شىرايلى شىعىس ۇزاق جىلدار بويى جازۋشىلاردىڭ، سۋرەتشىلەردىڭ، اقىنداردىڭ جانە باسقا دا شىعارماشىلىق تۇلعالاردىڭ كەشىن وتكىزەتىن مەكەنگە اينالىپ كەلەدى.  ويتكەنى قويناۋىنا قۇت دارىعان ولكە، جەرگىلىكتى تۇرعىنداردىڭ ارقاسىندا شىعارماشىل جانداردىڭ شابىتىن شىڭداپ، ونەرلەرىنە قولداۋ كورسەتۋدە.

جاھاندى جايلاعان ىندەت كوروناۆيرۋستىق ينفەكسيانىڭ تارالۋىنان تۋىنداعان ۇزاق شەكتەۋلەر، كوپ دۇنيەلەرگە كەدەرگى بولدى.  ىندەتتى تۇساپ، قالىپتى ومىرگە ورالعاننان كەيىن، شىعىس قازاقستان ونەر مۋزەيى كەلۋشىلەر الدىندا ەسىگىن ايقارا اشتى.

بۇگىندە مۇراجايدا ق ر ەڭبەك سىڭىرگەن قايراتكەرى، قازاقستان سۋرەتشىلەر وداعىنىڭ باسقارما مۇشەسى الپىسباي قازعۇلوۆتىڭ «ۋاقىت ساۋلەسى» اتتى  جەكە كورمەسى وتۋدە. الەمگە تانىمال جان سەگىز مىڭعا جۋىق كەسكىندەمە تۋىندىلارىنىڭ اۆتورى، كوللەكسيونەر، مەسەنانت، قازاقستان رەسپۋبليكاسىنىڭ "پاراسات" وردەنىنىڭ يەگەرى، ەۋروپالىق ونەر وداعى ماساريكا اتىنداعى  قۇرمەت سىيلىعىنىڭ يەگەرى الپىسباي قازعۇلوۆتىڭ كورمەلەرى بەلگيا، جۇڭگو، تۇركيا، ۇلىبريتانيا، رەسەي، جاپونيا، نيدەرلاندىدا ەلدەرىندە ءوتىپ، العامپاز ەۋروپالىقتاردى تاڭ قالدىرعان تۇلعا.

داڭقتى سۋرەتشىنىڭ وسىنداي كەڭ اۋقىمدى ەكسپوزيسياسى  وسكەمەن قالاسىندا وتۋىنە ءوڭىر باسشىسى ۇيتقى بولدى. شقو اكىمى دانيال كەنجەتاي ۇلى احمەتوۆ كورمەنى تاماشالاپ اسپىسباي نىعمەتۇلىمەن سۇحباتتاسىپ، كورمەگە ءتانتى بولىپ، ەرەكشە اسەرىن ءبىلدىردى. "ونەرتانۋشىلار اراسىندا الپىسباي قازعۇلوۆتى "تۇستەردى باعىندىرۋشى" دەپ اتايدى، ول ءتۇرلى جانرلار مەن ءتۇرلى-تۇستى گاممالاردا جۇمىس ىستەيدى. مەن وبلىس ورتالىعىنىڭ تۇرعىندارى مەن قوناقتارىنىڭ كوركەمدىككە قول تيگىزىپ، ناعىز تالانتتى ادامنىڭ كارتينالارىن كورۋگە مۇمكىندىگى بار ەكەنىنە وتە قۋانىشتىمىن" دەدى ءوڭىر باسشىسى.

زەرتتەۋشىلەردىڭ ايتۋىنشا، الپىسباي قازعۇلوۆتىڭ شىعارمالارىندا اۆتوردىڭ جارقىن اسەرلەرىنىڭ تۇتاس پاليتراسى جەڭىل ءارى اسەم تۇردە بەرىلگەن. قامقورلىقسىز جاستىق شاق تۋرالى جارقىن ەستەلىكتەر «بالالىق شاعىمنىڭ اۋىلى»، «اجەمنىڭ ءۇيى»، «ايقاس»، «ويىن»، «ءبىزدىڭ اۋلا»، «ىستىق كۇن» سياقتى جۇمىستاردا كورىنىس تاپتى.