعا جۇمىسسىز ازاماتتاردى تارتىڭىزدار. «جاستار پراكتيكاسى» بار، «سەرپىن» باعدارلاماسىمەن وقۋ، اسكەرگە شاقىرۋ جۇمىستارى تۋرالى ءتۇسىندىرۋ جۇمىستارىن جۇرگىزىڭىزدەر.
سونداي-اق NEET ساناتىنداعى جاستاردى كوللەدجگە وقىتۋ ماسەلەسى دە وزەكتى. بيىل جاڭا وقۋ جىلىنا 15500 ورىنعا مەملەكەتتىك تاپسىرىس بەرىپ وتىرمىز. جاستار گرانتتا وقي الادى. وسى باعىتتا دا جۇمىستى قولعا الىڭىزدار، – دەگەن وبلىس اكىمىنىڭ ورىنباسارى ناقتى جۇمىس جوسپارىن ۇسىنۋدى تاپسىردى.
كۇن تارتىبىندە ءبىرقاتار ماسەلەلەر قارالدى. وبلىستىق قوعامدىق دامۋ باسقارماسىنىڭ باسشىسى ەرلان كۇزەمبايەۆ وبلىستاعى قوعامدىق-ساياسي احۋال مەن ەتنوسارالىق بىرلىكتى نىعايتۋ، ءبىر يدەيا توڭىرەگىنە توپتاستىرۋ بويىنشا اتقارىلىپ جاتقان جۇمىستار تۋرالى باياندادى.
سودان سوڭ ارىس قالاسى اكىمىنىڭ ورىنباسارى الماز سۇلتانوۆ، تۇلكىباس اۋدانى اكىمىنىڭ ورىنباسارى ەربول ورمانوۆ، سارىاعاش اۋدانى اكىمىنىڭ ورىنباسارى الديار قوزىبايەۆ اۋدان، قالاداعى احۋالدار تۋرالى اتاپ ءوتتى.
جيىن بارىسىندا ءتۇرلى ۇسىنىستار ايتىلىپ، سۇراقتار قويىلدى. ماسەلەلەر ورتاعا سالىنىپ، ناقتى شەشىمدەر قابىلاندى. ءقاۋىپتى ورىندارعا باقىلاۋ كامەراسىن ورناتۋ جانە جازعى ساۋىقتىرۋ لاگەرلەرىندە وقۋشىلارعا ەكولوگيالىق ساۋاتتى كوتەرۋ، قورشاعان ورتانى قورعاۋ، تازالاۋ جولدارىن ۇيرەتۋ جۇمىستارىن ۇيىمداستىرۋ جوسپارلانىپ وتىر.
