Qazaqstanda baspana alýǵa ótinish berý jáne ony bólý prosesi tolyq avtomattandyrylady. Ónerkásip jáne qurylys mınıstrligi “Turǵyn úımen qamtamasyz etý ortalyǵy” aqparattyq júıesin ázirleýdi qolǵa aldy, dep habarlaıdy Dalanews.kz.
Aıta keteıik, 2024 jyly 22 qarashada Prezıdent “Turǵyn úı saıasatyn reformalaý týraly” zańǵa qol qoıdy. Zań aıasynda ákimdikterdiń turǵyn úıdi tirkeý, esepke alý jáne bólý fýnksıalary “Otbasy bankine” beriledi. Sonymen qatar Zań 2024 jyldyń 4 jeltoqsanynda kúshine engen jekeshelendirý erejelerin qospaǵanda, 2025 jyly 24 mamyrda kúshine enedi.
Qazirgi ýaqytta “Otbasy banki” bazasynda berilgen fýnksıalardy ortalyqtandyrylǵan túrde júzege asyratyn “Turǵyn úımen qamtamasyz etý ortalyǵy” aqparattyq júıesi ázirlenip jatyr.
Aqparattyq júıe segiz memlekettik derekter bazasymen biriktirilgen jáne 120 myńnan astam qyzmet kórsetetin Smart Data Ukimet júıesimen ıntegrasıalaý sońǵy satyda tur.
Biryńǵaı aqparattyq júıeni qurý “bir tereze” qaǵıdatyn qamtamasyz etedi. Azamattardyń barlyq ótinishi onlaın qabyldanyp, baspana avtomattandyrylǵan rejımde bólinetin bolady. Árbir ótinim úshin otbasynyń sıfrlyq portreti jasalady, ol kiristi, múlikti jáne aktıvterdi kórsetedi.
Endi turǵyn úıdi tirkeý jáne memlekettik qoldaý sharalaryn bólý týraly sheshimderdi “Otbasy banki” aqparattyq júıesi arqyly qabyldaıtyn bolady.
Búgingi kúni tirkelgen azamattar týraly aqparat pılottyq negizde qabyldanyp, “Turǵyn úımen qamtamasyz etý ortalyǵy” aqparattyq júıesin testileý júrgizilýde.
