تاياۋدا شىمكەنتتە وتكەن XII ازاماتتىق فورۋمدا ەلىمىزدىڭ تۇكپىر-تۇكپىرىنەن كەلگەن قوعام بەلسەندىلەرى باس قوسىپ، مەگاپوليستىڭ تۇراقتى دامۋى، ازاماتتىق قوعامنىڭ ءرولى، مەملەكەتتىك ورگاندارمەن ارىپتەستىك جايى كەڭىنەن تالقىلاندى. ءۇش كۇنگە سوزىلعان شارا بارىسىندا جاستاردىڭ بەلسەندىلىگى، الەۋمەتتىك تاپسىرىستىڭ اشىقتىعى، ينكليۋزيۆتى ءبىلىم مەن الەۋمەتتىك قورعاۋ ماسەلەلەرى كوتەرىلدى. Dalanews.kz اقپاراتتىق پورتالى تىلشىلەرى قوعامدىق ساراپشى، فورۋم جۇمىسىنا قاتىسقان مارات تولەبايەۆ ءبىزدىڭ ساۋالدارىمىزعا جاۋاپ بەرىپ، پىكىرىن ءبىلدىردى.
– مارات تۇرسىنباي ۇلى، شىمكەنتتە وتكەن XII ازاماتتىق فورۋم جايلى جالپى اسەرىڭىزدى بولىسسەڭىز؟
– مەن بۇل جولعى شىمكەنت قالاسىندا وتكەن فورۋمدى ەرەكشە باعالايمىن. «Qyzgaldaq» سارايىنىڭ تورىندە باستالعان جيىن ادەتتەگى ەسەپتى باسقوسۋ ەمەس، ەلدىڭ ءار ايماعىنان جينالعان ازاماتتىق قوعام وكىلدەرىنىڭ شىنىمەن دە پىكىر الماسىپ، بىر-بىرىنەن ۇيرەنگەن ورتاعا اينالدى.
ءۇش كۇنگە سوزىلعان شاراعا تەك ۇەۇ بەلسەندىلەرى ەمەس، ايماقتارداعى ىشكى ساياسات باسقارمالارىنىڭ وكىلدەرى، ءتۇرلى مەملەكەتتىك ورگاندار مەن شەتەلدىك سەرىكتەستەر قاتىستى. ماسەلەن، باتىس قازاقستان وبلىسىنىڭ اكىمدىگى توعىز ادامنان تۇراتىن دەلەگاسيا جىبەرىپ، تاجىريبە ءبولىستى. وسىنداي دەڭگەيدەگى قاتىسۋشىلاردىڭ باسىن قوسۋ – شىمكەنت ءۇشىن مارتەبە، ەل ءۇشىن قاجەتتى قادام.
فورۋمعا قالا اكىمى دە، ونىڭ ورىنباسارلارى دا، ىشكى ساياسات باسقارماسىنىڭ باسشىلارى قاتىسا المادى. ارينە، ۇيىمداستىرۋشىلاردىڭ اتىنان كەشىرىم ايتىلدى، ءبىراق مۇنداي بەيجايلىقتى ەلەمەي وتە المايمىز. قازاقستان ازاماتتىق اليانسىنىڭ ءتورايىمى بانۋ نۇرعازييەۆا دا بۇل جاعدايعا اشىق نارازىلىعىن ءبىلدىردى. ازاماتتىق قوعامدى دامىتامىز دەسەك، الدىمەن ديالوگ مادەنيەتىنەن باستاۋىمىز كەرەك. حالىققا اشىق بولۋ – جاي ءسوز ەمەس، ناقتى ارەكەت.
– ال فورۋمدى ۇيىمداستىرۋ دەڭگەيىن قالاي باعالايسىز؟
– ۇيىمداستىرۋ ساپاسى جوعارى بولدى. شىمكەنتتەگى ازاماتتىق اليانستىڭ ءتوراعاسى جۇماعالي بىلىسبەكوۆ، يۋسۋپ ارزىحانوۆ پەن قوعامدىق رەسۋرس ورتالىعىنىڭ جەتەكشىسى سارا يمباروۆا بار كۇشىن سالىپ، فورۋمدى ويداعىداي وتكىزدى. بۇل ازاماتتاردىڭ ەڭبەگىن ەرەكشە اتاپ وتكىم كەلەدى. ولار بيلىكتىڭ بەيقامدىعىن ۇيىمشىلدىقپەن جۋىپ-شايىپ، فورۋمنىڭ مازمۇنىن ساقتاپ قالدى.
– باسقوسۋدا قانداي ماسەلەلەر ءسوز بولدى؟
– فورۋمدا قۇقىق قورعاۋ ورگاندارى مەن تۇزەتۋ مەكەمەلەرىنىڭ وكىلدەرى فورۋمدا كوزگە كورىنبەدى. ۇەۇ تاراپىنان تۇسكەن كوپتەگەن ارىز-شاعىمدار، اسىرەسە سىبايلاس جەمقورلىققا قاتىستى حاتتار جاۋاپسىز قالىپ جاتقانىنا جيىنعا قاتىسۋشىلار قىنجىلىسىن ءبىلدىردى. باسقوسۋدا قوعامدىق كەڭەستىڭ مۇشەسى قايرات بيتاسوۆ تا وسىنى اشىق ايتتى. ونىڭ ءسوزى زالداعىلاردىڭ قولداۋىنا يە بولعانىن ايتا كەتۋىمىز كەرەك.
– شىمكەنتتەگى جاستاردىڭ بەلسەندىلىگى جونىندە نە ايتا الاسىز؟
– جاستاردىڭ بەلسەندىلىگى جوعارى. فورۋمعا قاتىسقان كرەاتيۆتى جاستار ۇيىمدارى ەلدىڭ بولاشاعىنىڭ بار ەكەنىن دالەلدەدى. سولارعا قولداۋ كورسەتىپ، بيزنەس پەن بيلىك سەرىكتەستىك تانىتسا، ۇلكەن جەتىستىكتەرگە جەتەمىز. ينكليۋزيا تاقىرىبى دا نازاردان تىس قالمادى. ەرەكشە قاجەتتىلىگى بار بالالاردى، ونىڭ ىشىندە اۋتيزم، سپيد سەكىلدى ماسەلەلەردى كوتەرگەن جوبالار تانىستىرىلدى. بۇل قوعامىمىزدىڭ قانشالىقتى كۇردەلى تاقىرىپتاردى كوتەرە باستاعانىن كورسەتەدى.
ءوز باسىم شىمكەنتتەگى ازاماتتىق قوعامنىڭ الەۋەتى زور دەپ ەسەپتەيمىن. ۇلكەن مەگاپوليسكە ساي ازاماتتىق قوعامعا بيلىك پەن بيزنەس سەرىكتەس بولۋى ءتيىس. ال ازىرگە قوعام بەلسەندىلەرى جاۋاپكەرشىلىكتى وزدەرى كوتەرىپ كەلەدى. شىمكەنت قالاسى ىشكى ساياسات باسقارماسىنىڭ وكىلدەرى بيىل ۇەۇ-عا ارناپ عيمارات بەرەتىنىن جانە قىركۇيەكتە اتقارۋشى بيلىك پەن ازاماتتىق اليانس اراسىندا كەزدەسۋ وتەتىنىن ايتتى. ەگەر وسى ۋادەلەر ورىندالسا، ءبىز العا قادام باسامىز.
– جيىندا جاڭا زاڭ قابىلداۋ ماسەلەسى دە قوزعالعان ەكەن...
– ءيا، فورۋمدا جاڭا زاڭ قاجەتتىلىگى دە ءسوز بولدى. ۇەۇ تۋرالى قولدانىستاعى زاڭ زامان تالابىنا ساي ەمەس. بۇل ماسەلە اشىق پىكىرتالاس تۋدىردى. ايماقتاردان كەلگەن دەلەگاسيالار ءوز وڭىرلەرىندەگى قوعامدىق كەڭەستەردىڭ قۇرامىن ءوز ويلارىن ورتاعا سالدى. ويتكەنى كەڭەتە ۇەۇ وكىلدەرى جوق، تەك بۇرىنعى اكىمدەر مەن ءماسليحات دەپۋتاتتارى وتىر. بۇل – قوعامدىق كەڭەستىڭ جۇمىسىن تۇرالاتۋى مۇمكىن.
– فورۋمدى قورىتا ايتقاندا، قانداي ناتيجە كۇتەسىز؟
– فورۋمدى قورىتىندىلاي كەلە ايتارىم: ءبىزدىڭ ازاماتتىق قوعام ءوسىپ كەلەدى، پىكىرى مەن ۇسىنىسى بار. ءبىراق سول قوعامعا لايىق سەرىكتەس بيلىك تە بولۋى كەرەك. شىمكەنتتىڭ تۇراقتى دامۋى ءۇشىن ءاربىر داۋىس ەستىلۋى ءتيىس. بۇگىنگى فورۋم وسى جولدا ماڭىزدى قادام بولدى. ءالى تالاي سىن بار، ءبىراق العا جىلجۋعا جىگەر دە بار. مەن ازاماتتىق قوعامنىڭ كۇشىنە سەنەمىن، ويتكەنى ول – حالىقتىڭ شىنايى ءۇنى.
