قازاقستاندا دەپوزيتتەر بويىنشا سىياقى مولشەرلەمەسىنىڭ كورسەتكىشى اقىرىنداپ تومەندەۋدە. وندا دا تەڭگە تۇرىندەگىسىندە، دەپ حابارلايدى Dalanews.kz.

ق ر ۇلتتىق بانكتىڭ مالىمەتىنشە، قىركۇيەك ايىندا بانكتەردىڭ تەڭگە تۇرىندە تارتقان دەپوزيتتەردىڭ ورتاشا سىياقى مولشەرلەمەسى 13،4%-عا دەيىن تومەندەدى. بۇل كورسەتكىش 2022 جىلدىڭ جەلتوقسانىنان بەرگى ەڭ تومەنگى دەڭگەيدى كورسەتىپ وتىرعانىمەن، تامىز ايىمەن سالىستىرعاندا 0،1 پايىز پۋنكتكە عانا ازايعان.

جىلدىق ءتيىمدى سىياقى مولشەرلەمەنى ءالى دە 1-3 ايلىق مەرزىمگە سالىنعان دەپوزيتتەردەن بايقاۋعا بولادى: 15،4%-دى (تامىزدا بۇل كورسەتكىش 15،6% بولعان).

كرەديتتەر بويىنشا جاعداي قانداي؟

جەكە تۇلعالار مەن جەكە كاسىپكەرلەرگە ەكىنشى دەڭگەيدەگى بانكتەردىڭ ۇسىناتىن نەسيەنىڭ ورتاشا سىياقى مولشەرلەمەسى 21،6%-عا جەتتى، بۇل تامىزداعى 20،2%-دان ءسال جوعارى (تەڭگەلىك نەسيەلەر بويىنشا). سونىمەن قاتار، قىسقا مەرزىمدى نەسيەلەر (1 ايعا دەيىن، 1-3 اي، 3 ايدان 1 جىلعا دەيىن) بويىنشا مولشەرلەمەلەر تومەندەدى، ءبىراق 1 جىلدان 5 جىلعا دەيىنگى جانە 5 جىلدان جوعارى مەرزىمگە ارنالعان نەسيەلەر بويىنشا مولشەرلەمەلەر، كەرىسىنشە ءوستى. ەڭ قولايلى جاعدايلار 3 ايدان 1 جىلعا دەيىنگى نەسيەلەر بويىنشا تىركەلدى – 19،3% (-0،7 پايىزدىق پۋنكتكە تومەندەگەن).

زاڭدى تۇلعالارعا ارنالعان نەسيەلەردىڭ سىياقى مولشەرلەمەسى تامىزداعى دەڭگەيدە ساقتالىپ، 17،6%-دى قۇرادى. ەڭ تومەنگى مولشەرلەمە 1-3 اي ارالىعىنا ارنالعان نەسيەلەردە بايقالادى — 16،9% (-1،3 پايىزدىق پۋنكتكە تومەندەگەن).