ءقازىر ەلىمىزدەگى ءومىر ءسۇرۋ دەڭگەيى اۋىل مەن قالادا ءبىر دەڭگەيدە ەمەس. سول سەكىلدى ءبىلىم بەرۋ دەڭگەيىنە قاتىستى دا سولاي دەپ ايتۋعا بولادى. دەسەكتە جىل وتكەن سايىن اۋىل مەن قالا مەكتەپتەرىنىڭ ءبىلىم بەرۋ ىسىندەگى الشاقتىقتار جويىلىپ كەلەدى. بۇل باعىتتا وقۋ اعارتۋ مينيسترلىگى جۇيەلى تۇردە جۇمىس جاساۋدا. وسى رەتتە Dalanews.kz اقپاراتتىق اگەنتتىگى تىلشىلەرى ەلىمىزدەگى اۋىل مەن قالا مەكتەپتەرىنىڭ ءبىلىم بەرۋ ىسىندەگى الشاقتىقتى جويۋ باعىتىندا قانداي جۇمىستار ءجۇرىپ جاتقانىنا نازار اۋدارىپ كوردى.
ءبىلىم بەرۋ سالاسىن زەرتتەپ جۇرگەن مامانداردىڭ سوزىنشە، كەڭ بايتاق جەرىمىزدەگى قالا مەن اۋىل مەكتەپتەرى اراسىنداعى ءبىلىم بەرۋ ساپاسىنداعى الشاقتىقتىڭ پايدا بولۋىنىنىڭ بىرنەشە سەبەبى مەن فاكتورلارى بار ەكەنىن العا تارتادى. ەندى وسى سەبەپ پەن فاكتورلارعا تالداۋ جاساپ كورسەك.
قىزىلودار قالاسىنداعى «بولاشاق» ۋنيۆەرسيتەتىنىڭ زەرتتەۋشىسى ازامات جالعاسبايەۆ اۋىل مەن قالا مەكتەپتەرى اراسىنداعى ايىرماشىلىقتى نەگىزىنەن ءبىلىم بەرۋ ينفراقۇرىلىمىنىڭ دامىماۋىنا، بىلىكتى مۇعالىمدەر تاپشىلىعى مەن ءتۇرلى رەسۋرستارعا قولجەتىمدىلىكتەن بايقاۋعا بولاتىنىن العا تارتادى.
– قالا مەكتەپتەرى ادەتتە زاماناۋي قۇرال-جابدىقتارمەن ءبىرىنشى كەزەكتە جابدىقتالادى. بۇگىندە قالاداعى ءبىلىم وردالارى ساندىق تەحنولوگيالار كەڭىنەن قولدانسا، اۋىل مەكتەپتەرىندە مۇنداي رەسۋرستارعا تولىقتاي قول جەتكىزە الماۋدا. مىسالى، قالا مەكتەپتەرى لابوراتوريالىق جابدىقتاردى، ساپالى ينتەرنەت پەن ينتەراكتيۆتى تاقتالاردى ەمىن-ەركىن پايدالانا الادى. بۇل ءوز كەزەگىندە بالالارعا ءبىلىم بەرۋ ساپاسىنا وڭ اسەر ەتەتىنى ءسوزسىز. ال اۋىل مەكتەپتەرىندە بىلىكتى مۇعالىمدەردى تارتۋدىڭ وزىندە ءبىراز قيىندىقتار كەزدەسەتىنى جاسىرىن ەمەس. ويتكەنى، ۇستازداردىڭ ءوىزىن ءوزى كاسىبي تۇرعىدان دامىتۋعا، جوعارى جالاقىعا الۋىنا قاتىستى يگىلىكتەردىڭ ءبارى قالادا ءجۇرىپ قول جەتكىزەتىنىن جاقسى تۇسىنەدى.
وسى رەتتە ءبىلىم وشاقتارىندا بىلىكتى پەداگوگتاردىڭ جەتىسپەۋشىلىگى ءبىلىم ساپاسىنا تىكەلەي اسەر ەتەتىنىن دە ەستەن شىعارماۋىمىز كەرەك. قالا مەكتەپتەرىندە مۇعالىمدەردىڭ بىلىكتىلىگىن ارتتىرۋعا ارنالعان رەسۋرستار مەن مۇمكىندىكتەر كوپ بولعاندىقتان، وقۋشىلاردىڭ ءبىلىم ساپاسى دا جوعارى بولاتىنى ءسوزسىز، – دەدى ازامات ورازبەك ۇلى.
اۋىلدىق جەرلەردە تۇراتىن وتباسىلاردىڭ الەۋمەتتىك-تۇرمىستىق جاعدايى دا وقۋشىلاردىڭ وقۋ ۇلگەرىمەن تىكەلەي اسەر ەتەتىنى بىلەگىلى. سەبەبى، اۋىلداعى بالالاردىڭ ءبىلىمىن ۇشتايتىن قوسىمشا ساباقتار ۇيىمداستىرىلىمايدى. ال قالالى جەردە تۇراتىن وقۋشىلار ءۇشىن بۇل پروبلەما ەمەس. ولار مەكتەپتەن العان ءبىلىمىن قوسىمشا ساباقتارعا قاتىسىپ، جەكە قالاعان رەپەتيتورلارىنىڭ الدىنا بارىپ ءبىلىمىن ۇشتايتىن مۇمكىندىكە يە. ال اۋىل وقۋشىلارى ءۇشىن مۇنداي مۇمكىندىكتەر قاراستىرىلماعان. سول سەبەپتى ولار وزدەرىنە قاجەتتى ءبىلىمدى مەكتەپ قابىرعاسىنان الۋعا كۇش سالادى.
سوڭعى جىلدارى ەلىمىزدە سيفرلى تەحنولوگيالاردىڭ دامۋى بۇل ماسەلەنى بەلگىلى دەڭگەيدە شەشۋگە مۇمكىندىك بەرگەنى انىق. قازىرگى تاڭدا اۋىل بالالارى ينتەرنەتتىڭ كومەگىمەن ءتۇرلى وقۋ كۋرستارىنا ساتىپ الىپ، وزدەرىنىڭ ءبىلىمىن جەتىلدىرىپ جاتىر. اسىرەسە، اۋىل مەكتەپتەرىندە جوعارى سىنىپتىڭ وقۋشىلارى جوعارى وقۋعا تۇسۋگە سىناق تاپسىرار كەزدە ءبىلىمىن جەتىلدىرەتىن كۋرستاردى ساتىپ الىپ، ونلاين رەجيمدە دايىندالىپ، كوزدەگەن ماقساتىنا جەتۋگە كۇش سالادى..
بىزدىڭشە، سيفرلىق تەحنولوگيالاردىڭ كومەگىنە جۇگىنىپ اۋىل مەن قالا مەكتەپتەرى اراسىنداعى ءبىلىم بەرۋ ىسىندەگى الشاقتىقتى تۇبىرىمەن جويۋدىڭ ماڭىزى زور. بۇل ءۇشىن اۋىلدى جەرلەردە وقۋشىلارى ساپالى ينتەرنەت پەن ساندىق تەحنولوگيالارعا قولجەتىمدىلىكتى ارتتىرۋ كەرەك. بۇل ءوز كەزەگىندە اۋىل مەكتەپتەرىندەگى ءبىلىم ساپاسىن جاقسارتۋعا ايتارلىقتاي سەپتەسەدى. بۇگىندە مۇنى وقۋ اعارتۋ مينيسترلىگى دە جەتە ءتۇسىنىپ وتىر. ولار بۇل باعىتتا ءتيىستى ۆەدموستۆالارمەن تىزە قوسىپ، اۋىل مەكتەپتەرىن ينتەرنەتپەن قامتۋ دەڭگەيىن 100%-عا دەيىن جەتكىزۋ ءۇشىن جان-جاقتى جۇمىستار جۇرگىزۋدە.
قازىرگى تاڭدا اۋىلدى جەرلەردەگى وقۋشىلاردىڭ ءبىلىمىن جەتىلدىرۋ ءۇشىن قوسىمشالار اشىپ، رەپيتيتورلار ۇستايتىنداي مۇمكىندىك كورىپ وتىرعان جوقپىز. ەگەر وسى باعىتتاعى جۇمىستاردى ونلاين فورماتتا اۋىستىرساق، بۇل ولقىلىقتى جويۋعا بولادى.
بۇدان باسقا ۇكىمەت اۋىل مەكتەپتەرىندەگى ينفراقۇرىلىمدى دامىتۋ بويىنشا ماڭىزدى ءىس-شارالاردى دا قولعا الىپ، جۇزەگە اسىرىپ جاتىر. بۇل رەتتە اۋىزدى قۋ شوپپەن سۇرتۋگە بولمايدى. ماسەلەن، وقۋ اعارتۋ مينيسترلىگى «ءبىلىمدى ۇلت» ۇلتتىق جوباسى اياسىندا اۋىل مەكتەپتەرىنىڭ ماتەريالدىق-تەحنيكالىق بازاسىن نىعايتۋ، جاڭا مەكتەپتەر سالۋ جانە ەسكى مەكتەپتەردى مودەرنيزاسيالاۋ جۇمىستارىن قارقىندى جۇرگىزۋدە. بۇل رەتتە بيلىك ورىندارىنىڭ 2025 جىلعا دەيىن اۋىلدىق جەرلەردە 5000 مەكتەپتى جاڭارتۋ جانە قوسىمشا 1000 جاڭا مەكتەپ سالۋ ىسىنە تاس ءتۇيىن كىرىسىپ كەتكەنىن ايتساق جەتىپ جاتىر.
سونىمەن قاتار اۋىلداعى ۇستازداردىڭ كاسىبي بىلىكتىلىگىن كوتەرۋ باعدارلامالارىنا قاتىسۋعا مۇمكىندىك جاساپ وتىر. تاعىدا ايتا تۇسسەك، ەلىمىز بويىنشا مۇعالىمدەر مارتەبەسىن كوتەرۋ، ولاردىڭ جالاقىسىن كوبەيتۋ جانە جاس ماماندارعا اۋىلدا جۇمىس ىستەۋگە ارنالعان ىنتالاندىرۋلار دا اۋىل مەن قالا اراسىنداعى ءبىلىم بەرۋ ىسىندەگى الشاقتىقتاردى جويۋعا ءوزىنىڭ اسەرىن تيگىزەتىنى انىق.
