قازاقستاندا جوعارى وقۋ ورىندارىنا قابىلداۋ جۇيەسى تۇبەگەيلى وزگەرۋى مۇمكىن. عىلىم جانە جوعارى ءبىلىم مينيسترلىگى قازىرگى ۇبت-نىڭ ورنىنا حالىقارالىق ستاندارتقا نەگىزدەلگەن جاڭا تەست ەنگىزۋدى قاراستىرىپ جاتىر. بۇل تۋرالى مينيستر ساياسات نۇربەك مالىمدەدى، دەپ حابارلايدى Dalanews.kz inbusiness-كە سىلتەمە جاساپ.
ءمينيستردىڭ سوزىنشە، جاڭا ەمتيحان SAT فورماتىنا جاقىن بولادى جانە ونى شەتەلدەگى بەدەلدى ۋنيۆەرسيتەتتەر قابىلداي الادى. ءقازىر قازاقستاننىڭ ۇبت سەرتيفيكاتىن ەشبىر شەتەلدىك جوعارى وقۋ ورنى مويىندامايدى. سوندىقتان شەتەلدە ءبىلىم الۋدى جوسپارلاعان تۇلەكتەر ءۇشىن جاڭا جۇيە قاجەت بولىپ وتىر.
ساياسات نۇربەك اتا-انالار مەن مەكتەپ بىتىرۋشىلەرگە الاڭداماۋعا كەڭەس بەردى. جاڭارتىلعان تەستتى دايىنداۋ جانە وعان تولىق كوشۋ پروسەسى كەم دەگەندە ەكى جىل ۋاقىت الادى. دەمەك، رەفورما جاقىن جىلداردا مەكتەپ بىتىرەتىن تۇلەكتەرگە اسەر ەتپەيدى. وزگەرىستەر ەڭ ەرتە دەگەندە بۇگىنگى تومەنگى سىنىپ وقۋشىلارىنا قاتىستى بولۋى ىقتيمال.
مينيسترلىك وسى ماقساتتا بەس جىلدىق رەفورما جوسپارىن ازىرلەپ جاتىر.
جاڭا جۇيەنى قازاقستاندىق ماماندار دايىندايدى. ول ءۇشىن وتاندىق تەستولوگتار اقش-تاعى ETS كومپانياسىندا وقۋدان ءوتىپ، سەرتيفيكات الادى. العاشقى قازاقستاندىق مامان بۇگىندە پرينستون قالاسىنداعى كامپۋستا دايىندالىپ جاتىر.
ساياسات نۇربەكتىڭ ايتۋىنشا، جاڭا تەست حالىقارالىق تالاپتارعا تولىق سايكەستەندىرىلىپ، ونى تاپسىرعان تۇلەكتەر كەز كەلگەن شەتەلدىك ۋنيۆەرسيتەتكە قۇجات تاپسىرا الادى.
ۇبت ۋاقىتشا قولدانىستا بولادى
جاڭا جۇيە تولىق ىسكە قوسىلعانعا دەيىن ۇبت قولدانىستا بولادى. ءمينيستردىڭ سوزىنشە، ۇبت جاڭا فورمات تولىق كۇشىنە ەنگەنگە دەيىن قاتار قولدانىلادى.
جاڭا تەست مازمۇنى، قۇرىلىمى جانە قابىلداۋ ءتارتىبى جونىندەگى ناقتى مالىمەت ازىرگە جاريالانعان جوق.
