– Memleket basshysy belgilegen mindetterdi sapaly iske asyrý, qoiylǵan KPI mejelerine qol jetkizý úshin protsestiń barlyq qatysýshy birqatar júieli máseleni birlesip sheshýi tiis. Búgingi alań pikir almasýǵa, osy baǵyttaǵy syn-qaterler men qolda bar áleýetti baǵalaýǵa múmkindik beretinine qýanyshtymyn, – dedi "Qazaqmys korporatsiiasy" JShS basqarma tóraǵasy Nurahmet Nuriev forým barysynda.
Nurahmet Nuriev otandyq óndiristi qoldaýda memleket tarapynan taý-ken sektorynyń satyp alý qyzmetine retteýshilik yqpal etý máselesin atap ótti.
Spikerdiń aitýynsha, 2007 jyly jer qoinaýyn paidalanýshylar úshin taýar, jumystar men qyzmetterdi satyp alýdyń biryńǵai qaǵidalaryn qabyldanǵanǵa deiin taý-ken sektorynda arnaiy retteý bolmaǵan.
– Qaǵidalardyń birinshi redaktsiiasynyń qabyldanýymen normaǵa jeke jer qoinaýyn paidalanýshylardyń satyp alý rásimderin memlekettik retteýdiń negizgi qaǵidattary alyndy.
Jalpy, 2010-2018 jyldar aralyǵyndaǵy kúrdeli reformalarǵa, sonyń ishinde satyp alý tásilderine qaramastan, bul qaǵidalar satyp alýdy retteýdiń printsipterin, modelderi men tásilderin tujyrymdamalyq túrde saqtap qaldy.
Bastapqy kezeńde qaǵidalardy engizý naryqtyń damýyna jáne ony retteýge serpin berdi. Munyń bári otandyq óndirýshilerge damýǵa múmkindik berdi. Biraq ýaqyt óte kele jekelegen normalar men tásilderdi eskerip, satyp alý qaǵidalardyń keibir júieli sátteri otandyq óndiristi damytýda tejeýshi faktorǵa ainaldy, – dedi Nurahmet Nuriev.
Korrporatsiia tóraǵasy baǵany qaita qaraýǵa múmkindik beretin ikemdi júieniń sharttaryn qarastyrý qajet dep esepteidi. Sondai-aq, ol memlekettik satyp alýdyń elektrondyq júiesindegi máselelerge de toqtaldy.
Onyń aitýynsha, tapsyrys berýshi jáne jetkizýshilermen tolyq kólemde ózara is-qimyl jasaý úshin jańa elektron júieni ázirleý jáne engizý jónindegi máseleni jedeldetý qajet.
Nuriev taý-ken kompaniialary úshin satyp alynatyn ónimniń sapasy mańyzdy ekenin de atap ótti. Sol sebepti otandyq taýar óndirýshiler álemdik standarttarǵa baǵdarlap, óndiristik protsesteri men tehnologiialaryn jetildirýge, sapa menedjmenti júiesin damytýǵa umtylýy kerek.
– "Ónerkásiptik saiasat týraly" zańynyń qoldanystaǵy normalaryn naryqqa ikemdep, memlekettiń yntalandyrý sharalaryn engizýin qamtamasyz etetindei qaita qaraý qajet. Bul shara óndiristerdi tabysty iske qosý úshin memlekettik qoldaý sharalaryn sapaly ákimshilendirýge eleýli yqpal etedi, suranys pen usynysty túsiný úshin qajetti ashyqtyq pen aiqyndyqty arttyrady dep oilaimyn, – dedi Nurahmet Nuriev óz baiandamasynda.
Aita keteiik, is-shara barysynda jer qoinaýyn paidalanýshylar men otandyq taýar óndirýshiler jalpy quny 37 milliard 929 million teńgeni quraityn sharttar men offteik-kelisimsharttar men uzaq merzimdi memorandýmǵa qol qoidy.
Sheteldik investorlardyń jáne respýblikanyń barlyq óńirlerinen 2 myńnan astam delegat qatysty. Forýmda el ekonomikasy naqty sektorynyń qajettilikteri úshin taýarlardy, jumystar men kórsetiletin qyzmetterdi lokalizatsiialaýdy keńeitý múmkindikteri jan-jaqty talqylandy.
Sonymen qatar jer qoinaýyn paidalanýdy, kómir ónerkásibin, kólik jáne energetika salalaryn odan ári damytý perspektivalary jaily áńgime órbidi.
