الماتىدا تۋريستەردى تارتۋعا قانشا قارجى جۇمسالاتىنى بەلگىلى بولدى. بۇل تۋرالى زەرتتەۋدى جۋرناليست دميتريي شيشكين جاساعان، - دەپ حابارلايدى Dalanews.kz.
ءجۋرناليستىڭ زەرتتەۋى بويىنشا، الماتى قالاسى اكىمدىگىنە قاراستى «الماتى تۋريزم بيۋروسى» قازاقستان تۋرالى شەتەلدىكتەرگە ارنالعان گيد-كىتاپ شىعارۋعا 331 ميلليون تەڭگە (شامامەن 600 مىڭ اقش دوللارى) جۇمساماق. ءتيىستى لوت مەملەكەتتىك ساتىپ الۋ سايتىندا جاريالانعان، بۇل سوما كىتاپتى شىعارۋ مەن ونىڭ PR-عا جۇمسالاتىن شىعىندارىن قامتيدى.
بۇعان دەيىن قازاقستاندا ءتۋريزمدى دامىتۋعا ەرەكشە كوزقاراس قالىپتاسقانى تۋرالى ايتىلعان: ينفراقۇرىلىم جاساۋ ورنىنا مەملەكەت يميدجدىك روليكتەر، بلوگەرلەرگە ارنالعان پرەسس-تۋرلار، كورمەلەر مەن فەستيۆالدەر ۇيىمداستىرۋعا كوپ قارجى جۇمسايدى. بۇل تۇرعىدا الماتى كوش باستاپ تۇر.
بيىل قالاداعى تۋريزم باسقارماسى مەملەكەتتىك ساتىپ الۋ شەڭبەرىندە 4،5 ميلليارد تەڭگەدەن استام قاراجات بولگەن، ونىڭ 4 ميلليارد تەڭگەسى تۋريستىك ءونىمدى ىلگەرىلەتۋگە باعىتتالعان.
كەيبىر تەندەرلەر تۋرالى:
تۋريزم باسقارماسى بيىل «الماتى تۋريزم بيۋروسى» جشس-مەن جالپى سوماسى 2،6 ميلليارد تەڭگەگە ءۇش كەلىسىمشارت جاساسقان. ونىڭ شامامەن 1 ميلليارد تەڭگەسى قالانىڭ جانە وبلىستىڭ تۋريستىك ورىندارىن ەل ىشىندە جانە حالىقارالىق نارىقتا جارنامالاۋعا باعىتتالعان (961 ميلليون جانە 1 ميلليارد تەڭگە). تاعى 331،3 ميلليون تەڭگە يميدجدىك ءىس-شارالارعا بولىنگەن.
قالا بيلىگى 424،8 ميلليون تەڭگەنى ەلشىلىكتەردە ءىس-شارالار وتكىزۋگە، حالىقارالىق تۋريستىك كورمەلەرگە قاتىسۋعا جانە شەتەلدىكتەرگە ارنالعان اقپاراتتىق تۋرلارعا بولگەن. مەردىگەر – «Correct Solution» ج ش س.
الماتى تۋريزم باسقارماسى مەملەكەتتىك ساتىپ الۋ اياسىندا «Bestar Travel» جشس-نە شامامەن 200 ميلليون تەڭگە بولگەن. بۇل قارجىعا تامىز ايىنىڭ سوڭىندا رەسپۋبليكا سارايىنىڭ الدىنداعى الاڭدا وتكەن ەكى كۇندىك گاسترونوميالىق تۋريستىك فەستيۆال ۇيىمداستىرىلعان.
173 ميلليون تەڭگە قازاقستاندىق باق-تا اقپاراتتىق ماتەريالدار دايىنداۋ جانە جاريالاۋ قىزمەتىنە جۇمسالعان. مەردىگەر – «Twelve Creative» كرەاتيۆ اگەنتتىگى.
306 ميلليون تەڭگە ينتەرنەتتەگى جارنامالاردى ورنالاستىرۋعا جۇمسالعان. مەردىگەر – «Tau Innovative Solutions» جارناما اگەنتتىگى. الماتىنى كورۋگە شاقىراتىن جارناما تۇركيا، ءباا، كاتار، ساۋد ارابياسى، جۇڭگو جانە باسقا ەلدەردىڭ تۇرعىندارىنا كورسەتىلگەن.
135 ميلليون تەڭگە الماتىداعى MICE ءىس-شارالاردى قولداۋعا باعىتتالعان. MICE (اعىلش. Meetings، Incentives، Conferences، Exhibitions) – كورپوراتيۆتىك ءىس-شارالاردى ۇيىمداستىرۋمەن بايلانىستى ىسكەرلىك تۋريزم سالاسى. مەردىگەر – «QTrip» تۋروپەراتورى جانە ءىس-شارالار ۇيىمداستىرۋشىسى. ولار سونداي-اق 67 ميلليون تەڭگەگە تۋريستىك نىسانداردىڭ ءبىرىڭعاي ءتىزىمىن جاساۋدا.
74 ميلليون تەڭگە Tripadvisor تۋرپلاتفورماسىندا ءناتيۆتى جارنامالار مەن اقپاراتتىق ماتەريالداردى ورنالاستىرۋعا، ال 69 ميلليون تەڭگە Expedia پلاتفورماسىندا جاريالاۋعا جۇمسالعان. مەردىگەر – تۋريزم سالاسىنداعى اناليتيكاعا ماماندانعان Open Travel Advisory كومپانياسى.
53 ميلليون تەڭگە قازاق، اعىلشىن، اراب جانە جۇڭگو تىلدەرىندە دۋبلياج جانە سۋبتيترلەرمەن بەس بەينەروليك جاساۋعا ارنالعان.
52 ميلليون تەڭگە لازەرلىك سكانەرلەۋ نەگىزىندە ۆيرتۋالدى 3D-تۋرلار جاساۋعا بولىنگەن. جوبالاردى «VideoStyle» ستۋدياسى جۇزەگە اسىرادى.
تەندەردىڭ جەڭىمپازى ءالى انىقتالمادى، ءبىراق تەحنيكالىق تاپسىرما فرانسۋزدىق Assouline Publishing باسپاسىمەن ىنتىماقتاستىققا ارنالعانداي كورىنەدى. تەحنيكالىق سپەسيفيكاسيادا جەتكىزۋشى 30 جىلدان استام تاجىريبەسى بار جانە 20 ەلدە دۇكەندەرى بار حالىقارالىق باسپا بولۋى كەرەك دەپ كورسەتىلگەن. قۇجاتتىڭ اتاۋى دا «تس_Assouline» دەپ اتالادى.
تەندەر شارتتارىنا سايكەس، جەڭىمپاز حالىقارالىق باسپا وكىلدەرىن قىس پەن جاز مەزگىلدەرىندە قازاقستانعا تۋريستىك ورىنداردى، ونىڭ ىشىندە يۋنەسكو ەسكەرتكىشتەرىن ءتۇسىرۋ ءۇشىن ەكى رەت اكەلۋى كەرەك. شەتەلدىك قوناقتاردى كەمىندە 5 جۇلدىزدى قوناقۇيگە ورنالاستىرىپ، ولاردى كۇنىنە ءۇش مەزگىل تاماقپەن قامتاماسىز ەتۋ قاجەت.
گيد-كىتاپ اعىلشىن تىلىندە، 3000 دانامەن شىعارىلادى. قاتتى مۇقابالى، التىن بەدەرلى، كۇڭگىرت قاعازعا فوتوباسىلىم باسىم بولادى دەپ جوسپارلانعان. سونىمەن قاتار، گيدتى الەۋمەتتىك جەلىلەردە جانە ءداستۇرلى باق-تا كەمىندە 10 ەلدە جارنامالاۋ قاجەت.
