Qazaqstanda joǵary oqý oryndaryna qabyldaý júiesi túbegeili ózgerýi múmkin. Ǵylym jáne joǵary bilim ministrligi qazirgi UBT-nyń ornyna halyqaralyq standartqa negizdelgen jańa test engizýdi qarastyryp jatyr. Bul týraly ministr Saiasat Nurbek málimdedi, dep habarlaidy Dalanews.kz inbusiness-ke silteme jasap.
Ministrdiń sózinshe, jańa emtihan SAT formatyna jaqyn bolady jáne ony sheteldegi bedeldi ýniversitetter qabyldai alady. Qazir Qazaqstannyń UBT sertifikatyn eshbir sheteldik joǵary oqý orny moiyndamaidy. Sondyqtan shetelde bilim alýdy josparlaǵan túlekter úshin jańa júie qajet bolyp otyr.
Saiasat Nurbek ata-analar men mektep bitirýshilerge alańdamaýǵa keńes berdi. Jańartylǵan testti daiyndaý jáne oǵan tolyq kóshý protsesi kem degende eki jyl ýaqyt alady. Demek, reforma jaqyn jyldarda mektep bitiretin túlekterge áser etpeidi. Ózgerister eń erte degende búgingi tómengi synyp oqýshylaryna qatysty bolýy yqtimal.
Ministrlik osy maqsatta bes jyldyq reforma josparyn ázirlep jatyr.
Jańa júieni qazaqstandyq mamandar daiyndaidy. Ol úshin otandyq testologtar AQSh-taǵy ETS kompaniiasynda oqýdan ótip, sertifikat alady. Alǵashqy qazaqstandyq maman búginde Prinston qalasyndaǵy kampýsta daiyndalyp jatyr.
Saiasat Nurbektiń aitýynsha, jańa test halyqaralyq talaptarǵa tolyq sáikestendirilip, ony tapsyrǵan túlekter kez kelgen sheteldik ýniversitetke qujat tapsyra alady.
UBT ýaqytsha qoldanysta bolady
Jańa júie tolyq iske qosylǵanǵa deiin UBT qoldanysta bolady. Ministrdiń sózinshe, UBT jańa format tolyq kúshine engenge deiin qatar qoldanylady.
Jańa test mazmuny, qurylymy jáne qabyldaý tártibi jónindegi naqty málimet ázirge jariialanǵan joq.
