Қазақстанда депозиттер бойынша сыйақы мөлшерлемесінің көрсеткіші ақырындап төмендеуде. Онда да теңге түріндегісінде, деп хабарлайды Dalanews.kz.

ҚР Ұлттық банктің мәліметінше, қыркүйек айында банктердің теңге түрінде тартқан депозиттердің орташа сыйақы мөлшерлемесі 13,4%-ға дейін төмендеді. Бұл көрсеткіш 2022 жылдың желтоқсанынан бергі ең төменгі деңгейді көрсетіп отырғанымен, тамыз айымен салыстырғанда 0,1 пайыз пунктке ғана азайған.

Жылдық тиімді сыйақы мөлшерлемені әлі де 1-3 айлық мерзімге салынған депозиттерден байқауға болады: 15,4%-ды (тамызда бұл көрсеткіш 15,6% болған).

Кредиттер бойынша жағдай қандай?

Жеке тұлғалар мен жеке кәсіпкерлерге екінші деңгейдегі банктердің ұсынатын несиенің орташа сыйақы мөлшерлемесі 21,6%-ға жетті, бұл тамыздағы 20,2%-дан сәл жоғары (теңгелік несиелер бойынша). Сонымен қатар, қысқа мерзімді несиелер (1 айға дейін, 1-3 ай, 3 айдан 1 жылға дейін) бойынша мөлшерлемелер төмендеді, бірақ 1 жылдан 5 жылға дейінгі және 5 жылдан жоғары мерзімге арналған несиелер бойынша мөлшерлемелер, керісінше өсті. Ең қолайлы жағдайлар 3 айдан 1 жылға дейінгі несиелер бойынша тіркелді – 19,3% (-0,7 пайыздық пунктке төмендеген).

Заңды тұлғаларға арналған несиелердің сыйақы мөлшерлемесі тамыздағы деңгейде сақталып, 17,6%-ды құрады. Ең төменгі мөлшерлеме 1-3 ай аралығына арналған несиелерде байқалады — 16,9% (-1,3 пайыздық пунктке төмендеген).