مەملەكەت باسشىسى تٷركييا پرەزيدەنتٸن "قوجا احمەت ياساۋي" وردەنٸمەن ماراپاتتادى, دەپ حابارلايدى dalanews.kz.
قاسىم-جومارت توقاەۆ رەجەپ تاييپ ەردوعاندى ٶز حالقىن العا باستاپ كەلە جاتقان ەلەمدٸك دەڭگەيدەگٸ ساليقالى باسشى جەنە ساياساتكەر رەتٸندە ەرەكشە قۇرمەتتەيتٸنٸن اتاپ ٶتتٸ.
"ٶزٸڭٸزدٸڭ كٶرەگەن باستاماڭىزبەن قولعا الىنعان تيٸمدٸ رەفورمالاردىڭ نەتيجەسٸندە تٷركييا تۇراقتى ٶسٸپ-ٶركەندەۋ جولىنا تٷستٸ, زور تابىسقا جەتتٸ, ىقپالدى جەنە قۋاتتى دەرجاۆا اتاندى. بٸز تٷرٸك اعايىنعا ەردايىم تٸلەكشٸمٸز, باۋىرلاس ەلدٸڭ ەر جەتٸستٸگٸنە قۋانامىز. پرەزيدەنت ەردوعان – جاھاندىق ساياساتتا ەدٸلدٸك پەن جاۋاپكەرشٸلٸك قاعيداتىن تاباندى تٷردە قورعاپ جٷرگەن اسا كٶرنەكتٸ قايراتكەر. سٸزدٸڭ "ەلەم بەستەن ٷلكەن" اتتى تۇجىرىمداماڭىز بارشاعا بەلگٸلٸ. بۇل حالىقارالىق قاتىناستار جٷيەسٸندەگٸ تەڭسٸزدٸككە قارسى ايتىلعان باتىل ٷندەۋ ەكەنٸ سٶزسٸز. سونىمەن قاتار, رەجەپ مىرزا تٷركٸ جەنە يسلام ٶركەنيەتٸنٸڭ ىنتىماقتاستىعىن نىعايتۋ ٸسٸندە ايرىقشا رٶل اتقارىپ كەلەدٸ. ٶزٸڭٸزدٸ تٷركٸ ەلەمٸ مويىنداعان بەدەلدٸ كٶشباسشى دەسەك, ارتىق بولمايدى. سٸز تۋىستاس ەلدەردٸڭ رۋحاني جەنە ساياسي تۇتاستىعىن بەكەمدەۋ جولىندا ايانباي ەڭبەك ەتٸپ جٷرسٸز. قادٸرلٸ رەجەپ تاييپ ەردوعاننىڭ تٸكەلەي قولداۋىنىڭ ارقاسىندا تٷركٸ مەملەكەتتەرٸ ۇيىمى قىسقا مەرزٸم ٸشٸندە ىقپالدى قۇرىلىم رەتٸندە قالىپتاستى. سونداي-اق, تٷركسوي, تٷركٸ مەملەكەتتەرٸنٸڭ پارلامەنتتٸك اسسامبلەياسى, تٷركٸ اكادەميياسى, تٷركٸ مەدەنيەتٸ جەنە مۇراسى قورى, تٷركٸ ينۆەستيتسييالىق قورى سەكٸلدٸ ماڭىزدى ينستيتۋتتاردىڭ جۇمىسى جاندانا تٷستٸ. بٸز مۇنى جوعارى باعالايمىز", – دەدٸ قازاقستان پرەزيدەنتٸ.
مەملەكەت باسشىسى تٷركييا پرەزيدەنتٸن قوجا احمەت ياساۋي اتىنداعى مەرتەبەلٸ وردەنمەن ماراپاتتاۋ تۋرالى شەشٸم قابىلداعانىن, رەجەپ تاييپ ەردوعان بۇل وردەننٸڭ تۇڭعىش يەگەرٸ ەكەنٸن اتاپ ٶتتٸ.
"مۇنىڭ سيمۆولدىق مەنٸ ٶتە زور. بۇل ماراپات – ۇلى بابامىز سالعان رۋحاني باۋىرلاستىق پەن تاريحي ەدٸلدٸك جولىنىڭ جارقىن ٷلگٸسٸ. قادٸرلٸ پرەزيدەنت مىرزا, سٸزدٸڭ قازاق ەلٸندەگٸ بەدەلٸڭٸز ٶتە جوعارى. حالقىمىز سٸزدٸ سىيلايدى, جاقسى كٶرەدٸ, قولدايدى. قادٸرلٸ دوسىم, وسى جوعارى ماراپاتتى سٸزدٸڭ تٷركٸ ەلەمٸندەگٸ كٶشباسشىلىق رٶلٸڭٸزگە بەرٸلگەن لايىقتى باعا دەپ قابىلداڭىز. سونداي-اق, ەلٸمٸزدٸڭ سٸزگە جەنە تٷرٸك جۇرتىنا دەگەن شىنايى قۇرمەتٸ, زور ريزاشىلىعى دەپ بٸلٸڭٸز. ٶزٸڭٸزگە زور دەنساۋلىق, ال بارشا تٷرٸك حالقىنا اماندىق پەن باق-بەرەكە تٸلەيمٸن! قازاق-تٷرٸك دوستىعى مەڭگٸ بولسىن!" – دەدٸ پرەزيدەنت.
