Almatyda týristerdi tartýǵa qansha qarjy jumsalatyny belgili boldy. Bul týraly zertteýdi jýrnalist Dmitrii Shishkin jasaǵan, - dep habarlaidy Dalanews.kz.
Jýrnalistiń zertteýi boiynsha, Almaty qalasy ákimdigine qarasty «Almaty týrizm biýrosy» Qazaqstan týraly sheteldikterge arnalǵan gid-kitap shyǵarýǵa 331 million teńge (shamamen 600 myń AQSh dollary) jumsamaq. Tiisti lot memlekettik satyp alý saitynda jariialanǵan, bul soma kitapty shyǵarý men onyń PR-ǵa jumsalatyn shyǵyndaryn qamtidy.
Buǵan deiin Qazaqstanda týrizmdi damytýǵa erekshe kózqaras qalyptasqany týraly aitylǵan: infraqurylym jasaý ornyna memleket imidjdik rolikter, blogerlerge arnalǵan press-týrlar, kórmeler men festivalder uiymdastyrýǵa kóp qarjy jumsaidy. Bul turǵyda Almaty kósh bastap tur.
Biyl qaladaǵy Týrizm basqarmasy memlekettik satyp alý sheńberinde 4,5 milliard teńgeden astam qarajat bólgen, onyń 4 milliard teńgesi týristik ónimdi ilgeriletýge baǵyttalǵan.
Keibir tenderler týraly:
Týrizm basqarmasy biyl «Almaty týrizm biýrosy» JShS-men jalpy somasy 2,6 milliard teńgege úsh kelisimshart jasasqan. Onyń shamamen 1 milliard teńgesi qalanyń jáne oblystyń týristik oryndaryn el ishinde jáne halyqaralyq naryqta jarnamalaýǵa baǵyttalǵan (961 million jáne 1 milliard teńge). Taǵy 331,3 million teńge imidjdik is-sharalarǵa bólingen.
Qala biligi 424,8 million teńgeni elshilikterde is-sharalar ótkizýge, halyqaralyq týristik kórmelerge qatysýǵa jáne sheteldikterge arnalǵan aqparattyq týrlarǵa bólgen. Merdiger – «Correct Solution» JShS.
Almaty Týrizm basqarmasy memlekettik satyp alý aiasynda «Bestar Travel» JShS-ne shamamen 200 million teńge bólgen. Bul qarjyǵa tamyz aiynyń sońynda Respýblika saraiynyń aldyndaǵy alańda ótken eki kúndik Gastronomiialyq týristik festival uiymdastyrylǵan.
173 million teńge qazaqstandyq BAQ-ta aqparattyq materialdar daiyndaý jáne jariialaý qyzmetine jumsalǵan. Merdiger – «Twelve Creative» kreativ agenttigi.
306 million teńge internettegi jarnamalardy ornalastyrýǵa jumsalǵan. Merdiger – «Tau Innovative Solutions» jarnama agenttigi. Almatyny kórýge shaqyratyn jarnama Túrkiia, BAÁ, Katar, Saýd Arabiiasy, Qytai jáne basqa elderdiń turǵyndaryna kórsetilgen.
135 million teńge Almatydaǵy MICE is-sharalardy qoldaýǵa baǵyttalǵan. MICE (aǵylsh. Meetings, Incentives, Conferences, Exhibitions) – korporativtik is-sharalardy uiymdastyrýmen bailanysty iskerlik týrizm salasy. Merdiger – «QTrip» týroperatory jáne is-sharalar uiymdastyrýshysy. Olar sondai-aq 67 million teńgege týristik nysandardyń biryńǵai tizimin jasaýda.
74 million teńge Tripadvisor týrplatformasynda nativti jarnamalar men aqparattyq materialdardy ornalastyrýǵa, al 69 million teńge Expedia platformasynda jariialaýǵa jumsalǵan. Merdiger – týrizm salasyndaǵy analitikaǵa mamandanǵan Open Travel Advisory kompaniiasy.
53 million teńge qazaq, aǵylshyn, arab jáne qytai tilderinde dýbliaj jáne sýbtitrlermen bes beinerolik jasaýǵa arnalǵan.
52 million teńge lazerlik skanerleý negizinde virtýaldy 3D-týrlar jasaýǵa bólingen. Jobalardy «VideoStyle» stýdiiasy júzege asyrady.
Tenderdiń jeńimpazy áli anyqtalmady, biraq tehnikalyq tapsyrma frantsýzdyq Assouline Publishing baspasymen yntymaqtastyqqa arnalǵandai kórinedi. Tehnikalyq spetsifikatsiiada jetkizýshi 30 jyldan astam tájiribesi bar jáne 20 elde dúkenderi bar halyqaralyq baspa bolýy kerek dep kórsetilgen. Qujattyń ataýy da «TS_Assouline» dep atalady.
Tender sharttaryna sáikes, jeńimpaz halyqaralyq baspa ókilderin qys pen jaz mezgilderinde Qazaqstanǵa týristik oryndardy, onyń ishinde IýNESKO eskertkishterin túsirý úshin eki ret ákelýi kerek. Sheteldik qonaqtardy keminde 5 juldyzdy qonaqúige ornalastyryp, olardy kúnine úsh mezgil tamaqpen qamtamasyz etý qajet.
Gid-kitap aǵylshyn tilinde, 3000 danamen shyǵarylady. Qatty muqabaly, altyn bederli, kúńgirt qaǵazǵa fotobasylym basym bolady dep josparlanǵan. Sonymen qatar, gidti áleýmettik jelilerde jáne dástúrli BAQ-ta keminde 10 elde jarnamalaý qajet.
