Qazaqstanda qaryzdardy óndirip alý protsesi tsifrlandyrylyp jatyr. Memlekettik organdar banktermen ózara is-qimyldyń elektrondy tetikterin belsendi qoldana bastaǵandyqtan, azamattar aiyppul, salyq, aliment nemese basqa da bereshekterge bailanysty bank shottarynyń kútpegen jerden buǵattalýyna jii tap bolyp júr, dep habarlaidy dalanews.kz.
Qazaq Expert Club sarapshysy, ekonomika ǵylymdarynyń kandidaty, qarjyger Aigerim Iliiasovanyń sózinshe, bank shottaryna salyq organdarynyń, sottyń nemese Qarjylyq monitoring agenttiginiń sheshimi negizinde sot oryndaýshylary tyiym sala alady.
Mysaly, salyq bereshegi bar nemese mindetti eseptilikti tapsyrmaǵan azamattardyń shoty boiynsha operatsiialardy salyq organdary shekteýge quqyly. Al sot talap-aryzdy qamtamasyz etý sharasy retinde aqsha qarajatyna tyiym salýy múmkin.
Sondai-aq klienttiń qarjylyq operatsiialary kiristerdi zańdastyrýǵa qarsy zańnama aiasynda kúmándi dep tanylsa, shotqa shekteý qoiylýy yqtimal.
Shot buǵattalsa ne isteý kerek?
Eń aldymen bankten shotqa tyiymdy qai organ salǵanyn anyqtaý qajet. Ádette buǵattaý aldynda azamatqa sot oryndaýshysynan, salyq organynan nemese basqa ýákiletti mekemeden jaýapty qyzmetkerdiń bailanys derekteri kórsetilgen habarlama joldanady.
Eger azamat bereshekpen kelisse, qaryzyn ótep, ony rastaityn qujattardy tyiym salǵan organǵa usynýy kerek. Osydan keiin shekteýdi alyp tastaý rásimi bastalady.
Al eger azamat shottyń negizsiz buǵattalǵanyn eseptese, e-Otinish servisi arqyly nemese tikelei ýákiletti organǵa shaǵymdana alady.
Kei jaǵdaida shekteýler kúmándi qarjylyq operatsiialarǵa bailanysty qoiylady. Mundai kezde bank qarajattyń qaidan kelgeni jáne tólem maqsaty týraly qosymsha málimet suratady. Qajetti qujattar usynylǵan soń shekteý alynýy múmkin.
Sarapshylardyń aitýynsha, shotty buǵattaý kóp jaǵdaida ýaqytsha shara bolyp sanalady jáne máseleni sheshý úshin shot iesi belsendi áreket etýi qajet.
Qandai tólemder qorǵalǵan?
Qazaqstan zańnamasy keibir áleýmettik tólemderdi qorǵaýdy kózdeidi. Memlekettik járdemaqylar, ataýly áleýmettik kómek, áskeri qyzmetshilerge arnalǵan turǵyn úi tólemderi, alimentter jáne birqatar basqa áleýmettik tólemder túsetin arnaiy shottarǵa tyiym salynbaidy.
Alaida bul qorǵanys qarajat arnaiy shotqa túsken jaǵdaida ǵana qoldanylady. Eger áleýmettik tólemder qarapaiym aǵymdaǵy shotqa aýdarylsa, ol qarajatqa da tyiym salynýy múmkin.
Sondyqtan járdemaqy men áleýmettik tólem alýshylarǵa aldyn ala arnaiy shot ashyp qoiǵan jón. Mundai shotty bank bólimshesinde nemese kóptegen bankterdiń mobildi qosymshalary arqyly ashýǵa bolady. Sonymen qatar áleýmettik tólemderge arnalǵan jeke karta rásimdeý múmkindigi de qarastyrylǵan.
