قازاقستاندا باسپانا الۋعا ءوتىنىش بەرۋ جانە ونى ءبولۋ پروسەسى تولىق اۆتوماتتاندىرىلادى. ونەركاسىپ جانە قۇرىلىس مينيسترلىگى “تۇرعىن ۇيمەن قامتاماسىز ەتۋ ورتالىعى” اقپاراتتىق جۇيەسىن ازىرلەۋدى قولعا الدى، دەپ حابارلايدى Dalanews.kz.
ايتا كەتەيىك، 2024 جىلى 22 قاراشادا پرەزيدەنت “تۇرعىن ءۇي ساياساتىن رەفورمالاۋ تۋرالى” زاڭعا قول قويدى. زاڭ اياسىندا اكىمدىكتەردىڭ تۇرعىن ءۇيدى تىركەۋ، ەسەپكە الۋ جانە ءبولۋ فۋنكسيالارى “وتباسى بانكىنە” بەرىلەدى. سونىمەن قاتار زاڭ 2024 جىلدىڭ 4 جەلتوقسانىندا كۇشىنە ەنگەن جەكەشەلەندىرۋ ەرەجەلەرىن قوسپاعاندا، 2025 جىلى 24 مامىردا كۇشىنە ەنەدى.
قازىرگى ۋاقىتتا “وتباسى بانكى” بازاسىندا بەرىلگەن فۋنكسيالاردى ورتالىقتاندىرىلعان تۇردە جۇزەگە اسىراتىن “تۇرعىن ۇيمەن قامتاماسىز ەتۋ ورتالىعى” اقپاراتتىق جۇيەسى ازىرلەنىپ جاتىر.
اقپاراتتىق جۇيە سەگىز مەملەكەتتىك دەرەكتەر بازاسىمەن بىرىكتىرىلگەن جانە 120 مىڭنان استام قىزمەت كورسەتەتىن Smart Data Ukimet جۇيەسىمەن ينتەگراسيالاۋ سوڭعى ساتىدا تۇر.
ءبىرىڭعاي اقپاراتتىق جۇيەنى قۇرۋ “ءبىر تەرەزە” قاعيداتىن قامتاماسىز ەتەدى. ازاماتتاردىڭ بارلىق ءوتىنىشى ونلاين قابىلدانىپ، باسپانا اۆتوماتتاندىرىلعان رەجيمدە بولىنەتىن بولادى. ءاربىر ءوتىنىم ءۇشىن وتباسىنىڭ سيفرلىق پورترەتى جاسالادى، ول كىرىستى، مۇلىكتى جانە اكتيۆتەردى كورسەتەدى.
ەندى تۇرعىن ءۇيدى تىركەۋ جانە مەملەكەتتىك قولداۋ شارالارىن ءبولۋ تۋرالى شەشىمدەردى “وتباسى بانكى” اقپاراتتىق جۇيەسى ارقىلى قابىلدايتىن بولادى.
بۇگىنگى كۇنى تىركەلگەن ازاماتتار تۋرالى اقپارات پيلوتتىق نەگىزدە قابىلدانىپ، “تۇرعىن ۇيمەن قامتاماسىز ەتۋ ورتالىعى” اقپاراتتىق جۇيەسىن تەستىلەۋ جۇرگىزىلۋدە.
