بۇل تۋرالى اسحات ايماعامبەتوۆ Facebook الەۋمەتتىك جەلىسىندەگى پاراقشاسىندا ەگجەي-تەگجەيلى جازدى.
بۇل قالاي جۇزەگە اسىرىلادى؟
«ءبارى وتە قاراپايىم. مىسالى، ءتورت جىل بويى ماتەماتيكا ءمۇعالىمى ماماندىعىن وقىعان ستۋدەنت مەكتەپكە جۇمىسقا ورنالاسۋ ءۇشىن ۇلتتىق بىلىكتىلىك تەستىن تاپسىراتىن بولادى. تەستىلەۋ سۇراقتارىندا ماتەماتيكا بويىنشا مەكتەپ باعدارلاماسى مەن سول ءپان بويىنشا ساباق بەرۋ ادىستەمەسى قامتىلادى. جوعارى وقۋ ورنىندا شىن مانىندە ءتورت كۋرس وقىپ، قاجەتتى ءبىلىم العان ستۋدەنتتەرگە تەست تاپسىرۋ قيىندىق تۋدىرمايدى»، – دەدى ايماعامبەتوۆ.
ءمينيستىردىڭ ايتۋىنشا، ءبىلىمى مەن قابىلەتى بالا وقىتۋعا جەتكىلىكسىز تۇلەكتەر ءبىلىم بەرۋ ۇيىمدارىنا قابىلدانبايدى.
«بىزگە سان ەمەس، ساپا ماڭىزدى. ءتيىستى دەڭگەيدە ءبىلىمى جوق تۇلەكتەر بالالارمەن جۇمىس ىستەمەۋى كەرەك»، دەپ اتاپ ءوتتى ۆەدومستۆو باسشىسى.
سونداي-اق مينيستر 2021 جىلى وتكىزىلگەن پيلوتتىق جوبانىڭ ناتيجەلەرىنە توقتالىپ ءوتتى.
«بولاشاق پەداگوگتەردى العاش رەت تەستىلەۋ كوپتەگەن جوعارى وقۋ ورنى ءۇشىن ۇلكەن سىناق بولدى.
باستاپقىدا بەلگىلەنگەن شەكتى دەڭگەيدى ايتارلىقتاي تومەندەتكەنىمىزگە قاراماستان، تۇلەكتەردىڭ 46 پايىزى عانا قاجەتتى بالل جيناعاي العانىن ايتا كەتكەن ءجون. بۇل – تەست تاپسىرعان 32 مىڭ تۇلەكتىڭ 15 مىڭى عانا. اقپارات رەتىندە ايتا كەتەيىن، جىل سايىن ءبىلىم بەرۋ ۇيىمدارىنا 12-14 مىڭعا جۋىق پەداگوگ جۇمىسقا ورنالاسادى. ياعني، بۇل شارا ءمۇعالىم تاپشىلىعىنا ايتارلىقتاي اسەر ەتپەيدى»، – دەدى مينيستر.
مينيستر مۇنداي ناتيجە جوعارى وقۋ ورىندارىن ليسەنزياسىنان ايىرۋ، پروفيلدەۋ، ءبىلىم بەرۋ باعدارلامالارىن جاڭارتۋ جانە باسقا دا باستامالار بويىنشا مينيسترلىكتىڭ قابىلداپ جاتقان شارالارى قاجەت ءارى دۇرىس ەكەنىن ايقىن كورسەتكەنىن اتاپ ءوتتى.
«ەستەرىڭىزگە سالا كەتەيىن، بۇعان دەيىن پەداگوگتەردى ەلىمىزدىڭ 86 جوعارى وقۋ ورنى دايارلاعان بولاتىن. مينيسترلىك اتقارعان جۇمىستىڭ ناتيجەسىندە 30-دان استام جوو-نىڭ پەداگوگيكا بويىنشا ليسەنزياسى قايتارىپ الىندى.
ايتا كەتەرلىك جايت، ءبىز ليسەنزياسىن قايتارىپ العان جوعارى وقۋ ورىندارىنىڭ تۇلەكتەرى تەستىلەۋ كەزىندە ەڭ تومەن ناتيجەلەر كورسەتتى»، – دەيدى سالا باسشىسى.
ءبىراق، سونىڭ وزىندە ءالى 50-دەن استام جوعارى وقۋ ورنىنىڭ ليسەنزياسى بار، ولار پەداگوگتەردى دايارلاۋدى جالعاستىرىپ جاتىر. بارلىق ماسەلە ولاردىڭ كەيبىرىنىڭ ناتيجەلەرى وقىتۋ ساپاسىنا قويىلاتىن تالاپتارعا سايكەس كەلمەيتىندىگىندە.
«وسىعان بايلانىستى الداعى ۋاقىتتا دا ەلىمىزدە كادرلار دايارلاۋ ساپاسىن جاقسارتۋ ءۇشىن قاجەتتى شارالاردى قابىلدايتىن بولامىز، اسىرەسە، پەداگوگيكالىق باعىتتا. ەندى نەگىزگى ترەند انىقتالىپ، پەداگوگ ماماندىعى مەكتەپ تۇلەكتەرى ءۇشىن قىزىقتى بولا باستاعان كەزدە، بىزگە بولاشاق مۇعالىمدەردى جوعارى ساپادا دايارلاۋدى قامتاماسىز ەتۋ وتە ماڭىزدى»، – دەيدى ايماعامبەتوۆ
بۇرىن ۇبت ناتيجەسى بويىنشا ورتاشا بالل 55-60 بولىپ، ءتيىستى بالل جيناي الماۋ ماسەلەسى وزەكتى بولعان ەدى. ال ءقازىر وقۋعا تۇسۋشىلەردىڭ ورتاشا بالى ايتارلىقتاي ءوسىپ، 96-عا جەتتى. سونداي-اق ۇزدىك تۇلەكتەر مەن «التىن بەلگى» يەگەرلەرىنىڭ سانى دا شامامەن ەكى ەسە وسكەن.
«كەيبىر تۇلەكتەردى، اتاپ ايتقاندا، وقۋ باعدارلاماسىن ءتيىستى دەڭگەيدە يگەرمەگەن جانە العان ديپلومدارىنىڭ نەگىزىندە عانا جۇمىسقا ورنالاسۋعا نيەت بىلدىرگەندەردى ەنگىزىلگەن ءتارتىپ قۋانتپايتىنى انىق. كەيبىر ۋنيۆەرسيتەتتەرگە دە بۇل شەشىم ۇناعان جوق، ويتكەنى، بۇل ولاردىڭ جۇمىسىنىڭ دەڭگەيى مەن ساپاسىن ايقىن كورسەتتى. ءبىراق ءبىز جوعارى وقۋ ورىندارىنىڭ ءبىلىم بەرۋ قىزمەتىنىڭ ساپاسىن جاقسارتۋ ماقساتىندا، مەكتەپتە قىزمەت ەتۋگە تەك مىقتىلار كەلۋى ءۇشىن جۇمىستى ءارى قاراي جالعاستىرامىز»، – دەيدى ءبىلىم ءمينيسترى.
ۆەدومستۆو باسشىسى اتالعان ءتيىمدى تۇستارىنان بولەك، بۇل شارا ستۋدەنتتەردى ديپلوم ءۇشىن عانا وقۋعا ەمەس، شىن مانىندە ساپالى ءبىلىم الۋعا ىنتالاندىرادى دەگەن ءۇمىتى بارىن جاسىرمادى.
ال جوعارى وقۋ ورىندارى ءتيىستى ساپادا ءبىلىم بەرۋگە مىندەتتى بولادى.
«بۇل شەشىمدى بارلىعى بىردەي وڭ كوزقاراسپەن قابىلدامايتىنى بەلگىلى بولدى. ءبىراق مەن ونىڭ ماڭىزدى ءارى قاجەت ەكەنىنە سەنىمدىمىن»، – دەيدى ول.
«ەگەر ۇشقىشتار نەمەسە اۋديتورلار مەن ادۆوكاتتار قىزمەتىنە كىرىسۋى ءۇشىن جاۋاپتى ەمتيحان تاپسىراتىن بولسا، بالالارمەن جۇمىس ىستەۋدى العاش رەت باستايتىن پەداگوگتەر سىناقتان ءوتۋى قاجەت ەمەس پە؟»، – دەدى مينيستر.
