Astanada ýniversitet jataqhanasynyń komendanty stýdentter men qyzmetkerlerden zańsyz aqsha jinap, sheteldik azamattarǵa ýaqytsha tirkeý rásimdegeni úshin 2 jylǵa bas bostandyǵynan aiyryldy, dep habarlaidy dalanews.kz.
Astana qalasynyń qylmystyq ister jónindegi aýdanaralyq soty B.-ǵa qatysty aiyptaý úkimin 25 qyrkúiekte jariialady.
Sot anyqtaǵandai, sottalýshy ýniversitetterdiń birinde jataqhana komendanty bolyp jumys istep, bes jyl boiy stýdentter men qyzmetkerlerden ai saiyn 14 300 teńgeden jinap otyrǵan. Ol bul qarajatty ýniversitet basshylyǵynyń tapsyrmasy boiynsha jinap jatqanyn aitqan. Alaida sot onyń mundai aqsha jinaýǵa zańdy negizi bolmaǵanyn anyqtady.
Osy áreket saldarynan ýniversitetke 3 mln teńgeden astam materialdyq zalal keltirilgen. Keltirilgen shyǵyn ótelmegen.
Sonymen qatar komendant ýniversitet qujattaryn qoldan jasap, sheteldik azamattarǵa ýaqytsha turýǵa tirkeý rásimdeý úshin «Azamattarǵa arnalǵan úkimet» memlekettik korporatsiiasyna tiisti ótinishter jibergen.
Sot málimetinshe, 2024 jylǵy 16 qyrkúiek pen 2025 jylǵy 13 aqpan aralyǵynda ýniversitet jataqhanasynda 57 sheteldik azamat tirkelgen. Sottalýshy olardyń árqaisysyn tirkegeni úshin 40 myń teńgeden alǵan.
Sotta onyń kinási jábirlenýshi ókiliniń jáne kýálardyń aiǵaqtarymen, saraptama qorytyndylarymen, zattai dáleldemelermen jáne qylmystyq is materialdarymen dáleldengen.
Sottalýshy kinásin moiyndamai, ózin aqtaýdy suraǵan.
Sot qylmystyq quqyq buzýshylyqtardyń jiyntyǵyn, olardyń mán-jaiy men aýyrlyǵyn jáne keltirilgen zalaldyń ótelmegenin eskere otyryp, B.-ǵa 2 jylǵa bas bostandyǵynan aiyrý jazasyn taǵaiyndady. Sonymen qatar ol uiymdyq-ókimdik jáne ákimshilik-sharýashylyq fýnktsiialardy júzege asyrýǵa bailanysty laýazymdardy atqarý quqyǵynan 3 jylǵa aiyryldy.
Sot jazany jeńildetetin mán-jai retinde onyń kámeletke tolmaǵan balasy baryn jáne buryn sottalmaǵanyn eskerdi. Aýyrlatatyn mán-jailar anyqtalǵan joq.
Jábirlenýshiniń azamattyq talap-aryzy qanaǵattandyryldy.
Úkim ázirge zańdy kúshine engen joq.
