ايتىسكەر اقىن، پسيحولوگ اينۇر تۇرسىنبايەۆا جاڭادان كوماندا جيناپ، جاڭا ءبىر ىسكە جەڭ تۇرە كىرىسىپ جاتىر. "مىقتى تاۋار اينالىم جاساعاندارعا بونۋسقا باسپانا بەرىلەتىندەي جۇيە قۇردىق" دەپ تە سۇيىنشىلەپ ۇلگەرگەنى سول ەدى، ونى جاقتىرماۋشىلار بۇل جولى دا تابىلا كەتتى. ءوز كەزەگىندە ءوزىن سىناعانداردى بيزنەس "ۆۋمەن" ەلەۋسىز قالدىرماۋدى ءجون كورىپتى، دەپ جازادى Dalanews.kz.

ول بيزنەس كوزىنىڭ ءبىرى - سۇڭعىلا وسىمدىگىنىڭ شەتەلگە ساتىلىپ جاتقانىنا الاڭدايتىنىن جەتكىزدى. 

"...كىشكەنتاي كەزىمنەن سۇڭعىلانىڭ تامىرىن قىتايلار توننالاپ اكەتىپ جاتقانىن كوزىمىزبەن كوردىك. ءبىراق "قىتايلار ءبىزدى توناپ جاتىر" دەپ ءبىر ادام ايتتى ما؟! جوق! سول تامىردىڭ قىزىعىن ءوزىمىز كورەيىك دەپ زاۋىت سوقتىق، ءبىراق ءبىز توناۋشى بولىپ شىعا كەلدىك. لوگيكا قايدا؟" – دەپ جازدى اينۇر تۇرسىنبايەۆا Instagram-داعى پاراقشاسىندا. 

ايتىسكەر اقىن وزگە ەلدەردىڭ دە "سەتيەۆويلارىن" مىسالعا كەلتىردى.

"8 جىل رەسەي كومپانياسىندا جۇمىس ىستەدىك. كوماندادا 100 مىڭعا جۋىق ادام بولدى. تابىستىڭ باسىم بولىگى رەسەيگە كەتىپ جاتتى. ءبىراق بىردە-بىر سايت "ورىستار ءبىزدى توناپ جاتىر" دەپ جازدى ما؟! جوق! گەربالايف قازاقستاندا 30 جىل ۇزدىكسىز جۇمىس ىستەدى. "ءبىزدى امەريكا توناپ جاتىر" دەگەن ءبىر قازاق بولدى ما؟! جوق! ءبىز زاڭدى تۇردە تىركەلىپ، بارلىق ءونىمىمىزدى سەرتيفيكاتتاپ، ستاندارتقا ساي جۇمىس ىستەسەك تە، بىردەن سىنعا ىلىكتىك. تۇركيادان، قىتايدان، كورەيادان سەرىكتەستەرىمىز كەلىپ، ءبىزدىڭ جۇمىسىمىزعا جوعارى باعا بەردى. ءبىراق قازاقتىڭ جاۋى – قازاق! اياقتان شالىپ، قۇلاتۋدى بىلەمىز! سوزبەن سىندىرىپ، جىلاتۋدى بىلەمىز!" – دەپ اشۋلانادى ول. 

بۇعان دەيىن سايتىمىزدا "سەن ءۇشىن دۇعا ەتەمىز...اينۇر تۇرسىنبايەۆانىڭ كۇيىەۋى "ديكيي ارمانعا" قولداۋ ءبىلدىردى" دەگەن ماتەريال جاريالانعان.