Qazaqstanda depozitter boiynsha syiaqy mólsherlemesiniń kórsetkishi aqyryndap tómendeýde. Onda da teńge túrindegisinde, dep habarlaidy Dalanews.kz.
QR Ulttyq banktiń málimetinshe, qyrkúiek aiynda bankterdiń teńge túrinde tartqan depozitterdiń ortasha syiaqy mólsherlemesi 13,4%-ǵa deiin tómendedi. Bul kórsetkish 2022 jyldyń jeltoqsanynan bergi eń tómengi deńgeidi kórsetip otyrǵanymen, tamyz aiymen salystyrǵanda 0,1 paiyz pýnktke ǵana azaiǵan.
Jyldyq tiimdi syiaqy mólsherlemeni áli de 1-3 ailyq merzimge salynǵan depozitterden baiqaýǵa bolady: 15,4%-dy (tamyzda bul kórsetkish 15,6% bolǵan).
Kreditter boiynsha jaǵdai qandai?
Jeke tulǵalar men jeke kásipkerlerge ekinshi deńgeidegi bankterdiń usynatyn nesieniń ortasha syiaqy mólsherlemesi 21,6%-ǵa jetti, bul tamyzdaǵy 20,2%-dan sál joǵary (teńgelik nesieler boiynsha). Sonymen qatar, qysqa merzimdi nesieler (1 aiǵa deiin, 1-3 ai, 3 aidan 1 jylǵa deiin) boiynsha mólsherlemeler tómendedi, biraq 1 jyldan 5 jylǵa deiingi jáne 5 jyldan joǵary merzimge arnalǵan nesieler boiynsha mólsherlemeler, kerisinshe ósti. Eń qolaily jaǵdailar 3 aidan 1 jylǵa deiingi nesieler boiynsha tirkeldi – 19,3% (-0,7 paiyzdyq pýnktke tómendegen).
Zańdy tulǵalarǵa arnalǵan nesielerdiń syiaqy mólsherlemesi tamyzdaǵy deńgeide saqtalyp, 17,6%-dy qurady. Eń tómengi mólsherleme 1-3 ai aralyǵyna arnalǵan nesielerde baiqalady — 16,9% (-1,3 paiyzdyq pýnktke tómendegen).
