Barlyq medısınalyq talaptarǵa tolyq sáıkes keletin kardıoortalyqtyń oblystyq deńgeıdegi klınıkalardan esh kemdigi joq. Esesine budan bylaı oblys ortalyǵynan qashyqta jatqan aýdan turǵyndary Óskemenge aǵylmaı, irgedegi Aıagózge kelip em-dom ala alady.
Aıagóz halqynan bólek, dál osy ortalyqta Tarbaǵataı, Jarma jáne Úrjar aýdanynyń turǵyndaryna da sapaly medısınalyq kómek kórsetiledi.
Osynaý nysannyń qurylys jumysymen tanysqan óńir basshysy Danıal Ahmetov ázirgi atqarylyp jatqan jumysqa oń baǵa berdi. Atap óterligi Aıagózdegi kardıoortalyq bir jaǵynan aýdandyq aýrýhana negizinde salynýda.
"Mundaı ortalyqtyń qabyrǵasyn qalaǵanymyz oblystaǵy medısınaǵa qatysty biraz máseleni sheshedi. Sebebi mundaı nysan salý qajettigi budan birneshe jyl buryn týyndaǵan. Osy kúnge deıin ótkir nemese jedel kardıologıalyq patologıasy bar azamattardyń kópshiligin Óskemen men Semeıdegi, Nur-Sultan men Almaty qalasyndaǵy kardıoklınıkalarǵa em-dom qabyldaýǵa baǵyttaıtyn edik.
Endigi jerde aýdan turǵyndaryn ózimiz qabyldap, tıisti medısınalyq kómek kórsetemiz", - deıdi aýrýhananyń bas dárigeri Shalqar Omarov.
Aıta ketelik Aıagózdegi kardıoortalyqty jóndeý jumystary bıylǵy jyldyń aqpan aıynda bastalyp ketken. Qazir osynaý ortalyqty jóndeý jumysy 60 paıyzǵa aıaqtalǵan.
Nysandaǵy qurylys-montajdaý jumystary 1 maýsymǵa deıin tolyqtaı aıaqtalady.
Shalqar Omarovtyń aıtýynsha medısınalyq qural-jabdyq tolyq satyp alynǵan. Qurylys jumystary máresine jetkesin, mamyr aıynyń aıaǵyna taman medısınalyq rentgen-angıografıalyq qurylǵysy ornatylady.
– Munda sonymen qatar kompúterlik tomografıa da bar. Budan bólek aýrýhanada naýqastardy ottegimen qamtamasyz etý jumysy jolǵa qoıylǵan. Munda ótkir nemese jedel kardıologıalyq patologıasy bar naýqastar emdeletin bolady. Bizde ınsýlt ortalyǵy nátıjeli jumys istep tur. Eki jyldyń ishinde 1 870 adamdy emdep, 970 adamdy ońaltýdan ótkizdik, - deıdi Shalqar Omarov.
Óz kezeginde SHQO ákimi Danıal Ahmetov qurylys jumystaryna oń baǵa berdi. Sonymen qatar ákim Aıagóz aýdandyq ortalyq aýrýhanasyndaǵy byltyrǵy jyly medısınalyq qyzmet kórsetý boıynsha İİİ deńgeıge ótken bosaný bólimshesine bardy.
– Bul aýdandaǵy medısınanyń jańa deńgeıi dep bilemin. Aldaǵy ýaqytta munda anıograf qoıylady. Sol kezde Aıagózdegi aýdandyq aýrýhananyń qyzmet kórsetý deńgeıi Óskemen men Semeıden esh kem bolmaıdy. Osy aýrýhanada ter tógip júrgen 15 dáriger Eýropaǵa arnaıy baryp, biliktilikterin arttyryp qaıtty. Bul oblystaǵy medısınanyń alǵa jyljýynyń naqty belgisi, - dedi Danıal Ahmetov.
Sapar sońynda oblys ákimi bes qabatty turǵyn úıdiń qurylys jumysymen tanysty. Bıylǵy 15 maýsymda 60 páterli kópqabatty turǵyn úı qoldanysqa berilmek.
