Eńbek ministrligi Qazaqstanda harasment uǵymyn jáne ol úshin jaýapkershilikti zań júzinde bekitýdi talap etip otyr, dep habarlaidy dalanews.kz.
Bul týraly Senat kýlýarynda Eńbek jáne halyqty áleýmettik qorǵaý ministrliginiń birinshi vitse ministri Erbol Týiaqbaev málimdedi.
Onyń sózinshe, ministrlik bul másele boiynsha naqty ustanymda.
«Bizdiń pozitsiiamyz naqty. Biz muny zańmen bekitemiz. Ondai jaǵdailar bar, naqty keister bar. Biz úshin eń basty mindetterdiń biri - jumysshylardyń quqyǵyn qorǵaý. Jumys ornynda saý atmosfera bolýy kerek. Sondyqtan bul normanyń zań júzinde bekitilýin talap etemiz», - dedi Týiaqbaev.
Vitse ministrdiń aitýynsha, Qazaqstanǵa mundai normany engizý jóninde Halyqaralyq eńbek uiymy da usynym bergen.
«Bul másele kún tártibinen alynǵan joq. Jumys jalǵasyp jatyr. Adam quqyqtary jónindegi jospar aiasynda qarastyrylyp jatyr. Ol jospar eń joǵary deńgeide bekitilgen. Qazir zań jobasy memlekettik organdarmen kelisý kezeńinen ótip jatyr», - dedi ol.
Týiaqbaevtyń sózinshe, bastama Úkimettiń zańnamalyq usynysy retinde daiyndalýda. Alaida ony depýtattarǵa engizbes buryn birneshe rásimnen ótý qajet.
«Biraq naqty aita alamyn: bul másele jabylǵan joq. Biz jumysty sońyna deiin jetkizip, zańnamalyq bekitýge qol jetkizemiz», - dedi vitse ministr.
