Aıtysker aqyn, psıholog Aınur Tursynbaeva jańadan komanda jınap, jańa bir iske jeń túre kirisip jatyr. "Myqty taýar aınalym jasaǵandarǵa bonýsqa baspana beriletindeı júıe qurdyq" dep te súıinshilep úlgergeni sol edi, ony jaqtyrmaýshylar bul joly da tabyla ketti. Óz kezeginde ózin synaǵandardy bıznes "výmen" eleýsiz qaldyrmaýdy jón kóripti, dep jazady Dalanews.kz.

Ol bıznes kóziniń biri - suńǵyla ósimdiginiń shetelge satylyp jatqanyna alańdaıtynyn jetkizdi. 

"...Kishkentaı kezimnen suńǵylanyń tamyryn qytaılar tonnalap áketip jatqanyn kózimizben kórdik. Biraq "Qytaılar bizdi tonap jatyr" dep bir adam aıtty ma?! Joq! Sol tamyrdyń qyzyǵyn ózimiz kóreıik dep zaýyt soqtyq, biraq biz tonaýshy bolyp shyǵa keldik. Logıka qaıda?" – dep jazdy Aınur Tursynbaeva Instagram-daǵy paraqshasynda. 

Aıtysker aqyn ózge elderdiń de "setevoılaryn" mysalǵa keltirdi.

"8 jyl Reseı kompanıasynda jumys istedik. Komandada 100 myńǵa jýyq adam boldy. Tabystyń basym bóligi Reseıge ketip jatty. Biraq birde-bir saıt "Orystar bizdi tonap jatyr" dep jazdy ma?! Joq! Gerbalaıf Qazaqstanda 30 jyl úzdiksiz jumys istedi. "Bizdi Amerıka tonap jatyr" degen bir qazaq boldy ma?! Joq! Biz zańdy túrde tirkelip, barlyq ónimimizdi sertıfıkattap, standartqa saı jumys istesek te, birden synǵa iliktik. Túrkıadan, Qytaıdan, Koreıadan seriktesterimiz kelip, bizdiń jumysymyzǵa joǵary baǵa berdi. Biraq qazaqtyń jaýy – qazaq! Aıaqtan shalyp, qulatýdy bilemiz! Sózben syndyryp, jylatýdy bilemiz!" – dep ashýlanady ol. 

Buǵan deıin saıtymyzda "Sen úshin duǵa etemiz...Aınur Tursynbaevanyń kúıieýi "Dıkıı Armanǵa" qoldaý bildirdi" degen materıal jarıalanǵan.