قانداي داعدارىس بولسا دا قازاقستان ەكونوميكالىق تۇرعىدان شەتەلدىك ينۆەستورلار الدىندا تارتىمدىلىعىن جوعالتقان ەمەس. ءبىزدىڭ بۇل سوزىمىزگە اعاشتان زاماناۋي ءۇي سالۋعا ماماندانعان فينليانديانىڭ HONKA كومپانياسى ەلىمىزدەگى جۇمىسىن جانداندىرۋعا كۇش سالعانى ايقىن دالەل بولا الادى. كۇنى كەشە عانا HONKA كومپانياسىنىڭ فينليانديا مەن رەسەيدەگى وكىلدىكتەرىنىڭ باسشىلارى الماتىدا باس قوسىپ، قازاقستانداعى جۇمىسىن جانداندىرۋعا بەكىنگەندەرىن رەسمي تۇردە مالىمدەدى. كوركىمەن كوز تارتقان اعاشتان سالىنعان اسەم ۇيگە قىزىققان قاۋىم ەندى اتالمىش كومپانيانىڭ قىزمەتىنە جۇگىنە الادى.
جارتى عاسىر بۇرىن قۇرىلعان HONKA كومپانياسى بۇعان دەيىن دە ەلىمىزدىڭ نارىعىندا ماسكەۋدەگى وكىلدەرىنىڭ نۇسقاۋىمەن جۇمىس ىستەگەن بولاتىن. ەندى فيندەردىڭ بەتكە ۇستار كومپانياسى الماتىدا كەڭسەسىن اشىپ، قازاقستانداعى جۇمىسىن كەڭەيتۋگە مۇددەلى بولىپ وتىر. ەلىمىزدە HONKA-نىڭ العاشقى اعاش ۇيلەرى 1990 جىلدارى پايدا بولعان ەدى. ءقازىر كونسەرن قازاقستان نارىعىنا كەشەندى ۇسىنىسپەن جانە تولىق اۋقىمدى جوبالاردى جۇزەگە اسىرۋعا نيەتتى.
ەندىگى جەردە قازاقستاندىقتار الەمدىك كونسەرن ۇسىنعان بارلىق مۇمكىندىكتەرىن پايدالانا وتىرىپ، زاماناۋي ارحيتەكتۋرالىق جوبالارمەن ايشىقتالعان ءساندى ۇيلەرگە قولجەتكىزەتىن بولدى.
جۋرناليستەر الدىندا وزدەرىنىڭ العا قويعان ماقساتتارى جايىندا بايانداعان ماسكەۋدەگى كومپانيا وكىلدىگىنىڭ ديرەكتورى الەكساندر لۆوۆسكيي مىرزاعا تىلشىلەر قاۋىمى «ءقازىر دۇنيەجۇزى داعدارىستىڭ قىسپاعىندا قالىپ وتىر. وسىنداي قيىن كەزەڭدە قازاقستانداعى جۇمىستارىڭىزدى كەڭەيتۋگە قالايشا تاۋەكەل ەتىپ وتىرسىزدار؟» دەپ سۇرادى. ءوز كەزەگىندە كومپانيا باسشىسى:
– راس ايتاسىز. ءقازىر داعدارىس قاي ەلگە بولسا دا وڭاي ءتيىپ وتىرعان جوق. ءبىراق ءبىزدىڭ كومپانيانىڭ جۇمىسى جالپى نارىققا باعىنبايدى. HONKA كونسەرنى ءىرى بانكتەر، الپاۋىت كومپانيالارمەن ەشقانداي بايلانىسى جوق. ءبىز جايلى ءومىر ءسۇرۋدى قالايتىن قوعامنىڭ ءسۇت بەتىندەگى قايماقتارىنا ارناپ، جانعا جايلى ءۇي سالۋعا ماماندانعانبىز. سوندىقتان داعدارىس كومپانيا جۇمىسىنا كەدەرگى بولا المايدى. ءقازىر قازاقستاندا جايلى اعاش ۇيلەرگە قىزىعۋشىلىق تانىتىپ وتىرعان قالتاسى قالىڭ ازاماتتار بار. ءبىز سولارعا ءوز قىزمەتىمىزدى ۇسىناتىن بولامىز، – دەدى الەكساندر لۆوۆسكيي.
جيىن بارىسىندا HONKA كومپانياسى ءقازىر دۇنيەجۇزىندە جىل سايىن 3 مىڭنان استام ءۇي سالاتىندارىن العا تارتتى. ولار وزدەرى سالعان اعاش ۇيلەردى ماريان ارالدارىندا كەزدەستىرۋگە بولاتىنىن ايتتى. كومپانيا كليەنتتەرى اراسىندا كوپتەگەن اتاقتى ادامدار، سونىڭ ىشىندە ۇلىبريتانيا پاتشايىمى ەليزاۆەتا II بار ەكەن.
فين كونسەرنى ۇيلەرىن 100 پايىزدىق قاراعايدان سالاتىنىن العا تارتتى. كومپانيا اعاش دايىنداۋدىڭ جانە اعاش وڭدەۋدىڭ جوعارى ساپاسىن قامتاماسىز ەتەدى. قۇرىلىسشىلار اعاش ءۇيدىڭ بولشەكتەرىن جاساۋ كەزىندە فورمالدەگيدسىز جەلىم قولداناتىنىن دا ايتتى.
HONKA كومپانياسىمەن دايىندالعان قۇرىلىس ماتەريالدارى ەكولوگيالىعىمەن ەرەكشەلەنەدى جانە اللەرگيا، استمادان ازاپ شەگەتىن ادامدارعا قولايلى. اعاش ۇيلەردىڭ بارلىق بولشەكتەرى (90 پايىزى) فينليانديانىڭ كارستۋلا قالاسىنداعى زاۋىتتا دايىندالادى ەكەن.
ونىمدەرىنىڭ 60 پايىزدان استامىن سىرت ەلدەرگە شىعارىپ، مول تابىس تاۋىپ وتىرعان كومپانيانىڭ ۇيلەرى ءزىلزالاعا شىدامدىلىعىمەن دە جۇرتتىڭ نازارىن اۋدارۋدا. ءوز كەزەگىندە جۋرناليستەر «شىعىس قازاقستاننىڭ تاۋلى ايماعىنداعى قاراعايلاردان قۇرىلىس ماتەريالدارىن سالۋ ويدا بار ما؟» دەگەن سۇراعىنا كومپانيا قىزمەتكەرى گەورگيي سيدەلنيكوۆ قازاقستاندا اعاش ۇيگە قاجەتتى قۇرىلىس ماتەريالدارىن وندىرەتىن ءوندىرىس سالاتىن ويلارى جوق ەكەنىن اشىپ ايتتى. ول اعاش ءۇيدى سالۋعا فينليانديانىڭ سولتۇستىگىندەگى قاراعايلى ورمانداردىڭ اعاشتارى تاپتىرمايتىنىن العا تارتتى.
وتاندىق نارىقتا جۇمىس ىستەۋگە اڭسارى اۋعان فين كونسەرنى بولاشاقتا قازاقستاندىق ديزاينەرلەرمەن بىرلەسىپ، كيىز ۇيگە ۇقسايتىن زاماناۋي اعاش ۇيلەر سالۋ ويلارىندا بار ەكەنىن دە ايتىپ قالدى. ول ءۇشىن كومپانيا قىزمەتكەرلەرىنە ۇلتتىق ناقىشتا ءۇي سالۋعا تاپسىرىس بەرسەڭىز بولعانى.
جيىن سوڭىندا كومپانيا باسشىلارى الداعى ۋاقىتتا الماتىدا اعاش ۇيلەردىڭ كوتتەدجدەر قالاشىعىن سالۋعا نيەتتەنىپ وتىرعاندارىن دا تىلگە تيەك ەتتى. سونداي-اق، ولار الماتى، استانا، شىعىس جانە باتىس قازاقستاندا جۇمىس ىستەۋگە كۇش سالىپ جاتقاندارىن دا العا تارتتى.
ن.اۋباكىر.
