قازاقستان مۇسىلماندارى ءدىني باسقارماسى (قمدب) شاريعاتقا ساي كەلمەيتىن ءبىرقاتار تانىمال ويىنداردى اتادى، دەپ حابارلايدى Dalanews.kz Kursiv media-عا سىلتەمە جاساپ.
قمدب-نىڭ حابارلاۋىنشا، زورلىق-زومبىلىق، كىسى ءولتىرۋ، سوعىس، ءدىندى مازاق ەتۋ جانە دىنسىزدىك ەلەمەنتتەرى بار ويىندار شاريعاتقا مۇلدە قايشى. بۇل قاتارعا Counter-Strike 2، Dota 2، GTA، League of Legends، Minecraft جانە Genshin Impact سەكىلدى جوبالار كىرەدى. وعان نەگىز رەتىندە ءمايدا سۇرەسىنەن ءۇزىندى كەلتىرىلگەن.
“ءاي مۇمىندەر! اراق، قۇمار، تىگىلگەن تاستار (پۇتتار) جانە بال اشاتىن وقتار لاس، شايتاننىڭ ىستەرىنەن. ودان ساقتانىڭدار، قۇتىلارسىڭدار”، – دەپ جازىلعان ءمايدا سۇرەسىنىڭ 90-اياتىندا.
اتالعان ويىنداردا كورىنىس تاباتىن قاتىگەزدىك پەن ادامگەرشىلىككە جات ارەكەتتەر يسلام قۇندىلىقتارىنا قاراما-قايشى بولعاندىقتان، شاريعات بويىنشا ولاردى ويناۋعا تىيىم سالىنعان.
“ونىڭ ورنىنا لوگيكالىق، تانىمدىق جانە ءبىلىم بەرەتىن مازمۇنداعى ويىندارعا رۇقسات ەتىلگەن. پايعامبارىمىزدىڭ (وعان اللانىڭ سالەمى بولسىن): “جۇرەكتەرگە اندا-ساندا تىنىعۋ بەرىڭدەر” دەگەن ءحاديسى ەسكە سالا وتىرىپ، ويىن ارقىلى دەمالۋعا رۇقسات ەتىلەتىنى، ءبىراق ونىڭ شەكتەن شىقپاۋى كەرەكتىگىن ايتامىز”، – دەپ جازىلعان جاۋاپتا.
ەلەكتروندى ويىندار كەلەسى شارتتارعا ساي بولسا، تۇتاستاي تىيىم سالىنبايدى:
- ءدىني مىندەتتەردى ورىنداۋعا كەدەرگى كەلتىرمەۋى ءتيىس؛
- قۇمار ويىن ەلەمەنتتەرى بولماۋى كەرەك؛
- جەكە تۇلعا مەن پسيحيكاعا زيان كەلتىرمەۋى ءتيىس؛
- دورەكى سوزدەر، بالاعات پەن ادەپسىزدىك بولماۋى ءتيىس؛
- اقىل-ويدى دامىتىپ، تىم كوپ ۋاقىت الماۋى ءتيىس.
