شىعىس قازاقستان وبلىسىنىڭ اكىمى دانيال احمەتوۆ الەۋمەتتىك جەلى ارقىلى ازاماتتارمەن تىلدەسىپ، ولاردىڭ جەكە ماسەلەلەرى بويىنشا قابىلداۋ وتكىزدى.

تىكەلەي ەفير بارىسىندا ايماق باسشىسى وڭىردە قولعا الىنعان ماڭىزدى جوبالار جايىندا اڭگىمەلەدى.

– سوڭعى ۋاقىتتا وبلىس ءۇشىن الەۋمەتتىك ماڭىزى بار جوبالاردى قولعا الىپ جاتقانداردىڭ كوبەيگەنى قۋانتادى. ماسەلەن، ناتاليا ساراتوۆا وسكەمەندە ەكونوميكالىق تازا ماتەريالداردان بالاباقشالار مەن شاعىن ورتالىقتارعا ارنالعان اقىل-ويدى دامىتاتىن ويىندار مەن ويىنشىقتار ءوندىرىسىن باستادى. ەلىمىزدە وتاندىق ويىنشىقتاردىڭ بۇل باعىتتاعى ءتۇرى جوق. سونىمەن قاتار كاسىپورىندا كوپبالالى جانە جالعىزباستى انالار دا جۇمىس ىستەيدى. ءبىلىم باسقارماسىنا جوبانى زەردەلەۋدى تاپسىردىم. وبلىستا 345 بالاباقشا بار، ەگەر بۇل دامىتۋ ويىندارى بالالار ءۇشىن قىزىقتى جانە تانىمدى بولسا، وندا ءبىز وتاندىق ءوندىرۋشىنى قولدايمىز، – دەپ جازدى ايماق باسشىسى Instagram جەلىسىندەگى پاراقشاسىندا.

چەرنوبىل اەس اپات سالدارىن جويۋعا قاتىسۋشىلار اتىنان اكىمگە بايباتىر قانجىعالي جۇگىنگەن. بۇگىندە وبلىستا اتالمىش ساناتقا جاتاتىن 859 ازامات بار. د.احمەتوۆ اتاپ وتكەندەي، قىركۇيەكتىڭ سوڭىنا دەيىن اتالمىش ساناتتاعى 100 ادام الاكول شيپاجايلارىنا بيۋدجەت ەسەبىنەن ەمدەلۋگە باراتىن بولدى.

– كۋرورتولوگيا عزي عالىمدارى جۇرگىزگەن بالنەولوگيالىق زەرتتەۋ قورىتىندىسى الاكول سۋىنىڭ شيپالى ەكەنىن راستادى. جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنا چاەس قاتىسۋشىلارىن جىل بويى شقو شيپاجايلارىندا ەمدەۋمەن جانە ساۋىقتىرۋمەن قامتۋدى تاپسىردىم. الاكولدە «Alazone Arena« مادەني ويىن-ساۋىق كەشەنىنىڭ قۇرىلىسى باستالعان. بۇل 3 700 ورىندىق اشىق كونسەرتتىك الاڭ. وندا حالىقارالىق دەڭگەيدەگى فەستيۆالدار مەن كونسەرتتەر وتكىزۋدى جوسپارلاپ وتىرمىز. جوبا ينۆەستورى ارمان احمەتقانوۆ جەكە قابىلداۋ بارىسىندا ەلەكتر ەنەرگياسىن ۇزدىكسىز بەرۋ ءۇشىن ترانسفورماتورلار قاجەتتىلىگىن العا تارتتى. نىساندى ەلەكتر ەنەرگياسىمەن قامتاماسىز ەتۋ ماسەلەسى ءۇرجار اۋدانى اكىمىنىڭ باقىلاۋىنا تاپسىرىلدى، – دەدى ايماق باسشىسى.