بارلىق مەديسينالىق تالاپتارعا تولىق سايكەس كەلەتىن كارديوورتالىقتىڭ وبلىستىق دەڭگەيدەگى كلينيكالاردان ەش كەمدىگى جوق. ەسەسىنە بۇدان بىلاي وبلىس ورتالىعىنان قاشىقتا جاتقان اۋدان تۇرعىندارى وسكەمەنگە اعىلماي، ىرگەدەگى اياگوزگە كەلىپ ەم-دوم الا الادى.
اياگوز حالقىنان بولەك، ءدال وسى ورتالىقتا تارباعاتاي، جارما جانە ءۇرجار اۋدانىنىڭ تۇرعىندارىنا دا ساپالى مەديسينالىق كومەك كورسەتىلەدى.
وسىناۋ نىساننىڭ قۇرىلىس جۇمىسىمەن تانىسقان ءوڭىر باسشىسى دانيال احمەتوۆ ازىرگى اتقارىلىپ جاتقان جۇمىسقا وڭ باعا بەردى. اتاپ وتەرلىگى اياگوزدەگى كارديوورتالىق ءبىر جاعىنان اۋداندىق اۋرۋحانا نەگىزىندە سالىنۋدا.
"مۇنداي ورتالىقتىڭ قابىرعاسىن قالاعانىمىز وبلىستاعى مەديسيناعا قاتىستى ءبىراز ماسەلەنى شەشەدى. سەبەبى مۇنداي نىسان سالۋ قاجەتتىگى بۇدان بىرنەشە جىل بۇرىن تۋىنداعان. وسى كۇنگە دەيىن وتكىر نەمەسە جەدەل كارديولوگيالىق پاتولوگياسى بار ازاماتتاردىڭ كوپشىلىگىن وسكەمەن مەن سەمەيدەگى، نۇر-سۇلتان مەن الماتى قالاسىنداعى كارديوكلينيكالارعا ەم-دوم قابىلداۋعا باعىتتايتىن ەدىك.
ەندىگى جەردە اۋدان تۇرعىندارىن ءوزىمىز قابىلداپ، ءتيىستى مەديسينالىق كومەك كورسەتەمىز"، - دەيدى اۋرۋحانانىڭ باس دارىگەرى شالقار وماروۆ.
ايتا كەتەلىك اياگوزدەگى كارديوورتالىقتى جوندەۋ جۇمىستارى بيىلعى جىلدىڭ اقپان ايىندا باستالىپ كەتكەن. ءقازىر وسىناۋ ورتالىقتى جوندەۋ جۇمىسى 60 پايىزعا اياقتالعان.
نىسانداعى قۇرىلىس-مونتاجداۋ جۇمىستارى 1 ماۋسىمعا دەيىن تولىقتاي اياقتالادى.
شالقار وماروۆتىڭ ايتۋىنشا مەديسينالىق قۇرال-جابدىق تولىق ساتىپ الىنعان. قۇرىلىس جۇمىستارى مارەسىنە جەتكەسىن، مامىر ايىنىڭ اياعىنا تامان مەديسينالىق رەنتگەن-انگيوگرافيالىق قۇرىلعىسى ورناتىلادى.
– مۇندا سونىمەن قاتار كومپيۋتەرلىك توموگرافيا دا بار. بۇدان بولەك اۋرۋحانادا ناۋقاستاردى وتتەگىمەن قامتاماسىز ەتۋ جۇمىسى جولعا قويىلعان. مۇندا وتكىر نەمەسە جەدەل كارديولوگيالىق پاتولوگياسى بار ناۋقاستار ەمدەلەتىن بولادى. بىزدە ينسۋلت ورتالىعى ناتيجەلى جۇمىس ىستەپ تۇر. ەكى جىلدىڭ ىشىندە 1 870 ادامدى ەمدەپ، 970 ادامدى وڭالتۋدان وتكىزدىك، - دەيدى شالقار وماروۆ.
ءوز كەزەگىندە شقو اكىمى دانيال احمەتوۆ قۇرىلىس جۇمىستارىنا وڭ باعا بەردى. سونىمەن قاتار اكىم اياگوز اۋداندىق ورتالىق اۋرۋحاناسىنداعى بىلتىرعى جىلى مەديسينالىق قىزمەت كورسەتۋ بويىنشا ءىىى دەڭگەيگە وتكەن بوسانۋ بولىمشەسىنە باردى.
– بۇل اۋدانداعى مەديسينانىڭ جاڭا دەڭگەيى دەپ بىلەمىن. الداعى ۋاقىتتا مۇندا انيوگراف قويىلادى. سول كەزدە اياگوزدەگى اۋداندىق اۋرۋحانانىڭ قىزمەت كورسەتۋ دەڭگەيى وسكەمەن مەن سەمەيدەن ەش كەم بولمايدى. وسى اۋرۋحانادا تەر توگىپ جۇرگەن 15 دارىگەر ەۋروپاعا ارنايى بارىپ، بىلىكتىلىكتەرىن ارتتىرىپ قايتتى. بۇل وبلىستاعى مەديسينانىڭ العا جىلجۋىنىڭ ناقتى بەلگىسى، - دەدى دانيال احمەتوۆ.
ساپار سوڭىندا وبلىس اكىمى بەس قاباتتى تۇرعىن ءۇيدىڭ قۇرىلىس جۇمىسىمەن تانىستى. بيىلعى 15 ماۋسىمدا 60 پاتەرلى كوپقاباتتى تۇرعىن ءۇي قولدانىسقا بەرىلمەك.
