2025 جىلدىڭ 1 قاڭتارىنان باستاپ اتاۋلى الەۋمەتتىك كومەك (ااك) الۋعا ۇمىتكەر ازاماتتاردىڭ شىعىندارىن ەسەپتەۋ تەتىگىن سىناۋ ماقساتىندا پيلوتتىق جوبا ىسكە قوسىلادى، دەپ حابارلايدى Dalanews.kz.
بۇل تۋرالى ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا ەڭبەك جانە حالىقتى الەۋمەتتىك قورعاۋ ۆيسە-مينيسترى ولجاس انافين مالىمدەدى.
مينيسترلىكتىڭ مالىمەتىنشە، مەملەكەت باسشىسىنىڭ تاپسىرماسىنا سايكەس، الەۋمەتتىك كومەكتى شىن مۇقتاج ازاماتتارعا باعىتتاۋ ماقساتىندا حالىقتىڭ جيىنتىق كىرىسى مەن شىعىستارىن انىقتايتىن جۇيەنى جەتىلدىرۋ جۇمىستارى جۇرگىزىلىپ جاتىر. وسىعان بايلانىستى الەۋمەتتىك كودەكسكە وزگەرىستەر ەنگىزۋ جونىندەگى ۇسىنىستار ۇكىمەتتىڭ قاراۋىنا جولداندى.
ۆيسە-مينيستردىڭ ايتۋىنشا، ااك تاعايىنداۋ كەزىندە مۇقتاجدىق دەڭگەيىن انىقتايتىن ولشەمدەرگە ءبىرقاتار جاڭا تالاپ قوسىلماق.
ولار:
• تۇرعىن ءۇي نەمەسە جەڭىل اۆتوكولىك ساتىپ الۋ فاكتىسى؛
• يپوتەكادان باسقا، ءار وتباسى مۇشەسىنە ايىنا ەڭ تومەنگى كۇنكورىس دەڭگەيىنەن جوعارى مولشەردە بانكتىك قارىز نەمەسە ميكروكرەديت الۋ؛
• وتباسى مۇشەلەرىنىڭ ءبىر ايداعى بانك شوتتارى بويىنشا شىعىندارىنىڭ جيىنتىعى كەدەيلىك شەگىنەن اسىپ كەتۋى؛
• يپوتەكالىق دەپوزيتتەن باسقا، وتباسىنىڭ جالپى جيناق شوتىنىڭ كولەمى 200 اەك-تەن اسۋى.
“بۇل سىناق جۇيەسى ازاماتتاردىڭ كەلىسىمىمەن جۇزەگە اسىرىلاتىن بولادى. وسى ارقىلى مەملەكەت الەۋمەتتىك كومەكتى شىن مانىندە مۇقتاج وتباسىلارعا باعىتتاۋدى ماقسات ەتىپ وتىر”، – دەدى انافين.
ايتا كەتەيىك، بۇعان دەيىن قازاقستانداعى كەدەيلىك شەگى 2025 جىلدانباستاپ جاڭا تاسىلمەن ەسەپتەلەتىنى تۋرالى جازعان ەدىك. بۇل ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ بۇيرىعى نەگىزىندە قامتىلعان.
"2025 جىلعى 1 قاڭتاردان باستاپ كەدەيلىكشەگى مەملەكەتتىك اتاۋلى الەۋمەتتىك كومەك تاعايىنداۋعا ءوتىنىش بەرگەن توقساننىڭ الدىنداعى توقساندا ەسەپتەلگەن ورتاشا تابىستىڭ 35% مولشەرىندە، ءبىراق كورسەتىلگەن توقسان بويىنشا ەسەپتەلگەن وڭىرلىك كۇنكورىس دەڭگەيىنىڭ 70% –دان تومەن ەمەس مولشەردە ايقىندالاتىن بولادى"، دەلىنگەن بۇيرىقتا.
بۇعان دەيىن ول مەملەكەتتىك اتاۋلى الەۋمەتتىك كومەك تاعايىنداۋعا ءوتىنىش بەرگەن توقساننىڭ الدىنداعى توقسانعا ەسەپتەلگەن ەڭ تومەنگى كۇنكورىس دەڭگەيىنىڭ 70% مولشەرىندە ەسەپتەلىپ كەلگەن بولاتىن.
بۇيرىق 2025 جىلعى 6 قاڭتاردان باستاپ قولدانىسقا ەنگىزىلەدى.
ايتا كەتسەك، بۇيرىققا سايكەس، ەسەپ ەندى توقسان سايىن جۇرگىزىلەتىن بولادى. بيىلعى جىلدىڭ سوڭىندا ورتاشا جالاقى (مەدياندى) كولەمى 285 مىڭ تەڭگەنى قۇرادى، ياعني جاڭا ستاندارتتار بويىنشا تابىسى 100 مىڭ تەڭگەدەن تومەن ادامدار كەدەي سانالادى.
