Qazaqstandyq jattyqtyrýshy Maksat Aiazbaev Úndistanda kámeletke tolmaǵan sportshyǵa qatysty qylmystyq is boiynsha izdeýge jariialandy. Qazaqstannyń Syrtqy ister ministrligi oǵan konsýldyq-quqyqtyq kómek kórsetilip jatqanyn málimdedi, dep habarlaidy dalanews.kz.
Úndistannyń Times of India basylymynyń málimetinshe, 34 jastaǵy Maksat Aiazbaev Úndistannyń velosport quramasymen jumys istegen. Ol Patiala qalasyndaǵy Ulttyq joǵary sheberlik ortalyǵynda kámeletke tolmaǵan sportshyǵa qatysty boljamdy qylmys boiynsha POCSO zańyna sáikes tergelip jatqan iske qatysy bar tulǵa retinde atalǵan.
Patiala politsiiasy Aiazbaevty izdeýge jariialaǵan. Politsiianyń aǵa sýperintendentiniń aitýynsha, aryz túskennen keiin onyń qaida ekeni belgisiz bolǵan. Quqyq qorǵaý organdary onyń tólqujatyn tárkilep, izdestirý úshin eki top qurǵan.
Qazaqstannyń Syrtqy ister ministrligi bul jaǵdaidan habardar ekenin rastady.
«Ministrlik Úndistandaǵy Qazaqstan Respýblikasynyń azamatyna qatysty jaǵdaidan habardar. Qazaqstandyq diplomattar atalǵan azamattyń týystarymen bailanysta. Oǵan konsýldyq-quqyqtyq kómek kórsetilýde. Ministrlik bul máseleni baqylaýynda ustap otyr», – dep habarlady SIM.
Qazaqstan velosport federatsiiasy da Aiazbaevtyń sońǵy jyldary Qazaqstannan tys jerde Úndistan tarapymen jasalǵan kelisimshart boiynsha jumys istegenin rastady. Ol Úndistannyń ulttyq quramasyn daiarlaýmen ainalysqan.
Federatsiia mamannyń qazirgi ýaqytta Qazaqstan ulttyq quramasyna qatysy joq ekenin atap ótti.
Uiymnyń málimetinshe, Úndistannyń quqyq qorǵaý organdary tergeý júrgizip jatyr, al Úndistan velosport federatsiiasy tergeý aiaqtalǵanǵa deiin jattyqtyrýshynyń qyzmetin toqtatqan.
Federatsiia istiń barlyq mán-jaiy anyqtalyp, tergeý aiaqtalǵanǵa deiin aldyn ala qorytyndy jasamaýǵa shaqyrdy. Uiym adamnyń kinási tek zańda belgilengen tártippen dáleldengen jaǵdaida ǵana anyqtalatynyn atap ótti.
