ەۋرووداق كارى قۇرلىققا باس ساۋعالاپ كەلەتىن بوسقىنداردى قابىلداۋدىڭ نورمالارىن قاتاڭداتتى. ەندى وزدەرىن ساياسي بوسقىن دەپ جاريالاپ، ەۋروپاداعى جايلى ومىرگە ۇمتىلۋشىلاردىڭ سانى قىسقارۋى مۇمكىن. سونىمەن قاتار، بۇل جاعداي جەر جۇزىندەگى ديكتاتورلىق رەجيملەردىڭ كۇش الۋىنا ىقپال ەتۋى ىقتيمال.

الداعى ۋاقىتتا باتىس ەلدەرىندەگى دەموكراتيانى العا تارىپ، بيلىگىن سىنايتىندار بۇلاي اڭگىمە ايتاردىڭ الدىندا ون ويلانىپ، توعىز تولعانارى انىق.

تاياۋدا ەۋرووداققا مۇشە ەلدەردىڭ سىرتقى ىستەر مينيسترلەرى بوسقىنداردى قابىلداۋعا قاتىستى جاڭا قۇجاتتى ءوزارا ماقۇلداپ، بەكىتتى.

جاڭا قۇجاتقا سايكەس ەندى بوسقىندار كارى قۇرلىقتاعى كوڭىلى تۇسكەن ەلىنە بىردەن "قۇدايى قوناق" بولىپ بارا المايدى. ولار ەڭ الدىمەن ەۋرووداقتىڭ شەكاراسىنا ات شالدىرىپ، وداقتىڭ ءتيىستى ورگاندارىنا ءوزىنىڭ شىنىمەندە بوسقىن ەكەنىن، ساياسي قۋعىن كورگەنىن راستاۋى ءتيىس. وسى ۋاقىت ارالىعىندا ولار ەو-نىڭ شەكاراسىنداعى ارنايى لاگەرلەردە تۇراقتايدى.

بۇگىندە وزدەرىن بوسقىن، ساياسي ءزابىر-جاپا كورگەن ساناپ، جاردەم سۇراپ بارعانداردىڭ 20 پايىزى ەۋروپا ەلدەرىن دە تۇراقتاپ قالۋدى كوزدەيدى ەكەن.

ەگەر ەۋرووداققا بوسقىن ەكەنىڭىزدى دالەلدەي الماساڭىز، ميگراسيا قىزمەتى كەلگەن ىزىڭىزبەن كەرى دەپورتاتسيا جاسايدى.

ايتپاقشى، بريۋسسەل مۇنداي تالاپتى الدىمەن دەموكراتياسى ءبىرشاما دامىعان ماروككو، تۋنيس، الجير، تۇركيا، بوسنيا، گەرسەگوۆينا، سەربيا، مولدوۆا،  گرۋزيا سىندى ەلدەردىڭ ازاماتتارىنا قارسى قولدانباق.

ويتكەنى اتالعان ەلدەردە بيلىككە قارسى كەلىپ، ەۋروپاعا باس ساۋعالايتىنداي "اقىرزامان" ورناماعانى انىق. الداعى ۋاقىتتا  ەو جۇرتتى ساياسي بەلسەندىلىگى ءۇشىن سوڭىنا يت قوسىپ قۋمايتىن ەلدەردىڭ ءتىزىمىن ءالى تولىقتىرا ءتۇسۋى مۇمكىن.

ال ەو شەڭبەرىندە مۇنداي تالاپتىڭ قابىلدانۋىنا گەرمانيا، پولشا جانە ۆەنگريا مۇرىندىق بولعانىن ايتا كەتۋىمىز كەرەك. ويتكەنى اتالعان ەلدەر ميگرانتتاردان قاتتى جاپا شەككەن ەل رەتىندە تانىمال.