Qandai daǵdarys bolsa da Qazaqstan ekonomikalyq turǵydan sheteldik investorlar aldynda tartymdylyǵyn joǵaltqan emes. Bizdiń bul sózimizge aǵashtan zamanaýi úi salýǵa mamandanǵan Finliandiianyń HONKA kompaniiasy elimizdegi jumysyn jandandyrýǵa kúsh salǵany aiqyn dálel bola alady. Kúni keshe ǵana HONKA kompaniiasynyń Finliandiia men Reseidegi ókildikteriniń basshylary Almatyda bas qosyp, Qazaqstandaǵy jumysyn jandandyrýǵa bekingenderin resmi túrde málimdedi. Kórkimen kóz tartqan aǵashtan salynǵan ásem úige qyzyqqan qaýym endi atalmysh kompaniianyń qyzmetine júgine alady.
Jarty ǵasyr buryn qurylǵan HONKA kompaniiasy buǵan deiin de elimizdiń naryǵynda Máskeýdegi ókilderiniń nusqaýymen jumys istegen bolatyn. Endi finderdiń betke ustar kompaniiasy Almatyda keńsesin ashyp, Qazaqstandaǵy jumysyn keńeitýge múddeli bolyp otyr. Elimizde HONKA-nyń alǵashqy aǵash úileri 1990 jyldary paida bolǵan edi. Qazir kontsern Qazaqstan naryǵyna keshendi usynyspen jáne tolyq aýqymdy jobalardy júzege asyrýǵa nietti.
Endigi jerde qazaqstandyqtar álemdik kontsern usynǵan barlyq múmkindikterin paidalana otyryp, zamanaýi arhitektýralyq jobalarmen aishyqtalǵan sándi úilerge qoljetkizetin boldy.
Jýrnalister aldynda ózderiniń alǵa qoiǵan maqsattary jaiynda baiandaǵan Máskeýdegi kompaniia ókildiginiń direktory Aleksandr Lvovskii myrzaǵa tilshiler qaýymy «Qazir dúniejúzi daǵdarystyń qyspaǵynda qalyp otyr. Osyndai qiyn kezeńde Qazaqstandaǵy jumystaryńyzdy keńeitýge qalaisha táýekel etip otyrsyzdar?» dep surady. Óz kezeginde kompaniia basshysy:
– Ras aitasyz. Qazir daǵdarys qai elge bolsa da ońai tiip otyrǵan joq. Biraq bizdiń kompaniianyń jumysy jalpy naryqqa baǵynbaidy. HONKA kontserni iri bankter, alpaýyt kompaniialarmen eshqandai bailanysy joq. Biz jaily ómir súrýdi qalaityn qoǵamnyń sút betindegi qaimaqtaryna arnap, janǵa jaily úi salýǵa mamandanǵanbyz. Sondyqtan daǵdarys kompaniia jumysyna kedergi bola almaidy. Qazir Qazaqstanda jaily aǵash úilerge qyzyǵýshylyq tanytyp otyrǵan qaltasy qalyń azamattar bar. Biz solarǵa óz qyzmetimizdi usynatyn bolamyz, – dedi Aleksandr Lvovskii.
Jiyn barysynda HONKA kompaniiasy qazir dúniejúzinde jyl saiyn 3 myńnan astam úi salatyndaryn alǵa tartty. Olar ózderi salǵan aǵash úilerdi Marian araldarynda kezdestirýge bolatynyn aitty. Kompaniia klientteri arasynda kóptegen ataqty adamdar, sonyń ishinde Ulybritaniia patshaiymy Elizaveta II bar eken.
Fin kontserni úilerin 100 paiyzdyq qaraǵaidan salatynyn alǵa tartty. Kompaniia aǵash daiyndaýdyń jáne aǵash óńdeýdiń joǵary sapasyn qamtamasyz etedi. Qurylysshylar aǵash úidiń bólshekterin jasaý kezinde formaldegidsiz jelim qoldanatynyn da aitty.
HONKA kompaniiasymen daiyndalǵan qurylys materialdary ekologiialyǵymen erekshelenedi jáne allergiia, astmadan azap shegetin adamdarǵa qolaily. Aǵash úilerdiń barlyq bólshekteri (90 paiyzy) Finliandiianyń Karstýla qalasyndaǵy zaýytta daiyndalady eken.
Ónimderiniń 60 paiyzdan astamyn syrt elderge shyǵaryp, mol tabys taýyp otyrǵan kompaniianyń úileri zilzalaǵa shydamdylyǵymen de jurttyń nazaryn aýdarýda. Óz kezeginde jýrnalister «Shyǵys Qazaqstannyń taýly aimaǵyndaǵy qaraǵailardan qurylys materialdaryn salý oida bar ma?» degen suraǵyna kompaniia qyzmetkeri Georgii Sidelnikov Qazaqstanda aǵash úige qajetti qurylys materialdaryn óndiretin óndiris salatyn oilary joq ekenin ashyp aitty. Ol aǵash úidi salýǵa Finliandiianyń soltústigindegi qaraǵaily ormandardyń aǵashtary taptyrmaitynyn alǵa tartty.
Otandyq naryqta jumys isteýge ańsary aýǵan fin kontserni bolashaqta qazaqstandyq dizainerlermen birlesip, kiiz úige uqsaityn zamanaýi aǵash úiler salý oilarynda bar ekenin de aityp qaldy. Ol úshin kompaniia qyzmetkerlerine ulttyq naqyshta úi salýǵa tapsyrys berseńiz bolǵany.
Jiyn sońynda kompaniia basshylary aldaǵy ýaqytta Almatyda aǵash úilerdiń kottedjder qalashyǵyn salýǵa niettenip otyrǵandaryn da tilge tiek etti. Sondai-aq, olar Almaty, Astana, Shyǵys jáne Batys Qazaqstanda jumys isteýge kúsh salyp jatqandaryn da alǵa tartty.
N.ÁÝBÁKIR.
