كەيىنگى جىلدارى شۋ قالاسى №40 شاعىن ورتالىقتى مەكتەپ-ليسەيىنىڭ وقۋشىلارى اراسىندا  بىرنەشە ءپان وليمپيادالارى، ونەر بايقاۋى، سپورتتىق سايىستار سىندى ءتۇرلى جارىستاردا جۇلدەگەرلەر قاتارىنان كورىنىپ، مەكتەپ ابىرويىن اسقاقتاتىپ جۇرگەن وقۋشىلار سانى ارتىپ كەلەدى. سونىڭ جارقىن دالەلدەرىنىڭ ءبىرى – جۋىردا عانا اتالمىش ءبىلىم ورداسىنىڭ 4 «ب» سىنىپ وقۋشىسى تولە سارسەبايدىڭ تاراز قالاسىندا، بۇلدىرشىندەر مەن مەكتەپ وقۋشىلارى اراسىندا وتكەن رەسپۋبليكالىق بايقاۋدان باس جۇلدەنى يەلەنىپ قايتۋى.

ول «Talents of Kazakhstan» دەپ اتالعان ونەر مەن ءبىلىم باسەكەسىندە «اسپاپتا ورىنداۋشىلىق» جانرى بويىنشا ونەر كورسەتىپ، ناقتى ايتقاندا سەكەن تۇرىسبەكوۆتىڭ «كوڭىل تولقىنى» كۇيىن لايىقتى ورىنداپ، قازىلار القاسىنىڭ جوعارى باعاسىنا يە بولدى. مۇنداي جەتىستىككە قول جەتكىزۋدە ءوزى ءبىلىم الىپ جۇرگەن شۋ قالاسىنداعى №1 قالالىق ساز مەكتەبىندەگى جەتەكشىسى بەكزادا ماليكوۆانىڭ دا وزىندىك ىقپالى زور ەكەنىن ايتا كەتكەن ءجون. «تالاپتىعا نۇر جاۋار» دەمەكشى، بوس ۋاقىتىن ونەرگە ارناپ، ونىڭ ىشىندە ۇلتتىق ونەرمەن سۋسىنداپ جۇرگەن تولەدەي جاس شاكىرتتىڭ شىعار بيىگى ءالى دە الدا دەپ بىلەمىز. ورايى كەلگەندە ايتا كەتۋ كەرەك، اياز بەتپايەۆ پەن ءابدىمومىن جەلدىبايەۆتار شىققان كيەلى شۋ ولكەسى دارىندى ونەرپازدارعا وتە باي. ماسەلەن، وتكەن جىلى عانا شۋ اۋدانىنىڭ «اسەم اۋەن» فولكلورلىق ءانسامبلى تۇركيا مەملەكەتىندەگى حالىقارالىق «انادولۋ» فەستيۆالىنە قاتىسىپ قايتان بولاتىن. ايتا كەتۋ كەرەك، شۋلىقتار وسىمەن 15ء-شى مارتە ۇيىمداستىرىلىپ وتىرعان شاراعا قازاقستاننىڭ تۇركياداعى ەلشىلىگىنىڭ ارنايى شاقىرتۋىمەن بارعان.

ەلىمىزدىڭ اتىنان ونەر كورسەتكەن شىعارماشىلىق توپتى شۋ اۋدانى اكىمىنىڭ ورىنباسارى كلارا قوجاعاپپانوۆا، وبلىس اكىمدىگىنىڭ مادەنيەت، ارحيۆتەر جانە قۇجاتتاما باسقارماسىنىڭ باس مامانى ەركەجان سەمبايەۆا، وبلىستىق حالىق شىعارماشىلىعى ورتالىعىنىڭ كوركەمدىك جەتەكشىسى ەلميرا دۇتبايەۆا جانە قازاقستاننىڭ ەڭبەك سىڭىرگەن قايراتكەرى اۋەسحان كەلگەنبايەۆ سىندى تۇلعالار باستاپ بارعان ەدى. ون كۇنگە جالعاسقان ءداستۇرلى فەستيۆالگە ءبىرقاتار تۇركى تىلدەس مەملەكەتتەر مەن تۇركيانىڭ جەرگىلىكتى ونەر جۇلدىزدارى قاتىسىپ، ءوز ونەرلەرىن ورتاعا سالدى. شارانىڭ ەكىنشى كۇنىندە ونەر كورسەتكەن شۋلىقتار 50 مىڭ كورەرمەننىڭ نازارىنا ءابدىمومىن جەلدبىبايەۆتىڭ «ەركە سىلقىم» كۇيىن، ەسكەندىر حاسانعالييەۆتىڭ «اتامەكەن»، مەلس وزبەكوۆتىڭ «تولقيدى شۋىم» ءانىن، ارمان بەكسۇلتاننىڭ «ەلگە تىلەك» جانە مايلىقوجانىڭ «وسيەت» تەرمەسى مەن «جان ەركەم»، «قۇربىم-اي»، «دەي سالدىم-اي»، «اۋىلىڭ سەنىڭ ىرگەلى» سىندى حالىق اندەرىن ۇسىندى. ەلىمىزدىڭ ۇلتتىق ونەرىن انادولۋ جەرىندە لايىقتى تانىستىرا بىلگەن «اسەم اۋەن» فولكلورلىق ءانسامبلىنىڭ ونەرىن تۇرىكتىڭ «بەنگۇ» ارناسى تىكەلەي ەفيردەن تاراتىپتى. مىنە، وسىنىڭ ءوزى شۋلىقتاردىڭ ونەر سالاسىنداعى الار ورنىن ايقىنداپ تۇرعانداي.

 

شۋ اۋدانى