تۇركىستان وبلىسىندا الەۋمەتتىك ماڭىزى بار ازىق-تۇلىك تاۋارلارىنا باعالاردى تۇراقتاندىرۋ جانە باعانىڭ نەگىزسىز ءوسۋىن الدىن الۋ ماقساتىندا تۇركىستان قالاسىندا وبلىستىق كاسىپكەرلىك جانە ساۋدا باسقارماسىنىڭ ۇيىتقى بولۋىمەن ارنايى جيىن بولىپ ءوتتى.

كەزدەسۋگە باسەكەلەستىكتى قورعاۋ جانە دامىتۋ دەپارتامەنتى، وبلىستىق ستاتيستيكا دەپارتامەنتى مەن اۋىل شارۋاشىلىعى باسقارماسى، وبلىستىق تۇراقتاندىرۋ قورى باسشىلارى، سونداي-اق تۇركىستان قالاسىنداعى ءىرى ساۋدا ماركەتتەرى مەن كوتەرمە ساۋدا بازارلارىنىڭ باسشىلارى قاتىستى. باسقوسۋدا الەۋمەتتىك ماڭىزى بار ازىق-تۇلىك تاۋارلارىنىڭ باعالارىنا مونيتورينگ بارىسى مەن باعا ءوسىمىن الدىن الۋعا قارسى باعىتتالعان شارالاردى  ىسكە اسىرۋ جۇمىستارى تالقىلاندى.

وبلىس اكىمدىگىمەن قابىلدانعان قاعيدا تالاپتارى مەن كاسىپكەرلەر ءۇشىن جاسالعان جاعدايلاردىڭ ءتيىمدى جاقتارى جان-جاقتى ءتۇسىندىرىلدى. وبلىس تۇرعىندارى ءۇشىن ماڭىزدىسى، ساۋدا ورىندارى باسشىلارىمەن ءوزارا تۇسىنىستىك جاعدايىندا بىرلەسكەن شارالاردى اتقارۋ جونىندە ناقتى شەشىم قابىلداندى. دەمەك، الداعى ۋاقىتتا بارلىق الەۋمەتتىك ماڭىزى بار ازىق-تۇلىك تاۋارلارىنىڭ باعاسى تولىق وبلىستىق اكىمدىكتىڭ باقىلاۋىندا بولادى.

ايتا كەتەرلىگى، تۇركىستان وبلىسى اكىمدىگىنىڭ 2019 جىلعى 4 قاراشاداعى «الەۋمەتتىك ماڭىزى بار ازىق-تۇلىك تاۋارلارىنا باعالاردى تۇراقتاندىرۋ تەتىكتەرىن ىسكە اسىرۋدىڭ قاعيدالارىن بەكىتۋ تۋرالى» №256 قاۋلىسى بەكىتىلگەن بولاتىن.

 

تۇركىستان وبلىسى وڭىرلىك كوممۋنيكاسيالار قىزمەتى