بۇل تۋرالى شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان جەلىدەگى پاراقشاسىندا ەگجەي-تەگجەيلى جازىپ، قازاق ەلىنەن ءسۇيىنشى سۇرادى.
گەرمانيانىڭ دورتمۋند قالاسىندا وتكەن جارىستا شىمكەنت قالاسىنداعى ج.جابايەۆ اتىنداعى №26 مەملەكەتتىك مەكتەپ پەن №9 IT-ليسەيىنىڭ وقۋشىلارى يمانعالي مىڭجاسار مەن بيبارىس ميحاش كەزەكتى رەت وتە جوعارى دەڭگەي كورسەتىپ، العاش رەت روبوتوتەحنيكادان الەم وليمپياداسىندا 2-ورىنعا يە بولدى.
ايتا كەتۋ كەرەك، World Robot Olympiad (WRO) 2004 جىلدان بەرى وتكىزىلىپ كەلەدى. قازاقستان بالالارى بۇل وليمپياداعا 2014 جىلدان بەرى قاتىسىپ ءجۇر.
"بيىل العاش رەت وقۋشىلارىمىز جۇلدەلى ەكىنشى ورىندى يەلەندى.
بۇل وليمپيادانى جەڭبەك تۇگىلى قاتىسۋ ءۇشىن جولداما الۋدىڭ ءوزى وڭاي ەمەس. دۇنيەجۇزىنەن 15 مىڭنان اسا كوماندا قاتىسىپ، 73 ەلدەن تەك قانا 365 كوماندا جولداما العان.
گەرمانيادا وتكەن سايىستىڭ فينالىنا شىمكەنتتىڭ جامبىل جابايەۆ اتىنداعى №26 مەكتەبى مەن №9 IT-ليسەيادىڭ وقۋشىلارى يمانعالي مىڭجاسار مەن بيبارىس ميحاش شىعىپ، ەكىنشى ورىن الدى.
بۇل - ەلىمىزدىڭ ءبىلىم جۇيەسىندەگى ۇلكەن جەتىستىك. ءقازىر ءبىلىم سالاسىندا ءجۇرىپ جاتقان رەفورمالار، مۇعالىمدەر مارتەبەسى، ءبىلىم سالاسىنا كەلىپ جاتقان ينۆەستيسيا جەتىستىكتەرگە جەتەلەيتىنى حاق"، – دەدى شىڭعىس مۇقان.
ايتا كەتۋ كەرەك، سوڭعى جىلدارى شىمكەنت قالاسىنىڭ مەكتەپتەرىنە ارنايى كابينەتتەر كوپتەپ الىنىپ جاتىر.
قازىرگى تاڭدا قالاداعى 127 مەكتەپتە روبوتوتەحنيكا كابينەتى بار. وقۋشىلار بوس ۋاقىتىندا روبوت قۇراستىرۋمەن اينالىسادى.
شىڭعىس مۇقاننىڭ پايىمداۋىنشا روبوتتى تەحنيكانىڭ بولاشاعى زور.
"بوستوندا ەكى جىل تۇرعانىمدا روبوتتاردى يتشە جۇگىرتىپ قويعان Boston Dynamicsء-تىڭ جۇمىستارىن كورىپ، بولاشاقتىڭ كىلتى كىم روبوت قۇراستىرا الادى سونىڭ قولىندا ەكەن دەگەن وي كەلگەن. سونىمەن بىرگە CRISPR گەندى تۇزەۋ بيوتەحنولوگياسىنىڭ قالاي دامىپ جاتقانىن كورىپ وتىرساڭ، ءبىلىمدى جۇرتتىڭ عانا كەلەشەگى كەمەل بولاتىنى كامىل"، – دەيدى ول.
اۆتوردىڭ اتاپ وتكەنىندەي شىمكەنت قالاسىنداعى مەكتەپتەردىڭ باستاۋىش سىنىپتارىندا وسىدان ءۇش جىل بۇرىن شاحمات سىنىپتارى اشىلعان. اپتاسىنا ءبىر رەت 1-4 سىنىپ وقۋشىلارى مىندەتتى تۇردە شاحمات ساباعىنا قاتىسادى. بۇل ءوز كەزەگىندە باسقا دا پاندەردى يگەرۋگە سەپتىگىن تيگىزۋدە.
"الداعى ۋاقىتتا مىقتى شاحماتشىلار شىمكەنتتەن شىعىپ جاتسا تاڭعالماڭىز. جالپى قازاقستانداعى ءاربىر بەسىنشى وقۋشى قازاقى وڭتۇستىك ءوڭىردىڭ مەكتەپتەرىندە وقيدى. دەمەك ەل ەكونوميكاسىن كوتەرۋ ءۇشىن الدىمەن وڭتۇستىكتىڭ ءبىلىم جۇيەسىن كوتەرۋ كەرەك دەپ ويلايمىن جانە سولاي بولىپ تا جاتىر"
دەيدى شىڭعىس مۇقان.
البەتتە، بۇل جەڭىستىڭ ارتىندا ۇلكەن ەڭبەك جاتىر. ولاردى بۇعان تالىمگەرلەرى مەن اتا-اناسىنىڭ ۇلكەن سەنىمى جەتەلەدى. دارىندى بالالاردىڭ بىلىمگە دەگەن قۇشتارلىعى، ەرىك-جىگەرى، ىنتا-تالابى الەمدىك ارەناداعى جەتىستىككە اكەلدى.
شىمكەنتتىك وقۋشىلاردىڭ تابىسىن وقۋ-اعارتۋ ءمينيسترى دە ايرىقشا اتاپ ءوتىپ، مۇنى ەلىمىزدىڭ ءبىلىم جۇيەسىندەگى ۇلكەن جەتىستىككە بالادى.
"ءقازىر ءبىلىم سالاسىندا ءجۇرىپ جاتقان رەفورمالار، مۇعالىمدەر مارتەبەسى، ءبىلىم سالاسىنا كەلىپ جاتقان ينۆەستيسيا جەتىستىكتەرگە جەتەلەيتىنى حاق. بالالارعا بيىك بەلەستەردى باعىندىرا بەرۋلەرىنە تىلەكتەسپىن!»، – دەدى ايماعامبەتوۆ.
