Memleket basshysy Túrkiia Prezidentin "Qoja Ahmet Iasaýi" ordenimen marapattady, dep habarlaidy dalanews.kz.
Qasym-Jomart Toqaev Rejep Taiip Erdoǵandy óz halqyn alǵa bastap kele jatqan álemdik deńgeidegi saliqaly basshy jáne saiasatker retinde erekshe qurmetteitinin atap ótti.
"Ózińizdiń kóregen bastamańyzben qolǵa alynǵan tiimdi reformalardyń nátijesinde Túrkiia turaqty ósip-órkendeý jolyna tústi, zor tabysqa jetti, yqpaldy jáne qýatty derjava atandy. Biz túrik aǵaiynǵa árdaiym tilekshimiz, baýyrlas eldiń ár jetistigine qýanamyz. Prezident Erdoǵan – jahandyq saiasatta ádildik pen jaýapkershilik qaǵidatyn tabandy túrde qorǵap júrgen asa kórnekti qairatker. Sizdiń "Álem besten úlken" atty tujyrymdamańyz barshaǵa belgili. Bul halyqaralyq qatynastar júiesindegi teńsizdikke qarsy aitylǵan batyl úndeý ekeni sózsiz. Sonymen qatar, Rejep myrza túrki jáne islam órkenietiniń yntymaqtastyǵyn nyǵaitý isinde airyqsha ról atqaryp keledi. Ózińizdi túrki álemi moiyndaǵan bedeldi kóshbasshy desek, artyq bolmaidy. Siz týystas elderdiń rýhani jáne saiasi tutastyǵyn bekemdeý jolynda aianbai eńbek etip júrsiz. Qadirli Rejep Taiip Erdoǵannyń tikelei qoldaýynyń arqasynda Túrki memleketteri uiymy qysqa merzim ishinde yqpaldy qurylym retinde qalyptasty. Sondai-aq, TÚRKSOI, Túrki memleketteriniń Parlamenttik assambleiasy, Túrki akademiiasy, Túrki mádenieti jáne murasy qory, Túrki investitsiialyq qory sekildi mańyzdy institýttardyń jumysy jandana tústi. Biz muny joǵary baǵalaimyz", – dedi Qazaqstan Prezidenti.
Memleket basshysy Túrkiia Prezidentin Qoja Ahmet Iasaýi atyndaǵy mártebeli ordenmen marapattaý týraly sheshim qabyldaǵanyn, Rejep Taiip Erdoǵan bul ordenniń tuńǵysh iegeri ekenin atap ótti.
"Munyń simvoldyq máni óte zor. Bul marapat – uly babamyz salǵan rýhani baýyrlastyq pen tarihi ádildik jolynyń jarqyn úlgisi. Qadirli Prezident myrza, sizdiń Qazaq elindegi bedelińiz óte joǵary. Halqymyz sizdi syilaidy, jaqsy kóredi, qoldaidy. Qadirli dosym, osy joǵary marapatty Sizdiń túrki álemindegi kóshbasshylyq rólińizge berilgen laiyqty baǵa dep qabyldańyz. Sondai-aq, elimizdiń sizge jáne túrik jurtyna degen shynaiy qurmeti, zor rizashylyǵy dep bilińiz. Ózińizge zor densaýlyq, al barsha túrik halqyna amandyq pen baq-bereke tileimin! Qazaq-túrik dostyǵy máńgi bolsyn!" – dedi Prezident.
