Danial Ahmetov Instagram paraqshasynda ShQO turǵyndarymen onlain qabyldaý ótkizdi
Tikelei efir barysynda aimaq basshysy óńirde qolǵa alynǵan mańyzdy jobalar jaiynda áńgimeledi.
– Sońǵy ýaqytta oblys úshin áleýmettik mańyzy bar jobalardy qolǵa alyp jatqandardyń kóbeigeni qýantady. Máselen, Natalia Saratova Óskemende ekonomikalyq taza materialdardan balabaqshalar men shaǵyn ortalyqtarǵa arnalǵan aqyl-oidy damytatyn oiyndar men oiynshyqtar óndirisin bastady. Elimizde otandyq oiynshyqtardyń bul baǵyttaǵy túri joq. Sonymen qatar kásiporynda kópbalaly jáne jalǵyzbasty analar da jumys isteidi. Bilim basqarmasyna jobany zerdeleýdi tapsyrdym. Oblysta 345 balabaqsha bar, eger bul damytý oiyndary balalar úshin qyzyqty jáne tanymdy bolsa, onda biz otandyq óndirýshini qoldaimyz, – dep jazdy aimaq basshysy Instagram jelisindegi paraqshasynda.
Chernobyl AES apat saldaryn joiýǵa qatysýshylar atynan ákimge Baibatyr Qanjyǵali júgingen. Búginde oblysta atalmysh sanatqa jatatyn 859 azamat bar. D.Ahmetov atap ótkendei, qyrkúiektiń sońyna deiin atalmysh sanattaǵy 100 adam Alakól shipajailaryna biýdjet esebinen emdelýge baratyn boldy.
– Kýrortologiia ǴZI ǵalymdary júrgizgen balneologiialyq zertteý qorytyndysy Alakól sýynyń shipaly ekenin rastady. Jumyspen qamtý jáne áleýmettik baǵdarlamalardy úilestirý basqarmasyna ChAES qatysýshylaryn jyl boiy ShQO shipajailarynda emdeýmen jáne saýyqtyrýmen qamtýdy tapsyrdym. Alakólde «Alazone Arena« mádeni oiyn-saýyq kesheniniń qurylysy bastalǵan. Bul 3 700 oryndyq ashyq kontserttik alań. Onda halyqaralyq deńgeidegi festivaldar men kontsertter ótkizýdi josparlap otyrmyz. Joba investory Arman Ahmetqanov jeke qabyldaý barysynda elektr energiiasyn úzdiksiz berý úshin transformatorlar qajettiligin alǵa tartty. Nysandy elektr energiiasymen qamtamasyz etý máselesi Úrjar aýdany ákiminiń baqylaýyna tapsyryldy, – dedi aimaq basshysy.
